FHN ŞEFİNİN “ŞÜŞƏLİ BAZAR”LA BAĞLI PLANLARI SAKİNLƏRİ QƏZƏBLƏNDİRİB
DİA.AZ: - Bir müddət bundan əvvəl şəhərimizin H.Cavid prospekti ilə S.Dadaşov küçələrinin kəsişməsində yerləşən və yüngül konstruksiyalarla inşa olunan «Şüşəli Bazar» yerli-dibli sökülərək, ərazisi taxta lövhələrlə əhatəyə alındı. Söküntü işlərini aparan podratçı şirkət tərəfindən atılan bu addım, ətraf ərazidə yaşayan sakinlər tərəfindən müzakirə olunduqda, onlara bildirilir ki, burada gözəgəlimli bir park salınacaq ki, ərazidə yaşayan sakinlər həmin parkda rahat istirahət edə bilsinlər. İlk olaraq xəbəri eşidən sakinlər atılan bu addımı rəğbətlə qarşılayır, hətta bəziləri sevinclərini belə gizlədə bilmirdilər.
Bir müddət keçdikdən sonra söküntüsü başa çatmış «Şüşəli bazar»ın əhatə etdiyi ərazidə istirahət parkı deyil, imkanlı bir şəxsin hündürmərtəbəli bina tikdirəcəyi haqda da söz-söhbətlər gəzməyə başladı. Bu zaman qəti narazılığını bildirən və etiraz səslərini ucaldan sakinlərin mövqeyi, məsələnin reallaşmasına imkan vermədi. Üzləşdikləri problemlər haqda, S.Dadaşov ünvanında yaşayan çoxsaylı sakinlər adından - təqribən 40-a yaxın sakinin adından DİA.AZ-a ünvanlanan müraciətdə sakinlər bildirir ki, həmin ərazidə hansısa tikinti işlərini aparmaq həm ən böyük ədalətsizlik, həm də ən böyük haqsızlıq olar. Elə bu səbəbdən də onların üzləşdikləri problemləri ictimailəşdirmək üçün, lazımi dəstək verməyimizi bizdən xahiş edirlər.
Məlumat üçün qeyd edək ki, sakinlərin müraciətindən sonra apardığımız araşdırmalar zamanı o da məlum oldu ki, Bakının Hüseyn Cavid prospektində yerləşən «Şüşəli bazar» ötən əsrin 50-ci illərində inşa olunmuşdur. Uzun illər fəaliyyət göstərsə də, onun fəaliyyətinə 2005-ci ildə son qoyulur. Və 2010-cu ildən başlayaraq bazar həm sökülür, həm də hasara alınır. Həmin vaxtdan da «Şüşəli bazar» ətrafında başlayır söz-söhbətlər gəzməyə.
Amma, bu məsələnin müzakirəsindən, yerli sakinlərin narazılıq etmələrindən çox vaxt keçmir ki, başqa bir xəbərdə o da bildirildi ki, həmin ərazidə park yox, böyük bir ticarət mərkəzinin inşa olunması planlaşdırılıb. Xəbəri eşidən bina sakinləri, sanki şoka düşürlər. Bu necə ola bilər ki, həmin ərazidə ticarət mərkəzi tikilsin, deyə bir-birinə sual edirlər. Axı, həmin ərazidə qazıntı işləri aparmaq olmaz deyən bina sakinləri bir-birinə gileylənməyə başlayırlar ki, necə bəyəm podratçı şirkətin rəhbərliyi, onlara xeyir-dua verənlər bilmirmi ki, ərazinin alt hissəsindən diametri 1200 və 1500 mm-lik kanalizasiya boru xətləri keçir. Elə bu səbəbdən də, aparılacaq inşaat işləri norma və qaydalara uyğun olaraq kanalizasiya xətlərinə qədər təqribən 15 m-lik məsafədə saxlanılmalıdır.
Digər tərəfdən, ərazidə ticarət mərkəzinin inşaasına başlanması, müəyyən fəsadların əmələ gəlməsinə də səbəb olacaq. Bu haqda giley-güzarını bir-birinə söyləyən bina sakinləri onu da vurğulayırlar ki, bunu tikinti işlərini aparmaq istəyən şirkətin rəhbərliyi həm gözəl bilir və dəqiq anlayır. Məsələn, ərazinin olduqca darısqal olması, nəqliyyat vasitələrinin hələ əvvəldən də normal hərəkət etmələrinə imkan vermirdi. Digər tərəfdən, S.Dadaşov küçəsindəki həmin ərazi, nəqliyyat vasitələrinin 2 hərəkət zolağının arasında yerləşdiyindən, ərazidə kapital tikinti işləri aparmaq mümkün deyil və ərazi məhəllədaxili ərazinin qırmızı xətti xaricində yerləşir. Ən əsas səbəblərdən biri də, həmin əraziyə yaxın yerdə bir neçə ölkənin diplomatik korpusunun fəaliyyət göstərməsidir ki, ərazidə ticarət mərkəzinin fəaliyyətə başlayacağı təqdirdə, orada insanların sayı çox olacaq və nəticə etibarı ilə müxtəlif düşüncə tərzinə, təfəkkür formasına malik olanlardan hər an onlara xəta törədilə bilər.
Digər tərəfdən, əgər həmin ərazidə ticarət mərkəzi tikilərsə, gələcəkdə nəqliyyat vasitələrinin yaradacaqları tıxac probleminin, həmçinin həmin ünvalarda yaşayan sakinlərinin adicə ərazidən ötüb keçərkən üzləşəcəkləri maneələrin əmələ gətirəcəyi fəsadların rolunu, gərək tikinti işləri aparmaq istəyən şirkətin rəhbərliyi də əvvəlcədən nəzərə alsın.
Bir faktı da qeyd edək ki, hələ bir neçə il bundan əvvəl Hüseyn Cavid prospektində inşa olunan hündürmərtəbəli binanın, Milli Məclisin deputatlarına verilməsi nəzərdə tutulsa da, az sonra rəhbərlik bu addımından daşınmalı olur. Çünki, həmin bina ilə üzbəüz Fəxri Xiyabanın yerləşməsi, ən əsası dövlət başçısının Fəxri Xiyabana etdiyi ziyarət zamanı onun açıq-aydın görsənməsi, hündürmərtəbəli binanın müxtəlif mərtəbələrindən ona qarşı müəyyən təxribatların olacağını heç də istisna etmir. Elə bu səbəbdən bütün bu kimi amillər nəzərə alınaraq, əvvəlcədən qərarlaşdırılmış addımdan yan keçildi və bina Fövqəladə Hallar Nazirliyinə verildi.
Diqqəti cəlb edən məqamlardan biri də, Yasamal rayonu ərazisində yerləşən və söküntü işləri çoxdan başa çatmış «Şüşəli bazar»ın sahibinin kim olması haqda gəzən söz-söhbətlərdir. Bu haqda bizi bilgiləndirən mənbə onu da qeyd edir ki, həmin bazar vaxtilə Daşınmaz Əmlakın Dövlət Reyestri Xidmətinin sabiq rəisi Arif Qaraşova məxsus imiş. O da, zamanında bazarı öz adına özəlləşdirməklə sənədləşdiribmiş. Elə ki, A.Qaraşov daşıdığı vəzifədən uzaqlaşdırılır, ona qarşı xüsusi bir hücum kampaniyasına start verilir. Və çox keçmədən A.Qaraşova məxsus obyektlərdən bir çoxu əlindən alınır. «Şüşəli bazar» da bu sırada olan obyektlərdən biri olur.
Əldə etdiyimiz digər məlumatlarda o da bildirilir ki, bu gün həmin ərazinin sahibi Fövqəladə Hallar Nazirliyinin şefi Kəmaləddin Heydərova məxsusdur o, həmin bazarı yaxın bir qohumunun adına sənədləşdirb. Həmin şəxsin də yaxın gələcəkdə ərazidə «Gilan» adlı yeni ticarət mərkəzini tikdirəcəyini planlaşdırılır. Sözsüz ki, sadalanan faktlar öz həllini taparsa, o zaman hər kəsə məlum olacaq ki, bazarın əsas söz sahibi K.Heydərovdur. Bununla da «Şüşəli bazar»ın kimə məxsusluğu haqda gəzən söz-söhbətlərə birdəfəlik son qoyulacaq.
Artıq bu gün bina sakinlərini əndişəyə salan ərazidə azacıq olsa da, qazıntı işləri aparılıb. Ticarət mərkəzinin inşa olunacağını eşidən sakinlər isə, tikinti işlərinin dayandırılması üçün şəhər rəhbərliyinə yox, möhtərəm İlham Əliyevə müraciət etməyi qarşılarına məqsəd qoymuşlar. Çünki, onlar bilirlər ki, bir çox hallarda Bakı şəhər İcra Hakimiyyətinin başçısı cənab H.Abutalıbov, paytaxt sakinlərini yanlış qərarları ilə narazı salmasından ölkə rəhbərinin xəbəri olmur. Elə bu səbəbdən də, S.Dadaşov küçəsində yaşayan sakinlər həmin ərazidə ticarət mərkəzi yox, əhalinin rahat istirahət etməsi üçün mənzərəli bir parkın inşa olunmasını istəyirlər.
Elə bu səbəbdən də, narazı sakinlər müraciətlərini prezident İlham Əliyevə ünvanlayaraq ümid edirlər ki, o, şəhər rəhbərliyini və ərazidə ticarət mərkəzi inşa etdirmək istəyən tikinti şirkətinin sahibini yanlış addımından çəkindirməyə məcbur edəcək.
