Redaksiyamıza Gədəbəy rayonunun Arıxdam kənd sakini Məhərrəm Məmmədovun Prezident İlham Əliyevə ünvanladığı müraciəti daxil olub. Şikayətçi məhkəmə hakimlərini ədalətsiz, qanun-qaydaya sığmayan qətnamələr çıxarmaqda günahlandırır. M.Məmmədovun müraciətindən aydın olurdu ki, o, 1990-cı ildən Gədəbəy rayonunda yerləşən “Azəravtoyol” İstehsalat Birliyinin 5 nömrəli Körpü tikinti sahəsində sürücü kimi işə qəbul olunub. 17 avqust 1992-ci ildə Gədəbəy rayon İcra Hakimiyyətinin sərəncamı və 12 avqust 1992-ci il tarixli 0855296 nömrəli yol vərəqi ilə 95-93 dövlət qeydiyyat nişanlı “KAMAZ” markalı avtomobillə xüsusi hərbi təyinatlı yük gətirmək üçün Ağdam şəhərinə göndərilib. Ağdamdan qayıdarkən idarə etdiyi avtomobil qəzaya uğrayıb, nəticədə, ayağından ağır xəsarət alıb. Sol bud sümüyünün aşağı üçdə birinin qapalı sınığı və sağ diz çanağının sınığı diaqnozu ilə dörd ay Şəmkir Mərkəzi Rayon Xəstəxanasında müalicə olunub. Sonra Şəmkir rayonunun Kür qəsəbəsindəki xəstəxanaya köçürülüb. İki ay burada müalicə olunduqdan sonra evə buraxılıb. Həkimlərin rəyinə görə, sağlamlığının 60 faizini itirən M.Məmmədova “Azəravtoyol” İstehsalat Birliyinin 5 nömrəli Körpü tikinti sahəsinin rəhbərliyi tərəfindən ona bədbəxt hadisə aktı verilib.
1993-cü ilin aprel ayından 1996-cı ilin dekabr ayına kimi əmək xəsarəti və əmək qabiliyyətimin müvəqqəti itirilməsinə görə M.Məmmədova orta əmək haqqının 60 faizi məbləğində aylıq ödənc hesablanaraq ödənilib. Ancaq “Azəryolservis” ASC-nin 07 yanvar 1997- ci il tarixli 33 nömrəli əmri ilə Gədabəy rayon 5 saylı Körpü tikinti sahəsi 01 yanvar 1997-ci il tarixdən Gəncə şəhər 2 saylı Körpü tikinti idarəsinə birləşdiriləndən sonra M.Məmmədova əmək xəsarəti ilə əlaqədar aylıq ödənclər ödənilməyib. Belə ki, “Gəncə Körpü Tikinti-2” ASC rəhbərliyi aylıq və birdəfəlik ödəncləri ödəməkdən imtina edib. Belə olan halda, M.Məmmədov “Gəncə Körpü Tikinti-2” ASC-yə qarşı istehsalatla bağlı əmək xəsarəti nəticəsində əmək qabiliyyətinin itirilməsi ilə əlaqədar aylıq və birdəfəlik ödənişlərin xeyrinə tutulması tələbi ilə Gəncə şəhəri Kəpəz rayon Məhkəməsinə iddia ərizə ilə müraciət edib.
Hakim Emin Əliyevin icraatında olan mülki işin məhkəməsi 8 ay çəkib. Uzun süründürməçilikdən sonra iddia rədd edilib. M.Məmmədov həmin qətnamədən Gəncə Apellyasiya Məhkəməsinə apellyasiya şikayəti verib. Eyni zamanda “Gəncə Körpü Tikinti-2” ASC ona qarşı istehsalatda bədbəxt hadisə haqqında aktın etibarsız hesab edilməsi tələbi ilə Gəncə Apellyasiya Məhkəməsinə şikayət verib. Bu səbəbdən də hakim Rəhman Muradov iş üzrə icraatın Gəncə Apellyasiya Məhkəməsinin icraatında olan “Gəncə Körpü Tikinti-2” ASC-nin M.Məmmədova qarşı istehsalatda bədbəxt hadisə haqqında aktın etibarsız hesab edilməsi tələbinə dair işin həll edilməsinə qədər dayandırılması haqqında qərar verib.
M.Məmmədovun müraciətə əlavə etdiyi sənədlərdən göründüyü kimi, 12.08.1992-ci il tarixdə onun qəzaya düşməsi ilə əlaqədar “İstehsalatda bədbəxt hadisə haqqında” Gədabəy rayon 5 saylı Körpü tikinti sahəsinin rəhbərliyi və Həmkarlar İttifaqı tərəfindən 12 avqust 1992-ci il tarixli akt tərtib edilib.
Onu da qeyd edək ki, M.Məmmədovun sözügedən iddiası üzrə mülki iş Kəpəz rayon Məhkəməsinin icraatında olan dövrdə cavabdeh “Gəncə Körpü Tikinti-2” ASC Gədəbəy rayon Məhkəməsində Məmmədov Məhərrəm Kərim oğluna qarşı “İstehsalatda bədbəxt hadisə haqqında 5 №-li Körpü Tikinti sahəsinin tərtib etdiyi 12 avqust 1992-ci il tarixli aktın etibarsız sayılması barədə” iddia qaldırıb. Gədəbəy rayon Məhkəməsinin 19 avqust 2013-cü il tarixli 577/2013 saylı qətnaməsi ilə “Gəncə Körpü Tikinti-2” ASC-nin iddiası təmin edilməyib.
Qeyd etdiyimiz kimi, 2013-cü il avqustun 19-da Gədəbəy rayon Məhkəməsinin hakimi Maarif Kazımovun sədrliyi ilə iddiaçı “Gəncə Körpü Tikinti-2” ASC-nin Məmmədov Məhərrəm Kərim oğluna qarşı “İstehsalatda bədbəxt hadisə haqqında aktın etibarsız hesab edilməsi” tələbinə dair iddiası üzrə mülki işə baxılıb.
İddiaçı “Gəncə Körpü Tikinti-2” ASC-nin nümayəndəsi İsaq Tomiyev məhkəmə iclasında iddia tələbini müdafiə edib.
Cavabdeh M.Məmmədov iddia tələbini etiraf etməyib və izahatında iddia tələbinin əsassız olduğunu, təmin edilməməsi barədə qətnamə çıxarılmasını xahiş edib.
Məhkəmə tərəflərin izahatını dinləyib, iş materiallarını tədqiq edərək hesab edib ki, iddia aşağıdakı əsaslara görə təmin edilməməlidir: “Belə ki, işdə olan Şəmkir rayon Kür Qəsəbə Xəstəxanası tərəfindən verilmiş xəstənin stasionar tibbi kartasından çıxarışdan görünür ki, Məmmədov Məhərrəm Kərim oğlu 08 dekabr 1992-ci ildən 02 fevral 1993-cü il tarixədək sol bud sümüyünün xəsarəti ilə stasionar müalicədə olmuşdur.
İşdə olan Şəmkir Mərkəzi Rayon Xəstəxanasınm arayışından görünür ki, Məmmədov Məhərrəm Kərim oğlu 13 avqust 1992-ci il tarixdən 07 dekabr 1992-ci il tarixə kimi Şəmkir Mərkəzi Rayon Xəstəxanasının travmatologiya şöbəsində sol bud sümüyünün aşağı 1/3-nin qapalı sınığı, sağ diz çanağının sınığı diaqnozu ilə müalicədə olmuşdur. İşdə olan 12 avqust 1992-ci il tarixli müdriyyət və həmkarlar ittifaqı tərəfindən tərtib edilmiş bədbəxt hadisə aktından görünür ki, M.K.Məmmədov 12 avqust 1992-ci il tarixdə 085296 saylı yol vərəqi ilə Azərbaycan Milli Ordusunun Gədəbəy bölməsinin və Gədəbəy rayon İcra Hakimiyyətinin sərəncamı ilə Ağdam şəhərindən xüsusi yük gətirməyə göndərilmiş, geri qayıdarəkən Gədəbəy rayon Qaradağ kənd ərazisində avtomaşın qəzasına düşmüş, Şəmkir Mərkəzi Xəstəxanasına göndərilmişdir.
Azərbaycan Respublikası Mülki Prosessual Məclləsinin 77.1-ci maddəsinə əsasən, hər bir tərəf öz tələblərinin və etirazlarının əsası kimi istinad etdiyi halları sübut etməlidir. Məhkəmə iclasında iddiaçı mübahisələndirilən aktın etibarsızlığı üçün istinad etdiyi halları sübuta yetirə bilmədi. Belə ki, iddiaçının ərizəsində aktın etibarsızlığı üçün irəli sürdüyü arqumentlər əsaslı hüquqi faktlara deyil, şəxsi mülahizələrinə əsaslanmış, həmin mülahizələr cavabdeh tərəfindən təqdim edilmiş sübutlarla tam təkzib edilmişdir”.
Beləliklə, məhkəmə təqdim olunmuş sübutlara tətbiq edilməli hüquq normalarına uyğun hüquqi qiymət verərək, iddia tələbinin təmin edilməməsi qənaətinə gəlib.
Göstərilənlərə əsasən və Azərbaycan Respublikası MPM-in 216-220, 227, 233-cü və 360-cı maddələrini rəhbər tutaraq məhkəmə qət edib ki, “İddiaçı “Gəncə Körpü Tikinti-2” ASC-nin Məmmədov Məhərrəm Kərim oğluna qarşı “İstehsalatda bədbəxt hadisə haqqında aktın etibarsız hesab edilməsi” tələbinə dair iddiası təmin edilməsin”.
M.Məmmədov hesab edir ki, vaxtilə işlədiyi və əmək xəsarəti ilə əlaqədar aylıq ödənc aldığı Gədabəy rayon 5 saylı Körpü tikinti sahəsi ləğv olunsa da, hüquqi varisi “Gəncə Körpü Tikinti-2” ASC tərəfindən ona aylıq və birdəfəlik ödənclər 1 yanvar 1997-ci il tarixindən ödənilməlidir.
Ona görə də qeyd etdiyimiz kimi, M.Məmmədov “Gəncə Körpü Tikinti-2” ASC-yə qarşı istehsalatla bağlı əmək xəsarəti nəticəsində əmək qabiliyyətinin itirilməsi ilə əlaqədar aylıq və birdəfəlik ödənişlərin xeyrinə tutulması tələbi ilə Gəncə şəhəri Kəpəz rayon Məhkəməsinə iddia ərizə ilə müraciət edib. 5 avqust 2013-cü il tarixdə Gəncə şəhəri Kəpəz rayon Məhkəməsinin hakimi Emin Əliyevin sədrliyi keçirilən məhkəmə iclasında iddiaçı Məmmədov Məhərrəm Kərim oğlunun cavabdeh “Gəncə Körpü Tikinti-2” ASC-yə qarşı istehsalatla bağlı əmək xəsarəti nəticəsində əmək qabiliyyətinin itirilməsi ilə əlaqədar aylıq və birdəfəlik ödənişlərin onun xeyrinə tutulması tələbinə dair mülki işə baxılaraq müəyyən edilib ki, iddiaçı Məmmədov Məhərrəm Kərim oğlu iddia ərizəsi ilə məhkəməyə müraciət edərək, “Gəncə Körpü Tikinti-2” ASC-dən 75600 manat məbləğində aylıq ödənişin, 25200 manat məbləğində birdəfəlik ödənişin, 5000 manat məbləğində maddi ziyanın, 5000 manat məbləğində mənəvi zərərin, 01 avqust 2012-ci ildən 420 manat məbləğində aylıq ödənişin onun xeyrinə tutulması barədə qətnamə çıxarılmasını xahiş edib. Məhkəmə iclasında izahat verən Məmmədov Məhərrəm Kərim oğlu iddianı müdafıə edərək, iddia ərizəsində göstərilənlərlə eyni məzmunlu izahat verib və tələbinin təmin olunması barədə qətnamə çıxarılmasını xahiş edib.
Məhkəmə iş üzrə tərəflərin izahatlarını dinləyib, iş materiallarını araşdıraraq qət edib ki, “iddiaçı Məmmədov Məhərrəm Kərim oğlunun cavabdeh “Gəncə Körpü Tikinti-2” ASC-yə qarşı 75600 manat məbləğində aylıq ödənişin, 25200 manat məbləğində birdəfəlik ödənişin, 5000 manat məbləğində maddi ziyanın, 5000 manat məbləğində mənəvi zərərin, 01 avqııst 2012-ci ildən 420 manat məbləğində aylıq ödənişin onun xeyrinə tutulması tələbinə dair iddiası rədd edilsin”.
M.Məmmədov dövlət başçısına ünvanladığı müraciətində daha sonra yazır:
“Hörmətli cənab Prezident!
Vətən, torpaq uğrunda sağlamlığımın 60 faizmi itirmişəm. Vətənə can yandıran oğullara hörmət budurmu? Siz fərman verdiniz ki. Azərbaycanda zorakılığa və korrupsiyaya qarşı ciddi mübarizə aparılacaq. Ancaq korrupsiyanı yaradan İsaq Tomiyev kimiləri və digər vəzifəli şəxslərdir. Əgər qanuna müvafiq deyildirsə, nə üçün onlar mənim 3 il aylıq məvacibimi qismən ödəmişlər, indi isə ödəmirlər?! Məni süründürürlər.
Azərbaycan Konstitusiyasınm maddə 26-cı bəndində yazır ki, insan azadlıqlarının müdafiəsi
1. Hər kəsin qanunla qadağan olunmayan üsul və vasitələrlə öz hüquqlarını və azadlıqlarını müdafiə etmək hüququ vardır;
2. Dövlət hər kəsin hüquqlarının və azadlıqlarının müdafiəsinə təminat verir.
Ancaq çox təəssüf ki, Azərbaycan Respublikasında məhkəmə hakimlərinin özbaşınalıqları müstəqil Azərbaycanda bitmək bilmir. Gədəbəy rayon Məhkəməsinin hakimi Maarif Kazımovun verdiyi ədalətli qətnaməni Gəncə Apellyasiya Məhkəməsinin hakimi Fikrət Mehdiyev İsaq Tomiyevin bütün sənədlərini icraata götürərək, bir aydan sonra məhkəmə prosesində bildirmişdi ki, guya İsaq Tomiyevin verdiyi etibarnamədə sənədlərə imza atmaq səlahiyyəti olmayıb. Bu adla Gədəbəy rayon Məhkəməsinin hakimi Maarif Kazımovun verdiyi ədalətli qərarı ləğv edərək, yenidən iddia qaldırmaq barədə qətnamə çıxartmışdır.
Gəncə şəhər Apellyasiya Məhkəməsinin sədri Rafiq Məmmədov və hakim Fikrət Mehdiyev şikayətimi bir-birinə ötürür, öz hüquq səlahiyyətlərini icra etmirlər. Azərbaycan Konstitusiyasının qanunlarını maddi maraqları əsasında icra edirlər. Bu səbəbdən də haqlı şikayətimi müdafiə edə bilmirəm.
Hörmətli cənab Prezident!
Gədəbəy rayon Məhkəməsinin sədri Ceyhun Əhmədov tərəfindən 31 mart 2014-cü ildə, saat 12:30-da keçiriləcək prosesin, həmçinin mənim və ailəmin təhlükəsizliyinin təmin edüməsi üçün aidiyyəti qurum rəhbərlərinə göstəriş verməyinizi xahiş edirəm”.
Qarşı tərəfin də mövqeyini dərc etməyə hazırıq. \\tezadlar.az \\
