Keçən il redaksiyamıza ilginc bir məlumat daxil olmuşdur. Ancaq biz həmin yazını dərc etsək də onun qəhrəmanlarının adlarını açıqlamamışdıq. Bu günləri isə bu məsələ ilə bağlı bir çox yeni məlumatlar əldə etdiyimiz üçün o yazını əlavələrlə oxuculara təqdim edirik.
Etibarlı mənbədən aldığımız məlumata görə bir müddət əvvəl 1 saylı Bakı İnzibati-İqtisadi Məhkəməsinin sədri Hüseynov Müseyib Abbas oğlu Cəmilə adlı bir xanımı aldadaraq, onun 500 min manatlıq evini 260 min manata alıb. Bu azmış kimi Cəmilə xanımdan aldığı evi cəmi 50 min manata sənədləşdirərək vergidən də külli miqdarda yayınıb.
Bu barədə redaksiyamıza daxil olan sensasion iddiaya görə, aldadılan xanımın Gülarə Rəhimxan qızı Rəhimova soyadlı bacısı məhkəmə sədrinin bu əməlindən xəbər tutaraq tez xaricdən Azərbaycana qayıdıb və məsələni həll etmək məqsədilə adıçəkilən sədrlə görüşüb.
Məhkəmə sədri isə evi bacılara geri qaytarmaqdan imtina edib. Aldadılan xanımın böyük bacısı Gülarə Rəhimova sədrin bu əməllərini mətbuata çıxaracağını bəyan etdikdə isə, sədr geri addım ataraq, evi qaytaracağına vəd verib. Ancaq bacılara bildirib ki, evi bir şərtlə onlara qaytara bilər; ona başqa bir yerdə yerləşən eyni sahəsi və qarajı olan bir ev tapsınlar.Aldadılan xanımın bacısı sədrin bu şərti ilə razılaşıb. Lakin sədr sonradan fikrini dəyişərək, bacılardan onların evindən bir otaq daha böyük olan ev tələb edib.
Cəmilə xanımın bacısı Gülarə Rəhimova ilə Müseyib Hüseynov arasında yaranan ciddi mübahisə sonda məhkəmə sədrinin halının pisləşməsi ilə nəticələnib. Belə ki, Gülarə Rəhimova sədrin bu əməlini mətbuata çıxardaraq, onu ifşa edəcəyini bildirdikdə sədrin həyəcandan ürəyi gedib. Köməkçisinin yardımı ilə bir neçə dəqiqədən sonra özünə gələn sədr bacılara son həmlə edərək bildirib ki, gedin hara istəyirsiniz şikayət edin,bəs o Fövqəladə Hallar naziri Kəmallədin Heydərovun qohumudur və bu səbəbdən ona heç kim bir şey edə bilməz. Böyük bacı məhkəmə sədrinin bu əməlindən məhkəməyə şikayət edəcəyini bildirdikdə isə hörmətli məhkəmə sədri ona belə deyib: “Sən məni bir məhkəməyə verməklə heç nəyə nail ola bilməzsən. Azərbaycanda heç bir məhkəmədə məni uda bilməzsən.Çünki bu kimi məhkəmə qərarlarına mən baxıram”.
Görünür, bu günə qədər onlarla işi “öz hüquq anlayışına” uyğun həll edən İqtisad Məhkəməsinin sədri məhkəmə sistemindəki tanışlarına güvənərək ölkədə yaşayan hər kəsi aldada biləcəyini düşünür.
Qeyd edək ki, apardığımız kiçik araşdırma nəticəsində öyrəndik ki, bəhs olunan hakimin FHN rəhbəri K.Heydərovla heç bir qohumluq və tanışlıq əlaqəsi yoxdu, o sadəcə nazirin adından istifadə edir.
Qeyd edək ki, bəhs etdiyimiz 1 saylı Bakı İnzibati-İqtisadi Məhkəməsinin sədri ilə əlaqədar redaksiyamıza bir çox yeni məlumatlar daxil olub,ancaq oxucunu yormamaq üçün onlar haqda gələn yazımızda danışacayıq.Bircə onunla kifayətlənək ki, Müseyib Hüseynov adı bundan əvvəl də qalmaqallı məhkəmə işlərində çıxardığı ədalətsiz qərarlarla mətbuatda dəfələrlə hallanıb ki,bu da onun ədalətli insan olmasına şübhə ilə yanaşmağa imkan verir.
Məsələn, Gundelik-baku.com saytının 2011 –ci il yanvarın 24-də dərc olunmuş “1 saylı Baki İnzibati-İqtisadi Məhkəməsindən ədalətsiz qərar” məqaləsində qeyd edilir ki, Almaniya vətəndaşı Monira Fazelian bir müddət öncə investor hüquqları pozulduğundan “1 saylı Baki İnzibati-İqtisadi Məhkəməsinə müraciət etmək məcburiyyətində qalıb. Belə ki,Almaniyanın "Az-Saks KST LTD" şirkəti 2007-ci ildə Azərbaycanda, Bakı-Sumqayıt yolunda zavod açıb, Monira Fazelian isə onun həmtəsisçilərdən biri olub. Sonradan isə o müəssisəyə direktor təyin olunub. Lakin bir müddət sonra bir sıra şəxslər tərəfindən ona qarşı qanunsuzluq,haqsızlıq edilib və Monira Fazelian direktor ola-ola müəssisəyə buraxılmayıb.Uzun sözün qısası 1 saylı Baki İnzibati-İqtisadi Məhkəməsində "Afina" MMC ilə "Az-Saks Beton LTD" MMC arasında qalmaqallı məhkəmə prosesi keçirilib. Nəticədə Müseyib Hüseynovun sədrlik etdiyi məhkəmədə "Az SAKS Beton LTD"nin zəruri sənədlərə malik olmasına əhəmiyyət verilmədən "Afina" MMC-nin xeyrinə qərar qəbul edib. Və bununla da xarici investorları Azərbaycandan, onun məhkəmə orqanlarından və qanunlarından narazı salıb. Gundelik-baku.com bildirib ki,hakimlər bu cür hərəkətlərilə Azərbaycanı beynəlxalq aləmdə biabır edirlər. Görəsən, onlar bunun fərqinə varmırlar?...
Musavat.com-un 12 Aprel 2009-cu il tarixdə dərc etdiyi “İş adamını kürəkəninin adı ilə şantaj edirlər”məqaləsində isə Müseyib Hüseynovla bağlı digər qalmaqallı bir məhkəmə prosesindən bəhs edilir.Bildirilir ki,məhkəmə sədri başqasının mülkünü ələ keçirən saxtakarların tərəfini tutub. A.R.Ko” MMC-nin rəhbəri,iş adamı Asif Əsədullazadənin İqtisad Məhkəməsində üzləşdiyi qanunsuzluq və açıq rüşvətxorluq barədə mətbuatda çox yazılıb. Xatırladaq ki, Asif Əsədullazadə birgə iş gördüyü “Badi Kubə" MTK-nın rəhbərliyi tərəfindən aldadılaraq külli miqdarda ziyana düşüb.Belə ki, "Badi Kubə" MTK-nın rəhbərliyi "A.R - Ko" MMC-nin blankını saxtalaşdıraraq Bakı Şəhər İcra Hakimiyyətinə müraciət edib.
Həmin saxta müraciətdə "A.R- Ko" MMC-nin tikinti aparılan torpaq sahəsindən "Badi Kubə" MTK-nın xeyrinə imtina etməsi göstərilib. Bakı Şəhər İcra Hakimiyyəti isə öz növbəsində, həmin saxta müraciəti əsas tutaraq "A.R - Ko" MMC-yə məxsus 40 sot torpaq sahəsini "Badi Kubə" MTK-ya verib" Bu məsələdən xəbər tutan A.Əsədullazadə 1 saylı yerli İqtisad Məhkəməsinə müraciət edərək “Badu-kubə” MTK-ya BŞİH-dən saxtalaşdırılmış sənədlərə əsasən verilmiş sərəncamın etibarsız sayılmasını, əvvəlki sərəncamın bərpasını istəyib. A.Əsədullazadə deyir ki, işə baxan hakim Tahirə Əsədovanın iddiaya obyektiv baxacağını zənn etsə də sonradan bunun tam əksini görüb.
Məhkəmə sədri Müseyib Hüseynov isə iddiaçıya deyib ki, qarşı tərəf çox “hörmət” etdiyindən onun iddiasını təmin edə bilməyəcək.Məhkəmədə rastlaşdığı hüquqi “bespredel”in şiddəti həm də şair kimi tanınan A.Əsədullazadəni o qədər təsirləndirib ki, o, qələminə güc verməyə məcbur olub. A.Əsədullazadə O, öz kitabında İqtisad Məhkəməsinə “tərif” də verib: “İqtisad Məhkəməsi - iş adamlarının və ya şirkətlərin bir-birinə külli miqdarda ”atan"dan sonra “atan” tərəfin dələduzluq əməlini qanuni şəklə salan bir qurumdur".
Yazımızın əsas mövzusuna qayıdaraq onu bildirək ki,bütün deyilənlərə rəğmən biz inanırıq ki,aldadılan Cəmilə və Gülarə adlı xanımların problemi bizim bu barədə ikinci yazımız dərc olunanacan öz həllini tapacaq.
Onu da qeyd edək ki, hörmətli Gülarə xanım Bakı şəhərində tanınmış biznesmen ,iş adamlarından biridir,həmçinin «Eurovision-2012» mahnı müsabiqəsinin milli seçim turunun yarımfinal iştirakçısı olmuş müğənni Orxan Kərimlinin anasıdır.
Onu da bildirək ki, 1 saylı Bakı İnzibati-İqtisadi Məhkəməsin sədri Müseyib Hüseynov tərəfindən aldadılan bacıların hüquqlarını müdafiə edən vəkil məsələnin mətbuata çıxacağını bildikdə bacıların müdafiəsindən imtina edib. Lakin haqlı bir adamı mətbuata müraciət etdiyi üçün müdafiə etməkdən imtina edən vəkilin hüququn aliliyini necə kölgə altına salması isə başqa bir yazının mövzusudur.
Sənan /Qafqaznews.az/
