Milli Məclisin deputatı Aydın Mirzəzadə ilə regiondakı proseslər, Rusiyada keçirilən nümayişlər, bu aksiyaların postsovet coğrafiyasına və Azərbaycana təsiri, o cümlədən ABŞ-ın Gürcüstanda baza qurmağa hazırlaşması barədə söhbətləşmişik.
A.Mirzəzadə habelə hakimiyyətin atdığı addımlar, daxili və xarici siyasətində Rusiyanı təkrarlaması fikirləri, xaricdən səslənən bəyanatlar, payızda ölkədə hansısa qarışıqlıq olacağı iddiaları və digər məsələlərlə bağlı suallarımızı cavablandırıb. Onun “Yeni Müsavat”a müsahibəsini təqdim edirik:
- Aydın müəllim, Azərbaycandakı ictimai-siyasi vəziyyət qonşularla müqayisədə nə ilə fərqlənir?
- Hesab edirəm ki, ilk növbədə Azərbaycanda davamlı sabitlik, ictimai təhlükəsizliyin ən yüksək səviyyədə təmin olunması bizi fərqləndirir.
Eyni zamanda dövlətin sahibkarlığa dəstəyi, insan haqlarının qorunması, iqtisadiyyatda xarici kapitala qoyuluş və vətəndaşlar üçün cəlbedici şərait olması vurğulanmalıdır.
Ölkədə sosial problemlərin həll edilməsi, vətəndaşların müraciətlərinə baxılması qeyd edilməlidir.
Bizim ölkədə yaşayan müxtəlif xalqların dininə, mədəniyyətinə böyük hörmətimiz var və Azərbaycan tolerant bir respublika kimi tanınır.
- Gürcüstanda vaxtaşırı, bir neçə gün qabaq Ermənistanda parlament önündə, habelə günlərdir Rusiyada aksiyalar keçirilir. Bu mənada bizdəki sakitliyi müxalifətin zəifləməsi ilə əlaqələndirməliyik, yoxsa?
- İnsanlar o zaman küçəyə çıxır ki, onların problemləri kabinetdə həll olunmur. Yəni hakimiyyət idarəçilikdə effektli mexanizm yarada bilmir, vətəndaşların səsini eşitmək üçün lazımi sistemi qura bilmir.
Azərbaycanda vətəndaşların müraciətləri istərsə dövlət başçısına, istərsə müxtəlif instansiyalara zamanında çatdırılır, bu çağırışlar dövlət rəhbərliyi tərəfindən eşidilir.
Prezident İlham Əliyev və birinci vitse-prezident Mehriban Əliyeva hər bir ailənin probleminə reaksiya verir, həllinə kömək edir, vətəndaş öz dövləti tərəfindən ona göstərilən qayğını görür, dayağı hiss edir, dövlətinə arxayın olur.
Lakin Azərbaycanda müəyyən qruplar var ki, onlar ruhən müxalifətçidirlər, iqtidar olmaq istəyirlər. Bu da başadüşüləndir.
Ancaq onların keçirdikləri aksiyalar kütləvi xarakter daşımır və vətəndaşlara aidiyyəti yoxdur. Çünki özləri üçün keçirirlər.
Azərbaycanda çox yaxşı sosial sistem var, insanlara diqqət yetirilir, maraqları qorunur, əhalinin sosial problemləri həll olunur.
Heç kəs demir ki, Azərbaycanda hamının maaşı yüksəkdir, heç kəs demir ki, problem tamamilə yoxdur. Əlbəttə, həll edilməli məsələlər var və problemlər deyilir, dilə gətirilir, tərəfimizdən də səsləndirilir, çıxış yolları da göstərilir. Belə desək, Azərbaycan hakimiyyəti cəmiyyətə həmişə hesabat verir.
- Bəzən fikirlər səslənir ki, Azərbaycan hökuməti Rusiya iqtidarının siyasi texnologiyalarını təkrarlayır. Siz bu mülahizəni bölüşürsünüzmü?
- Bu fikirlə qətiyyən razı deyiləm. Hər bir ölkənin öz mexanizmi, idarəçilik sistemi var. Azərbaycan müstəqillik dövründə spesifik modelini yaradıb və daim yenilənir, o cümlədən beynəlxalq təcrübədəki yaxşılardan nümunə götürülür, istifadə edilir.
Amma hansısa ölkənin modelinin Azərbaycana gətirilməsindən söhbət gedə bilməz. Kimlər ki, Azərbaycanın Rusiyadan idarəçilik modelini götürdüyü fikrini səsləndirir, onların məqsədi iki dövlət arasında münasibətləri pisləşdirməkdir.
Azərbaycan Ermənistan istisna olmaqla, bütün qonşu ölkələrlə xoş münasibət saxlayır, bu əlaqələrin daha da dərinləşməsində maraqlıyıq, heç bir dövlətin daxili işlərinə qarışmırıq. Azərbaycan öz milli maraqlarını qoruyur və vətəndaşlarının istəklərini yerinə yetirir.
- Sizcə, Rusiya ilə Azərbaycanın arasını vurmaq istəyənlər Qərbdəki dairələrdir?
- Mən ad çəkmək istəməzdim. Ermənistan istisna olmaqla, bizim bütün qonşu dövlətlərlə xoş münasibət saxlamaq üçün imkanlarımız var.
- Siyasətçilər arasında bu fikirdə olanlar var ki, Moskvada Putin əleyhinə keçirilən nümayişlər postsovet respublikalarında siyasi fəallığa təsir edə bilər. Sizin gözləntiləriniz nədir?
- Mən başqa ölkələrlə bağlı proqnoz verə bilmərəm. Lakin Azərbaycan heç kəsdən asılı deyil və bu hadisələrin ölkəmizə təsirini gözləmirəm. Rusiya böyük ölkədir, onun problemlərini həll etmək potensialı, resursu var.
- Xaricdəki azərbaycanlılardan bəziləri oktyabr-noyabra Azərbaycanda “inqilab təyin ediblər”. Bu mənada Rusiyada etirazların güclənməsi payızda bizə transformasiya ola bilərmi?
- Azərbaycanın daxilində və xaricində müəyyən qruplar mövcuddur ki, öz istəklərini bizə eksport etmək istəyiblər. Amma bizim öz inkişaf xəttimiz var və hansısa ölkənin qarşılaşdığı vəziyyəti bizə daşımaq mümkün deyil. Əgər kütləvi protest varsa, deməli, problemlər var. Azərbaycanda etirazlar kütləvi deyil və təbii ki, hakimiyyət də vətəndaşlar qarşısında öz məsuliyyətini dərk edir.
Cənab prezidentin və Mehriban xanımın fəaliyyətinin mərkəzində vətəndaşların maraqları, əhalinin sosial rifahının yüksəldilməsi durur. Bu fəaliyyət də göz qabağındadır.
Prezident tərəfindən maaşlar, pensiyalar artırılır, regionlarda yeni iş yerləri açılır, iş adamlarına dəstək verilir, qeyri-neft sektorunda inkişaf var. Ölkəmizə gələn turistlərin günbəgün çoxalması da bu sektorun inkişafına təsir edir.
Prezidentin bölgələrə hər səfəri yeni iş yerlərinin, müəssisələrin açılması ilə müşayiət olunur. Bu baxımdan insanların problemləri hakimiyyətin diqqətindən kənarda deyil.
- “Novaya Vremya” bugünlərdə yazıb ki, ABŞ Gürcüstanda üç hərbi baza qurmağı nəzərdə tutur. Nəzərə alsaq ki, Ermənistanda Rusiya hərbi bazası var, Gürcüstanda Amerika hərbi bazaları olarsa, Azərbaycan hansısa strateji seçim etməli olacaqmı?
- Biz nəyə görə strateji seçim etməliyik? Azərbaycana qonşu olan ölkələr öz xarici və daxili siyasətinə uyğun seçim edir. Və burada bizə toxunan məsələ yoxdursa, onların seçiminə hörmətlə yanaşmalıyıq.
Ermənistanda Rusiyanın hərbi bazasının olmasına narazılıq edirik. Çünki torpaqlarımız işğal olunub və onlardan zaman-zaman Azərbaycanla müharibədə rus hərbi bazasından istifadə ediləcəyi hədəsi gəlir. Çünki Ermənistan Azərbaycanla müharibəyə Rusiyanı cəlb etmək istəyir. Rusiya rəsmi dairələri isə imtina edir, Ermənistan tərəfinin dediklərini qəbul eləmirlər.
Azərbaycan bu gün həm Rusiya, Avropa, Amerika, həm Türkiyə və İranla çox yaxşı münasibət saxlayır. Bizim müstəqil siyasətimizə hörmət edirlər.
Azərbaycandan mütəxəssislər NATO-ya hərbi təlimə gedirlər. Eyni zamanda Rusiyadan və dünyanın başqa ölkələrindən hərbi texnika alırıq. Bu da hörmət doğurur.
Təsadüfi deyil ki, dünyanın iki nəhəng hərbi bloku olan NATO-nun və Rusiyanın Baş Qərargah rəisləri növbəti dəfə görüş yerini Azərbaycan seçdilər. Bu, qazandığımız etimadın göstəricisidir
Eyni zamanda Avroliqa finalının Bakıda keçirilməsi dünyanın diqqətini ölkəmizə yönəltdi. Biz bu yarışdan 780 milyon qazanc əldə etdik və stadionun inşasına xərclənən maliyyədən daha çox vəsait büdcəyə qaytarıldı.
- Sizcə, Ermənistanda və Gürcüstanda hərbi bazalar məsələsinə görə Azərbaycanda Türkiyə hərbi bazasının yaradılması nə dərəcədə aktualdır?
- Hesab etmirəm ki, Azərbaycanda hərbi baza yaranmasına ehtiyac var. Azərbaycanın Türkiyə ilə siyasi-hərbi əlaqələri ən yüksək səviyyədədir.
İki qardaş arasında münasibətlərdə nə mümkündürsə, bizim Türkiyə ilə əlaqələrimiz bu gün elədir. Ona görə də düşünürəm ki, əlaqələrin bir qədər də dərinləşməsi üçün yeni variantlar axtarılacaq.
