“ONLAR MÜSƏLMANLARA HÖKM VERƏ BİLMƏZLƏR”
“İranda din xadimləri rəsmi dövlət strukturunun tərkib hissəsidir. Keçmiş SSRİ-də kommunistlərin rolunu İranda din xadimləri icra edir”. APA-nın məlumatına görə, bu fikirlər politoloq Mübariz Əhmədoğluna məxsusdur.
O bildirib ki, keçmiş SSRİ-də kommunistlərin statusu konstitusiyada təsbit olunduğu kimi İranda da din xadimlərinin statusu konstitusiyada təsbit olunub: “Ona görə də İranın din xadimlərinə rəsmi dövlət adamı kimi yanaşmaq ən düzgünüdür. Azərbaycan Respublikasının insanları kimi mömin, sadəqəlbli əhaliyə təsir etmək üçün həmin şəxslərin dövlət statusu bir kənara qoyulur, dini statusu ön plana çıxarılır. Amma indi söhbət ondan gedir ki, İslam dininin istismarçısı olan bu adamlar əhaliyə dini göstəriş vermək hüququnu çoxdan itiriblər. O şəxslərin fərdi möminliyini, fərdi qaydada oruca, namaza və digər dini ayinlərə dəqiq riayət etmələrini zərrə qədər şübhə altına almırıq. Fərd kimi ən ideal müsəlmandırlar, amma öndə gedən müsəlman kimi öz funksiyalarını yerinə yetirə bilmirlər. Arqumentlərimizi onların diqqətinə çatdıraq.
A) İranın indiki dini liderləri yaşlı adamlardır. Bu şəxslərin əksəriyyəti şah rejimi dövründə də dini fəaliyyətlə də məşğul olublar. Bəlkə Ərdəbilin imamcüməsi yaşına görə həmin dövrdə dini lider olmayıb. Qurani-Kərimin “Əl-Maidə” surəsinin 51-ci ayəsində yəhudilərlə xristianların adı ardıcıldır və yanaşıdır. Bir cümlənin içindədir. Şah dövründə indiki din xadimlərinin böyük əksəriyyəti “Əl-Maidə” surəsinin 51-ci maddəsinin yəhudilərə dair hissəsinin şah tərəfindən pozulmasına dözməklə günah işlədiblər. İndi də bu din xadimləri həmin ayənin xristianlara aid tələbinin (ermənilərə istinadən) pozulmasına dözürlər. Ən azı bu gün heç bir din xadiminin İran-Ermənistan əlaqələrinə görə İran rəsmilərinə, bu işə sərəncam verənlərə etiraz etməsinə rast gəlməmişik. Öz sözümüzü yox, İranın Ermənistandakı səfiri Sagiyanın sözlərinə istinadən deyə bilərik ki, 2007-2011-ci illərdə Azərbaycanın, şiənin torpağını işğal edən Ermənistanla İran arasında mal dövriyyəsi 2 dəfə artaraq 323 milyon dollar olub. Bu dövr ərzində İranın Azərbaycanla mal dövriyyəsi isə 2 dəfə azalıb. Qonşuluqdursa, Ermənistanda fəlakət, zəlzələ olanda yardım etmək olar, onun pisliyini arzulamamaq olar, amma aşkar şəkildə iqtisadi əlaqələri inkişaf etdirmək ancaq dostluğun əlamətdir. Ermənilərlə dostluqdan ötrü həmin ayəyə baxsınlar. Eləcə də 1967-ci ildə İsrail ərəb torpaqlarını işğal edərkən İranın şah rejimi bu işğalda yəhudilərə kömək edərkən də İranın bircə nəfər də olsun dini liderinin səsi çıxmadı.
B) Əfqanıstanda Qurani-Kərim yandırılarkən 20-ə yaxın Əfqanıstan vətəndaşı öldü, 1000-ə yaxın əfqan bu və ya digər şəkildə həmin hadisələrdə zədə alıb. İrandan heç bir adam O cümlədən din xadimləri Qurani-Kərimin yandırılmasına etiraz bildirmədi. Amma yaxınlarda İngiltərədə kimsə ərəblərin o coğrafiyada olan körfəzin adının Ərəb körfəzinə əvəzlənməsi ilə bağlı dediyi fikrə İranın bütün dini liderləri reaksiya verdi. Hətta aksiyanın da təşkilinə icazə verdilər. İranın din xadimləri üçün, görünür, fars terminin müdafiəsi Qurani-Kərimin müdafiəsindən daha vacibdir.
C) Bu gün İranla İsrail arasında əlaqələr mövcuddur. O əlaqələri tənzimləyən rəsmi sənədlər məxfi elan edilə bilər, amma bu Allahdan məxfi olmaq deyil. İranın din xadimləri bu gün İran ordusunun malik olduğu hərbi təyyarələrin vaxtilə İsraildən alındığını bilmirmi?! İranın din xadimlərin əksəriyyəti İsraildən aldığı həmin təyyarələrin şərəfinə tərif deyir. İranın din xadimləri həmin təyyarələrin son 30 ildə ehtiyat hissəsi dəyişilmədən işləməsinə inanırmı?! Bu ehtiyat hissələri necə alınıb?! İsraildən alınan təyyarələrin ehtiyat hissələri elə İsraildən alınır. Hökumət gizlətsə də bu ki, allahdan gizli deyil. Din xadimi isə sənədin gizli olmasına söykənir, allaha aşkar olana yox.”İrangeyt” İsraillə Iran İslam Respublikası (bəli düz oxudunuz Iran İslam Respublikası 1986 cı il) arasında ən gizli hadisədir. Əgər İran və İsrail bir-birinin düşmənidirlərsə niyə bu hadisədən bir-brinə qarşı istifadə etmirlər?! Belə olan halda İranın din xadimi Allaha xidmət edən din xadimidir yoxsa, İsrailin gizli müttəfigi İran hökumətinə?!
Ç) Bu gün İranın ictimai-siyasi həyatında yəhudilərin qoyduğu ənənələr ən ciddi şəkildə qorunur. Kinonu farsmı yaradıb?! Dünya mətbuatı İranın əlindədir, yoxsa yəhudinin?! İran bir tərəfdən yəhudiləri dünya mətbuatını monopoliyaya almaqda ittiham edir, digər tərəfdən həmin mətbuatı yığıb Bəhreynin və Azərbaycanın üzərinə hücuma keçirdir. İudaizimin ən qədim nümunəsi qadınların saçını gizlətməsi və ya başını bağlaması və ya hicabdır. Hicabın bir neçə forması var. İranda müdafiə olunan forma yalnız İsraildə olan formadır. İran hətta Həzrəti-Musadan qabaqkı dövrü də əhatə edən çəkdiyi filmlərdə də qadınları yəhudilərin geyimində təsvir edir. Bu yəhudilərə xidmət deyilmi?! Bunu İranın din xadimləri görmür?! Ən azı Qurani-Kərimin nazil olduğu ərəblərin qadınlarının hicab ilə İranda qadınların geyindiyi hicabı müqayisə etsinlər. İran qadınları bu gün yəhudilərin mədəniyyətinin daşıyıcısından imtina etmək istəyirlər. İranın bir qrup din xadimi bunun qarşısını alır. Digər din xadimləri bunu görmürmü?!
Qayıdaq Azərbaycan məsələsinə. Əvvəla, Azərbaycan mömini öz dini qarşısında sınaqdan keçmiş müsəlmandır. Çar Rusiyasında və Sovet İttifaqında həm zorakı, həm siyasi, həm də hiylə ilə bu milləti öz dinindən əl çəkməyə təhrik etdilər. Heç bir variant alınmadı. Bu xalq öz dinini olduğu kimi qorudu, saxladı. İranın din xadimləri öz dinlərdən olan bir şahın təzyiqi ilə dinlərindən imtina etdilər. Həmin qorxaq dindarlardır ki, bu gün Şami-Qəribanın qeyd olunmasından qorxurlar. Görəsən, İranın din xadimləri uşaq vaxtı ilaxır çərşənbədə od üstündən tullanmayıbmı?! İran, Azərbaycan coğrafiyasında uşaq və gənclik yaşlarında od və su üstündən tullanmayan adamı təsəvvür etmək qeyri-mümkündür. İndi İran hökumətinin çərşənbə bayramına göstərdiyi münasibətdən məlum olur ki, İranın adamları uzun müddət atəşpərəst olublar, yalnız son bir ildə müsəlmançılığı qəbul etməyə başlayıblar. Azərbaycanda din də var, Azərbaycan möminlərinin öz dinlərini qorumağa cəsarəti də bacarığı da var. Din üçün təhlükə yarananda bu xalqın müraciət etməyə ünvanı da var. Ölkənin başında duranlar Azərbaycan xalqının formalaşmış dini ənənələrini qorumaqla bağlı dəfələrlə bəyanatlar veriblər. İran dindarları ilk növbədə çörək qazandıqları dinimizin qabağında borclarını ödəsinlər. Bundan sonra din adından söz danışmaq haqqı əldə etsinlər.
D) Bu gün vaxtilə Birləşmiş Ərəb Əmirliklərinə məxsus olmuş 3 ada ilə bağlı İranla ərəb dövlətləri arasında mübahisə gedir. Amerikalılar və yəhudilər 1971-ci ildə müstəqillik əldə etmək istəyən Birləşmiş Ərəb Əmirliklərinə ziyan vurmaq məqsədilə həmin 3 adanın İrana məxsusluğuna dair kağız verdilər. İran dövləti yəhudilərdən və amerikalılardan aldığı həmin kağızı dünyanın ən mötəbər kağızı hesab edir və o üç adanı özününkü bilir. O üç adanın kimə məxsusluğunu həmin sənəd yox, məhz Allah bilir. İranın din xadimləri kimin tərəfindədir: İsrailin verdiyi sənədin, yoxsa Allahın ədalətinin?!
İranın ruhaniləri üçün o dünya barədə fikirləşməli çox şey var. Səlahiyyətlərinin çoxalması axirət yükünü daha ağırlaşdırır”.
