Məlum olduğu kimi, kənd təsərrüfatı təyinatlı torpaq sahələrində yanacaq doldurma məntəqələrinin tikintisi və istismarı qanunvericiliyin müəyyən etdiyi tələblərə tabedir. Buna baxmayaraq, təqdim etdiyimiz ünvanda “Lukoil” nişanı altında fəaliyyət göstərən yanacaq doldurma məntəqəsinin kənd təsərrüfatı təyinatlı torpaq sahəsində inşa edildiyi iddia olunur.

İddialara görə, obyekt Mirzəyev Elman Əbülfəz oğluna məxsus torpaq sahəsində tikilib və hazırda fəaliyyət göstərir. Bu isə bir sıra ciddi suallar yaradır.

Bundan əlavə, obyektin qeyri-yaşayış təyinatlı çıxarışı varmı? Əgər yoxdursa, illərdir hansı hüquqi əsasla fəaliyyət göstərir?

Əgər bu yanacaq doldurma məntəqəsi dövlət vergi sistemində qeydiyyatdadırsa, yanacaq təminatı alır və açıq şəkildə fəaliyyət göstərirsə, onun hüquqi əsasları da ictimaiyyətə açıqlanmalıdır. Əks halda, aidiyyəti dövlət qurumları qanunvericiliyin tələblərinin pozulub-pozulmadığını araşdırmalı və buna hüquqi qiymət verməlidirlər.

Sonda onu da qeyd edək ki, apardığımız araşdırmalar zamanı Mirzəyev Elman Əbülfəz oğlunun adı ilə əlaqələndirilən digər yanacaq doldurma məntəqələri barədə də məlumatlar əldə etmişik. Belə ki, əldə etdiyimiz məlumatlara görə, həmin yanacaq doldurma məntəqələrindən yaşayış və kənd təsərrüfatı təyinatlı torpaq sahələrində yerləşdiyi, həmçinin bəzi obyektlərin qanunvericiliklə tələb olunan sənədlərə malik olmadığı iddia olunur. Hazırda bu məlumatların dəqiqləşdirilməsi və müvafiq sənədlərlə yoxlanılması istiqamətində araşdırmalarımız davam edir.

Qanun hamı üçün eynidirsə, səsləndirilən iddialar doğrudursa, bu obyektlərin arxasında kim durur? illərdir hansı hüquqi əsasla fəaliyyət göstərirlər?

Növbəti araşdırma yazılarımızda bu obyektlərlə bağlı əldə etdiyimiz sənədləri, faktları, aidiyyəti dövlət qurumlarının və qarşı tərəfin mövqeyini ictimaiyyətə təqdim edəcəyik.

Araşdırmamız davam edir.

"DİA-AZ"