Xəbər verdiyimiz kimi, bu gün Ermənistan parlamentində vitse-spiker Akop Arşakyanla Levon Köçəryan (Robert Köçəryanın oğlu) arasında dava düşüb.

Axar.az xəbər verir ki, Arşakyan qalmaqal zamanı Robert Köçəryanın atasının azərbaycanlı olması ilə bağlı yayğın iddianı təkrarlayıb.

Bunu “Köçəryan ailəsinin təhqir olunması” kimi qiymətləndirən ikinci prezidentə yaxın media onun ata-anası haqda məlumatı təqdim edib. Təqdimatda bildirilir:

“Rəsmi tərcümeyi-halda Robert Köçəryanın atası və anası ermənidir. Atası Sedrak Köçəryandır. O, 1910-cu ildə Dağlıq Qarabağın Astaşen kəndində anadan olub. O, Dağıstan Kənd Təsərrüfatı İnstitutunu bitirib, sonra Qarabağa qayıdıb, bir sıra məsul vəzifələrdə çalışıb. O, Dağlıq Qarabağ Muxtar Vilayətinin Kənd Təsərrüfatı İdarəsinin rəisi vəzifəsində işləyib. O, vilayət soveti icraiyyə komitəsi sədrinin birinci müavini, həmçinin raykomun büro üzvü olub. Sedrak Köçəryan kənd təsərrüfatı elmləri namizədi olub, elmi tədqiqatlarla məşğul olub. O, həmçinin Dağlıq Qarabağın kənd təsərrüfatı problemlərinə aid 20-dən çox elmi əsərin müəllifidir. 1977-ci ildə ölüb.

Anası — Qarabağın Hadrut rayonundan olan Emma Ohanyan. Əvvəl Leninakanda, sonra Xankəndidə elmi işçi işləmişdir. O, 2015-ci ildə ölüb”.

Göründüyü kimi, erməni mediasının verdiyi bu məlumat yarımçıqdır. R.Köçəryan 31 avqust 1954-cü ildə Xankəndidə anadan olub. Beləliklə, həmin vaxt atası sayılan Sedrak Köçəryanın 44 yaşı olub. S.Köçəryan Qarabağa nə vaxt qayıdıb, hansı vəzifələri və neçənci illərdə tutub, nə vaxt ailə qurub, niyə 43-44 yaşında evlənib? Digər tərəfdən, “Emma Ohanyan” olaraq təqdim edilən anası haqda ümumiyyətlə bilgi verilməyib – neçənci ildə anadan olub, Xankəndiyə nə vaxt gəlib?

2015-ci ilin avqustunda Emma Ohanyanın 89 yaşında (bu da mübahisəlidir) öldüyü haqda məlumat yayılmışdı. Demək, Ohanyan 1926-cı ildə anadan olub. Maraqlıdır, niyə özündən 16 yaş böyük kişiyə ərə gedib?

Bəs, əsl həqiqət haradadır?

Robert Köçəryanın atasının azərbaycanlı olması ilə bağlı 2018-ci ildə Rusiya sosial şəbəkələrində məlumat yayılmışdı. Daha sonra Daşkəsənin yaşlı nəslinin bildiyi həqiqətləri jurnalist Qalib Arif də ictimailəşdirdi.

Hər iki mənbədə bir çox faktlar oxşardır: Köçəryanın anası Emma Ohanyan (rus mənbə “Asmik Sokratovna” kimi təqdim edir) Daşkəsənin keçmiş Şarukar kəndidə doğulub, kənddə riyaziyyatdan dərs deyib.

Həddən artıq gözəl olub, rayon Maarif Şöbəsinin müdiri Məmməd Məcidov onu görüb və Daşkəsən şəhər məktəbinə dəvət edib, onun üçün kirayə ev tutub, orada saxlayıb. Bir müddətdən sonra isə Robert dünyaya gəlib.

Bu ərəfədə Məmməd Məcidov vəziyyətdən çıxmaq üçün onu Sosial Təminat Şöbəsində mühasib işləyən, bir qolu şikəst olan Sedrak Köçəryana ərə verib.

Daşkəsən rayonunun birinci katibi Əli Süleymanov hadisəni öyrənib, Emmanı çağırıb, ondan ərizə alıb və Məmməd Məcidovu fakt qarşısında qoyub. M.Məcidov bundan sonra könüllü ərizə yazaraq, rayondan köçüb öz şəhərinə - Gəncəyə gedib. Robertin atabir qardaşları olan Mərdan, Pirxan və Elmanın hazırda Gəncədə yaşadıqları bildirilir.

Əvəzində Robertin anasına bu dəfə birinci katib Əli Süleymanov “yiyə” çıxıb, Sedrak Köçəryanın isə vəzifəsini artırıb. Robertin anasının gözəlliyi sayəsində məktəb direktoru, sonra isə RPK-də ikinci katibliyinə qədər “yüksəldiyi”ni rus mənbələr iddia edir.