Xəbər verdiyimiz kimi, “AEF Group” şirkəti Ağdərə rayonunun Həsənriz kəndində 98 fərdi yaşayış evində təmir işləri aparacaq. Məlum olub ki, müqavilənin maliyyə dəyəri 5 347 341,38 manatdır. Bu isə o deməkdir ki, bir evin təmiri orta hesabla 54 564 manata başa gələcək. Bir evin qeyd olunan məbləğə təmir edilməsi məsələsi ictimaiyyətdə birmənalı qarşılanmayıb. Vətəndaşlar deyirlər ki, o məbləğə yeni ev tikmək olar.
İşğaldan azad edilmiş ərazilərdə belə hallar barədə vaxtaşırı xəbərlər yayılır. Vəsaitin şişirdilməsi, tikilən evlərin keyfiyyətsiz olması barədə müzakirələr gedir.
Globalinfo.az-a danışan əmlak məsələləri üzrə ekspert Ramil Osmanlının sözlərinə görə, adıçəkilən şirkət ərazidə daha öncə də bir neçə tenderin qalibi olub.
O deyib ki, 2024-cü ilin sonlarında da 90 evin təmiri ilə bağlı keçirilən tenderdə məhz “AEF Group” şirkəti qalib gəlib:
“Qeyd olunan rəqəmlərin nə dərəcə reallığı əks etdirməsi məsələsini tam şəkildə təhlil etmək üçün əlimizdə konkret rəqəmlər olmalıdır. 98 evin ölçülərini bilmədiyimizə görə, indiki halda hər ev üçün ayrılan 54 mindən artıq vəsaitin real olub-olmadığını söyləmək çətindir. Məsələn, Bakı şəhərində bazarda populyar olan o sahə üzrə ixtisaslaşmış şirkətlər var ki, onlar mənzil və fərdi yaşayış evlərində təmirlə bağlı müəyyən paketlər açıqlayırlar. Həmin paketlərə ekonom sinifdən başlayaraq premium və daha üst sinfə qədər paketlər daxildir. Orada 1 kv/m sahənin təmiri üçün tələb olunan rəqəmlər 300 manatdan 1000 manata qədər dəyişir. Amma indi nəzərə almaq lazımdır ki, burada söhbət regionda aparılan işlərdən gedir. Oradakı işlərin aparılması üçün tələb olunan material, logistika və hətta işçilik xərcləri Bakı şəhərindən fərqlənir. Bu mənada Qarabağda aparılan təmir səviyyəsini görmədən fikir söyləmək doğru olmaz”.
Ramil Osmanlı həmin şirkətə uğurlar arzu edib:
“Ümid edirəm ki, onlar ən azı bu gün Azərbaycan tarixini düşünürlər. Çünki o torpaqların hansı formada işğaldan azad olunduğunu yaxşı bilirik. Gələcəkdə tikinti şirkətlərinin işğaldan azad olunmuş ərazilərimizdə quruculuq işlərində iştirakı tarixə düşəcək. Bu səbəbdən də onlar tarixə yaxşı mənada düşməlidirlər”.
Qeyd edək ki, işğaldan azad edilən ərazilərdə həyata keçirilən layihələrlə bağlı narazılıq ilk belə hal deyil. Bundan öncə Cəbrayıl, Laçın, Zəngilan və Qubadlıda aparılan tikinti-təmir işləri də müzakirə və mübahisə yaratmışdı.
