"“Qərb Universiteti Tam Orta Məktəbi” şagirdlərinin kim olduğunu belə bilmir". "DİA-AZ" xəbər verir ki, bunu öz paylaşımında tanınmış hüquqşünas Əkrəm Həsənov qeyd edib.

O daha sonra bunları bildirir: "Deməli, srağagün məhkəmə prosesində bu məktəbin nümayəndəsi etiraf etdi ki, 20-30 şagird (fikir verin, heç rəqəmi də dəqiq deyə bilmir) məktəbin direktor müavininə (faktiki elə direktor kimi fəaliyyət göstərib) nağd ödəniş edərək 2 il ərzində dərsə gəliblər, hətta məktəbin mətbəxində qidalanıblar da. Direktor müavini isə ödənişi məktəbin hesabına mədaxil etməyib (məktəbdə bu adi haldır: valideynlər pulu nağd göndərir, məktəb özü onu hesaba mədaxil edir). Şagirdlərin adı təhsil nazirliyinin də bazasına daxil edilib, bütün imtahanlarda iştirak ediblər. Amma məktəbin jurnallarında guya uşaqların adı olmayıb. Buna baxmayaraq onlara dərs demiş heç bir müəllim bu məsələni qaldırmayıb. Üstəlik məktəbin təhlükəsizlik strukturu da “ödəniş etməmiş” şagirdlərin, yəni guya faktiki kənar şəxslərin 2 il ərzində məktəbə gəlib-getməsini “görməyib” (mən elə bilirdim ki, məktəblərdə təhlükəsizlik məsələləri ciddidir, bunlar isə heç şagirdlərini tanımır!). Guya yalnız bir neçə ay əvvəl audit bu pozuntunu müəyyən edib. İndi də məktəb direktor müavinindən prokurorluğa şikayət edib. Düz də edib: direktor müavini məktəbi aldadıb. Amma ona ödəniş etmiş şagirdlərin nə günahı var ki, məktəb indi onlardan pul tələb edir və attestat vermir? Təsəvvür edin ki, mağazada kassirə ödəniş edirsiz, o, pulu cibinə qoyur, sonra da mağazanın yiyəsi sizdən təkrar ödəniş etməyi tələb edir!"

"DİA-AZ" xatırladır ki, bu məktəb keçmiş Ekologiya və Təbii Sərvətlər naziri Hüseynqulu Bağırova aiddir və direktoru da arvadıdır. Amma valideynlər deyir ki, direktor adətən işə gəlmir, elə müavini idarə edib həmişə məktəbi...