Azərbaycan Respublikası Hesablama Palatasının “Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyətində apardığı auditin nəticələrini açıqlamasından, aşkar edilmiş çoxsaylı hüquq pozmalarda cinayət tərkibi əlamətlərinin ehtimal olunması nəzərə alınmaqla müvafiq materialların Azərbaycan Respublikasının Baş Prokurorluğuna göndərilməsinə dair qərar qəbul etməsindən sonra Səhmdar Cəmiyyətin sədri Sahil Tahirlinin fəaliyyəti və kimliyi ciddi maraq yaradıb.
2013-cü ildən Naxçıvan teleradiosuna rəhbərlik edən Sahil Tahirli bu quruma ondan əvvəl rəhbərlik edənlərdən qat-qat bahalı həyat tərzi yaşayıb. O, qısa müddət ərzində Naxçıvan şəhərində bir neçə ev, bahalı avtomobillər alıb, Şahbuz rayonunun Kükü kəndində villa tikdirib.
Sahil Tahirli üçün şəxsi maraq hər zaman ön planda olub. Bunu onun tez-tez mövqeyini dəyişməsi, şəxsi maraqlarını təmin edə bilməsi üçün atdığı addımlar sübut edir.
Sahil Tahirli aşağı balla Bakı şəhərindəki Xəzər Universitetinə qəbul olunub. Həmin dövrdə həmkəndliləri və yaxın əlaqələri olan Sərdar Cəlaloğlunun köməkliyi sayəsində “Hürriyyət” qəzeti ilə əməkdaşlıq edib. Yenicə qələm tutmağı öyrənən Tahirli burada Ulu Öndər Heydər Əliyevin, Azərbaycan iqtidarının əleyhinə yazılar yazıb. Hər halda həmin dövrdə “Hürriyyət”də işləyənlər belə deyir. Bizə göndərilən yazıların Sahil Tahirlinin məqalələri olduğu iddia olunur. Belə deyilsə, cənab Tahirli bu məsələyə aydınlıq gətirər.
Yaxşı futbol oynadığı üçün Naxçıvan Dövlət Universitetinin ovaxtkı rektoru İsa Həbibbəyli onu bu ali məktəbə köçürüb. Bir müddət NDU-nun komandasında futbol oynayıb. Uzun illər sonra həbs olunmasında xüsusi rol oynadığı tələbə yoldaşının dəstəyi, tövsiyəsi, doğru yol göstərməsi ilə mövqeyini dəyişib, Yeni Azərbaycan Partiyasına üzv olub.
O, tələbə olduğu dövrdə əvvəlcə “Şərq qapısı” qəzetində çalışıb, Naxçıvan Ali Məclisinin sabiq sədri Vasif Talıbovun fotoqrafı olub.
2006-2007-ci illərdə Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsində məsləhətçi, 2007-ci ildən 2011-ci ilədək Naxçıvan Muxtar Respublikasının Televiziya və Radio Şurasının sədri vəzifələrində çalışıb.
2011-ci ildə Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri təyin edilib. 2013-cü ildən isə Naxçıvan teleradiosunun rəhbəridir.
Sahil Tahirli bu dövrdə özünü Vasif Talıbovun ən sədaqətli adamlarından biri kimi tanıda bilib və sabiq sədr tərəfindən dəfələrlə mükafatlandırılıb. Vasif Talıbov ona o qədər inanır və etibar edirdi ki, onu Yeni Azərbaycan Partiyası Naxçıvan Muxtar Respublika Təşkilatının Siyasi Şurasının üzvü seçdirmişdi. Halbuki, media orqanının rəhbəri kimi Tahirlinin YAP-ın Siyasi Şurasının üzvü olması məqsədəuyğun deyildi.
Naxçıvan teleradiosuna rəhbərlik etdiyi dövrdə Vasif Talıbovla bağlı silsilə mədhiyyələr yazan Sahil Tahirli Naxçıvanın sabiq rəhbərinin fəaliyyətindən bəhs edən “Yaratmaq amalı” kitabını çap etdirib. Sahil Tahirliyə xüsusi simpatiyası olan Vasif Talıbov onun bu kitabının ali məktəblərdə dərs vəsaiti kimi istifadə olunması barədə tapşırıq vermişdi.
Sahil Tahirli “Yaratmaq amalı” kitabında yazır: “Şəxsən mənim ötən 25-30 ildə gördüyüm və dərk etdiyim sadə həqiqət budur ki, cənab Ali Məclis sədrinin vətənçilik, dövlətçilik fəlsəfəsi öz təsdiqini real və konkret işlərdə, muxtar respublika əhalisinin rahat və firəvan yaşayışında tapıb.
Sözsüz ki, cənab Vasif Talıbovun 60 illik yubileyinə ən dəyərli hədiyyə onun qazandığı sonsuz xalq sevgisidir. Bu gün hər bir naxçıvanlının qəlbində cənab sədrə sonsuz sevgi var... Bu sevgi illər, qərinələr, əsrlər keçdikcə daha da artacaq... Çünki bu sevginin təməlində vətənpərvərlik dayanır, yenidən qurulan Naxçıvan dayanır, rahat yaşayış, firəvan həyat, sabitlik və ən nəhayət elə insanlara, bütün naxçıvanlılara olan sonsuz sevgi dayanır.
Ali Məclisin sədri həm də sağlığında özünə ikinci ömür qazanan şəxsiyyətlərdəndir. Çünki hörmətli sədrimizin bütün fəaliyyəti Azərbaycanda, onun ayrılmaz hissəsi olan Naxçıvan Muxtar Respublikasında cərəyan edən mühüm siyasi, ictimai və mədəni proseslərlə sıx bağlı olub. Azərbaycan xalqının ümummilli lideri Heydər Əliyev kimi onun siyasi kursunu uğurla davam etdirən Azərbaycan Respublikasının Prezidenti İlham Əliyevin, Naxçıvan Muxtar Respublikası Ali Məclisinin sədri Vasif Talıbovun da adı həmişə intibah tariximizlə qoşa çəkiləcəkdir”.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfliyə qısa xatırlatma. Yəqin ki, Fuad Nəcəfli bu vəzifəyə təyin olunduqdan sonra Naxçıvanın dövlət orqanlarının rəhbərləri ilə keçirilən ilk görüşü xatırlayır. Vasif Talıbovla bağlı yuxarıdakı sözlərin müəllifi olan Sahil Tahirli israrla söz alaraq, illərdir ki, “boğulduqlarını”, Nəcəflinin onların xilaskarı olduğunu bildirmişdi.
Yəni, Sahil Tahirli bu dəfə də mövqeyini dəyişmişdi.
Həmin Sahil Tahirlinin rəhbərlik etdiyi Naxçıvan teleradiosu onun tapşırığı ilə Vasif Talıbovun dövründə görülən, özünün yazılarında yerə-göyə sığdırmadığı işləri qamçılamağa başlayır.
Naxçıvan televiziyasında 2023-cü ilin may ayında efirə verilən süjetdə deyilir: “Milyonlarla manat vəsait hesabına tikilən Naxçıvanın su-kanalizasiya sistemləri yarım saat ərzində iflic vəziyyətə düşdü. Bu sistemlər tam keyfiyyətli və standartlara uyğun tikilib istismara verilsəydi, yağış suları asanlıqla Araz çayına axıdıla bilərdi.
Naxçıvan Perinatal Mərkəzinin inzibati binası, Naxçıvan Dövlət Universitetinin bir sıra tədris korpusları, bir neçə ilə dəbdəbə və şan-şöhrətlə tikilən Naxçıvan Palasın binalarındakı mənzərələr bir daha təsdiq edir ki, Naxçıvanın memarlıq və tikinti sektorunda görülən işlərdə kifayət qədər keyfiyyətsizliyə və məsuliyyətsizliyə yol verilib.
Xülasə, Naxçıvan televiziyası keyfiyyətsiz işləri, 1 ilə dağılan məktəb və digər sosial obyektlərin “şapalaqla üz qızardılan” tikilişini tənqid edəndə cavab bu idi: “Naxçıvana nə yağış yağır ki guya", ya da "Sizə aid məsələ deyil, öz işinizlə məşğul olun”. Bugünkü leysan və doludan sonra tək Naxçıvana yox, həm də sizin gördüyünüz işlərə yağış yağdı. Pis çıxmasın, qəşəng islandınız... Göydən 3 alma düşdü...”.
Adam nə qədər riyakar olar. Axı Sahil Tahirlinin “Yaratmaq amalı” kitabında şapalaqla üz qızardılan tikililərdən, 1 ilə dağılan sosial obyektlərdən söhbət getmir.
Teleradio rəhbərinin həmin kitabından daha bir iqtibas: “Bu gün kənardan baxıldığında olduqca cazibədar və müasir inkişaf səviyyəsində görünən Naxçıvanın məhz bu mürəkkəb coğrafiyada böyük uğurlara imza atması heç kimə asan görünməməlidir... Məhz Ali Məclis sədrinin müasir dövrün görkəmli dövlət xadimi səviyyəsinə yüksəlməsinin də kökündə bu mühüm amillər dayanır”.
Göründüyü kimi, Sahil Tahirli Vasif Talıbovun Naxçıvanda həyata keçirdiyi işləri yüksək qiymətləndirib, onu görkəmli dövlət xadimi səviyyəsinə qaldırıb. Sahil Tahirlinin bugünkü fəaliyyəti göstərir ki, o, Vasif Talıbova xidmətdə də, onun barəsində yazdıqlarında da səmimi olmayıb. Elə bu gün də səmimi deyil. Fuad Nəcəflinin gözünə girmək, vəzifəsini qoruyub saxlamaq üçün vaxtilə təriflədiyi işləri bu gün aşağılayaraq tənqid edir. Tam əminliklə deyirik ki, Fuad Nəcəfli vəzifəsindən azad olunanda onu birinci tənqid edənlərdən biri məhz Sahil Tahirli olacaq.
Başqa bir misal. Talıbovun istefasından sonra Sahil Tahirli Naxçıvan televiziyasında tarixi abidələrin bərpa adı altında məhv edildiyi ilə bağlı süjet yayımladı.
Həmin videomaterialda qeyd olunub ki, Culfa rayonunun Gülüstan kəndində yerləşən XII əsrə aid dünya əhəmiyyətli türbə, Qazançı kəndindəki XVII əsrə aid eyniadlı körpü belə abidələrdəndir. Türbə 2015-cı ildə, körpü isə 2018-ci ildə "bərpa edilib":
“Memarlıq-konstruktiv quruluşuna görə türbə tipli digər memarlıq abidələrindən fərqlənən Gülüstan türbəsi orta əsr Azərbaycan memarlıq abidələri içərisində özünəməxsus yer tutur. Lakin türbənin bərpa adı altında memorial görünüşü məhv edilib, inşasında istifadə olunan daşlar boyanaraq tarixi görkəminə xələl gətirilib.
Böyük İpək Yolunun üzərində yerləşən Qazançı körpüsünün üzərindən əsrlər öncə Şərq istiqamətində uzanan və Ordubad ərazisində əsas yola birləşən karvan yolları keçib. Qazançı körpüsü Azərbaycanın biraşırımlı körpülərinin ən yaxşı nümunəsi sayılır. Lakin hazırda kim deyər ki, bu memarlıq abidəsi özündə yüzilliklərin izini daşıyır? İndi körpüyə nəzər saldıqda tarixin deyil, daha çox müasirliyin izlərini görürük”.
Halbuki Sahil Tahirli “Yaratmaq amalı” kitabında Vasif Talıbovun tarixə dəyər verdiyini, tarixi yaşatdığını yazıb:
“Tarix çox hökümdarlar, liderlər yola salıb. Amma onların heç də hər biri günümüzdə yaşamır və sevilmir. Yalnız tikənlər, quranlar, xalqı, vətəni üçün yaradanlar əbədiyaşarlıq qazanırlar. Bu mənada ötən bu illər Naxçıvanın həm də yeni dövrdəki quruculuq tarixinə çevrildi. Qədim abidələrə ikinci həyat verilməklə bərabər, müasir dövrün də yüzlərlə, minlərlə abidəsi tikilib quruldu. Tariximizi və mədəniyyətimizi yaşadıb təbliğ edən onlarla muzey yaradıldı”.
Onu tələbəlikdən yanında işlədib formalaşdıran, ona yüksək vəzifələr verən, həyatda sahib olduğu hər şeyi borclu olduğu, hətta haqqında aşağıdakı şeiri yazdığı Vasif Talıbovu yerdən-yerə vuran Sahil Tahirli görün Fuad Nəcəfliyə nələr edər.
95-dən başlayır bu dastanın tarixi…
Yazanın biləyində bir polad qüvvəsi var,
Yazanın ürəyində Qorqud nişanəsi var.
Yaratdıqca ucalır,
Ucaldıqca daha yaxşı yaradır!
Qibləsi Əshabi-Kəhf, Məkkəsi Naxçıvandır,
Qətiyyəti sel qədər, cəsarəti ümmandır…
Körpü tikir, yol salır,
Ordu qurur, Günnüt kimi kənd alır,
Anamız Naxçıvanı kərpic-kərpic ucaldır!
Tarixə dəyər verir və tarixi yaşadır!
Ulu öndər yoluna sədaqət rəhnidir O,
Torpağa saf sevginin kitabı, mətnidir O.
Öncə Vətən, öncə yurd:
Məramının ilkidi,
Naxçıvan ürəyidi,
Məqamının ilkidi!
Bir vaxt yolları bağlı,
Qolu bağlı Naxçıvan
Tənha, yalqız adadan dönübdü
Nur selinə, işığa bələnibdi,
Arazın sahilində yanıb, şölələnibdi.
Budur, yenə bir an da boşa vermir Naxçıvan…
Əlincə daşlarından, Haçadağ vüqarından
Güc aldıqca güc alır…
O Vasif Talıbovdu-
Naxçıvan torpağında
Yeni tarix yaradır!!!
Adamı sadəcə heyrət bürüyür. Bu yazıların, şeirlərin müəllifi birdən-birə necə dəyişilə, Vasif Talıbovu necə yaramaz adlandıra bilər. Üstəlik Talıbov ona şəxsi mənada heç bir pislik də etməmişdi. Onun nə əmlakını əlindən almışdı, nə də həbs eləmişdi. Sahil Tahirli son ana qədər Vasif Talıbovun “gəmisindən” enmədi. Bəlkə də hesab edirdi ki, Talıbov getməyəcək. Talıbov getdi, Sahil Tahirli isə…
Onun Naxçıvanın yeni rəhbərliyi barədə yazılarını və şeirlərini səbirsizliklə gözləyirik. Əşi, Talıbovla bağlı şeirlərə və yazılara bir az əl gəzdirsin, dərc etdirsin. Onun üçün nə fərqi var ki…
Naxçıvan teleradiosundakı qanunsuzluqlar, Tahirlinin bu qurumdakı fəaliyyəti barədə növbəti yazılarda ətraflı məlumat verəcəyik. Növbəti yazının adını və mövzusunu elə indidən elan edə bilərik: “Halal” yolla alınan “Haval”.
P.S. Gərək həyatda elə yaşayasan və işləyəsən ki, sonra səni 5 qəpiklik adam kimi tanımasınlar.
TNS
