Bakı şəhər sakini Həsənov Rəşad Nadir oğlu tərəfindən “Hürriyyət”in redaksiyasına şikayət məktubu daxil olub. Şikayətçi qəzetimiz vasitəsilə Prezident İlham Əliyevə müraciət edir:

“Cənab Prezident!

Mən, Həsənov Rəşad Nadir oğlu, yazaraq bildirirəm ki, 43 yaşım var, ali təhsilliyəm, 20 ilə yaxındır SOCAR-da mühəndis vəzifəsində çalışıram.

Bu gün Dövlət Sosial Müdafiə Fondunda 110 min manata yaxın vəsaitim yığılıb. Bu vəsaitin orda qalmağının mənim kimi əziyyət çəkən vətəndaşlara xeyri yoxdur. Çox sıxıntılarım var. Ailə başçısıyam, amma ailəmi rahat şəkildə yaşada bilmirəm.

Çarəsizlikdən “DOST” Mərkəzinə müraciət etdim. Bildirdim ki, mənim sosial fondumda 110 min manat pulum var. Xahiş etdim ki, bunun bir hissəsi hesablanıb mənə verilsin. Fikirləşirdim ki, banklara olan kredit borclarımı və digər borclarımı ödəyərəm. “DOST” Mərkəzindən bildirdilər ki, “sən həmin puldan 65 yaşında istifadə edə bilərsən”.

65 yaşa kimi ailəmi necə donduracağımı fikirləşirəm. Bəlkə heç həmin yaşa çata bilmədim?! Dedilər ki, bu zaman həmin vəsait həyat yoldaşınıza veriləcəkdir. Sual verdim ki, bəlkə o, məndən tez rəhmətə getdi?.. Bu zaman isə bildirdilər ki, əlil övladınız varsa, ona veriləcək, övladın əlil deyilsə, batacaq.

Bir sözlə, biz vətəndaşlara qarşı bu qədər haqsızlıq edirlər. Əmək və Əhalinin Sosial Müdafiə Nazirliyi bizim kimi ehtiyacı olan vətəndaşlara qənim kəsilib.

Misal olaraq bildirim ki, iş yoldaşım 30 ildən çoxdur dənizdə çalışırdı. 65 yaşında çatmadan rəhmətə getdi. Sosial fondda 200 min manatdan çox vəsaiti var idi. Həmin vəsaitdən onun ailəsinə 1 qəpik belə verilmədi. Sadəcə, Həmkarlar İttifaqından onun ailəsinə 70 min manat ödəniş etdilər. Bu, haqsızlıq deyilmi?!

Cənab Prezident!

Mənim vəziyyətimdə olan insanlar adından Sizdən xahiş edirəm. Nazirliyin insanlara etdiyi zülmün qarşısını alın. İndiki zəmanədə borc-xərc insanı çox yaşamağa qoymur. Tapşırıq verin, insanların sosial fonduna yığılan vəsait onlara verilsin.

Biz Sizə güvənirik, inanırıq. Sizdən kömək gözləyirik. Xahiş edirik, bu məsələ Milli Məclisdə müzakirəyə çıxarılsın, müvafiq qərar qəbul edilsin. Biz ölmədən öz şəxsi pulumuzdan istifadə etmək istəyirik”.