ZƏRDÜŞT ƏLİZADƏ YARIŞMANI MƏNƏVİYYATSIZLIQ ADLANDIRDI
DİA.AZ: - Azərbaycanda may ayında keçirilməsi nəızərdə tutulan “Evrovision-2012” müsabiqəsi yaxınlaşdıqca, bununla bağlı həyata keçirilən hazırlıq işlərinin də miqyası genişlənməkdədir. Bütün dünyanın gözünün Azərbaycanda olduğu bir zamanda müsabiqənin normal bir ortamda keçməsi üçün bütün parametrlər üzrə ciddi səy göstərən hakimiyyət, sözügedən mahnı müsabiqəsinə rəsmi Bakının Avropa qarşısında verəcəyi imtahan nəzəri ilə baxdığından, müsabiqə zamanı hər hansı bir insidentin baş verəcəyindən ehtiyat edir. Sadə vətəndaşlardan tutmuş ictimai-siyasi xadimlər, ziyalılar arasında aparılan sorğuların nəticəsi isə ölkə əhalisinin böyük bir qisminin bu müsabiqənin keçirilməsinə qarşı olduğunu göstərir. Ölkənin mədəni-siyasi elitasının böyük əksəriyyəti hesab edir ki, belə bir müsabiqənin Azərbaycanda keçirilməsi həm mənəvi, həm də maddi baxımdan ciddi itkilərlə müşahidə olunacaq. Bəzi ziyalılar isə hesab edir ki, “Evrovision”un keçirilməsi Azərbaycanda mənəvi baxımdan yeni bir dövrün başlamasına təkan verə bilər ki, bu da əxlaqi-mənəvi dəyərlərin tam olaraq tənəzzülü dövrü olacaq.
Azərbaycan Ziyalılar Birliyinin sədri Eldəniz Quliyevin sözlərinə görə, indiki şəraitdə belə bir müsabiqənin reallaşması hər şeydən öncə xalqın iradəsinə qarşı getmək, xalqla hesablaşmamaq deməkdir: “Öncə onu söyləyim ki, mən həm bir fərd kimi, həm də Azərbaycan Ziyalılar Birliyinin sədri olaraq Azərbaycanda “Evrovision”un keçirilməsinə etiraz edir, bunu narazılıqla qarşılayıram. Azərbaycanda “Evrovision”la bağlı hazırlıq işlərinin yalançı sevinc və canfəşanlıqla aparılması məni təəssüfləndirir. Bu, Azərbaycan xalqının mental şüuruna, onun milli-mənəvi və əxlaqi dəyərlər sisteminə tərs şillə kimi qəbul olunmalıdır. Mən məsuliyyət və əminliklə vurğulayıram ki, Azərbaycan xalqının böyük əksəriyyəti “Evrovision”un keçirilməsini istəmir. Artıq insanlar dərk etməyə başlayıb ki, onların mənəviyyatına təcavüz baş verir. Bu təcavüzün hakim dairələr tərəfindən təşkil edilməsi isə ikiqat faciədir”.
E.Quliyevin qənaətincə, hakimiyyət mahnı müsabiqəsinin keçirilməsi üçün fantastik miqdarda vəsait ayırıb ki, bu vəsaiti iqtisadi-sosial problemlər məngənəsində sıxılan Azərbaycan xalqının sosial tərəqqisi üçün sərf etmək mümkün idi: “Evrovision” iqtisadi baxımdan da Azərbaycan xalqının zərərinədir. Bugünə kimi dünyanın bir çox ölkələrində “Evrovision” mahnı festivalı keçirilib və bu festivala ən çox pul ayıran ölkələrdə bu göstərici 60-70 milyon dolları keçməyib. Azərbaycanda isə “Evrovision”a rəsmi şəkildə 50 milyon vəsait ayrıldığı elan edilməsinə baxmayaraq, reallıqda bu rəqəm milyardı keçir. Bu, çox qorxulu bir tendensiyadır. Bu qədər qaçqını, bu qədər problemi olan, torpaqları hələ də işğal altında olan bir ölkədə bu qədər pulu “Evrovision” kimi gərəksiz bir müsabiqəyə sərf etmək dəhşətdir”.
E.Quliyevin fikrincə, “Evrovision” homoseksualların müsabiqəsi olduğu üçün belə bir müsabiqənin Azərbaycanda keçirilməsi mənəvi baxımdan da qəbuledilməzdir: “Hər şeyi öz adı ilə çağılrmaq lazımdır. “Evrovision” “mavi”lərin, homoseksualistlərin festivalıdır. Burada söhbət sadəcə olaraq Azərbaycanın imicindən getmir. Burada söhbət Azərbaycan insanının qan nizamının dəyişdirilməsindən gedir. Bu isə görünür, kimlərinsə planı əsasında reallaşır. Kimlərsə Azərbaycan xalqının öz yolu ilə getməsində maraqlı deyil. Kimlərsə xalqın qan nizamının dəyişdirilməsinin tərəfdarıdır. Ona görə də ağlı başında olan istənilən mütərəqqi fikirli insan, hər bir sadə azərbaycanlı buna qarşı çıxmalıdır. Mən bəyan edirəm ki, əgər Azərbaycanda “qey parad” keçirilər və ya buna təşəbbüs olunarsa, o zaman hakimiyyət öz qarşısında yalnız inanclı insanları deyil, bütün ölkə ziyalılarını, əli qabarlı, alnı tərli bütün sıradan insanları görəcək və bu, ümumxalq etirazına çevriləcəkdir”.
E.Quliyev belə bir müsabiqənin baş tutacağı təqdirdə Azərbaycanda xalq-hakimiyyət qarşıdurmasının baş verəcəyini vurğuladı: “Mənim Azərbaycan siyasətində, şəxsiyyət qaleriyasında ən hötmət etdiyim insanlardan biri də Mehriban xanım Əiliyevadır. Mən çox təəssüflə qeyd edirəm ki, hörmətli xanımın bu məsələdə göstərdiyi fəallıq bizi məyus edir. Mən qeyd edirəm ki, əgər “Evrovision” bu təntənə ilə keçirilməsi baş tutsa, o zaman Azərbaycanın siyasi-mənəvi landşaftı dəyişəcək. “Evrovision”dan sonra formalaşacaq yeni landşaft isə heç də ürəkaçan olmayacaq”.
Yazıçı-publisist Mehriban Vəzir də hesab edir ki, “Evrovision” müsabiqəsi neft pullarının lüzumsuz sərfindən başqa bir şey deyil və bu konteksdə baş verənlər hakimiyyətin xalqa olan ögey münasibətindən xəbər verir: “ Bugünkü rejimin bir qərarı var və o, yalnız bu qərarın ardınca addımlayır. Bu qərar da ondan ibarətdir ki, sel kimi gələn neft pullarını dağıtsın, müəyyən inftasrtukturlara xərcləsin, amma Azərbaycan xalqına verməsin. Yəni həkim yenə də maaş adı ilə qəpik-quruş alsın, müəllim yenə də bərbad vəziyyətdə yaşasın və s. bu rejimin qərarıdır. Rejim xalqa məxsus olan bu sərvəti yağı malı kimi dağıdır. Buna görə də bu gün çəkilən yol sabah sökülür və yenidən təmir edilir. Təmir işləri başa çatandan qısa müddət sonra yenidən dağıdılır. Ən maraqlısı isə budur ki, Azərbaycanda yolların səviyyəsi dünya standartlarından bir neçə dəfə geri qalsa da, bu yoların çəkilişinə dünya standartlarından bir neçə dəfə çox pul ayrılır. Bir sözlə, xalqın sərvətini dağıdırlar. Bir sözlə, “Eurovision-2012” kimi layihələr bu sülaləyə müəyyən münasibətlər qurmağa, şöhrət qazanmağa hesablanıb”.
M.Vəzirtin bildrdiyinə görə, dünyanın heç bir yerində neft pulları Azərbaycanda olduğu qədər amansızlıqla dağıdılmır: “Norveçin neftdən gələn gəlirləri bizdən qat-qat çoxdur. Norveç Neft Fondu, hansı ki, ona yığım fondu, pensiya fondu deyirlər, hakimiyyətin həmin pulun 4%-dən artığını xərcləməyə ixtiyarı yoxdur. Qalan vəsait gələcək nəsillər üçün qorunub saxlanılır. Norveçdə neft fondu bir nəfərin əlində deyil. Orada fond parlamentin əlindədir. Azərbaycanda isə neft fondu yalnız bir nəfərin əlindədir. Azərbaycanda neft fondunun da rəhbərini, ona nəzarət şurasının da üzvlərini prezident təyin edir. Azərbaycanmda nəzarət şurasının ictimaiyyətdən olan nümayəndəsi Milli Elmlər Akademiyasının prezidentidir. Halbuki, o ictimaiyyətin nümayəndəsi sayıla bilməz. Çünki onun çalışdığı qurum dövlət tərəfindən maliyyələşən bir müəssisədir və onu da həmin müəssisəyə məhz prezident təyin edir. Ümumilikdə ölkə siyasi mədəniyyətdən tamamilə uzaq qaydalarla idarə olunur və dağıdılır. Hesab edirəm ki, baş verənlər vətəndaşa olan qərəzin nümunəsidir”.
Politoloq Zərdüşt Əlizadə isə “Evrovision”la bağlı hakimiyyətin mövqeyini mənəviyyatsızlıq kimi dəyərləndirdi: “Əhalinin böyük bir qisminin yoxsulluq səviyyəsində yaşadığı, səfalətə məhkum edildiyi bir ölkədə belə bir tədbirin keçirilməsi pulun israf edilməsindən, mənəviyyatsızlıqdan başqa bir şey deyil. Hesab edirəm ki, baş verənləri bir cümlə ilə yalnız bu cür dəyərləndirmək olar”.
Seymur Əliyev
