Naxçıvan Muxtar Respublikasının Mədəniyyət Nazirliyi tərəfindən Ordubad şəhərində yerləşən “Ərbabın İş Yeri” və tarixi binanın əvvəlki vəziyyətinə qaytarılması və əsaslı təmir işləri ilə bağlı elan olunan tender ləğv olunub.

"DİA-AZ"ın məlumatına görə, tenderin ehtimal olunan qiyməti 2 milyon 546 min 864 manat 80 qəpik təşkil edirdi. Müsabiqə 3 mart 2025-ci il tarixində saat 13:57-də elan olunmuş, təkliflərin qəbulunun son müddəti isə 11 aprel 2025-ci il saat 16:00 olaraq müəyyən edilmişdi. Həmin tarixdə zərflərin açılışı da nəzərdə tutulmuşdu.

Lakin rəsmi açıqlamada iddia olunur ki, tender qanunvericiliyin 36.1.1-ci maddəsinə əsasən ləğv edilib. Həmin maddəyə əsasən, satınalmada iştirak etmək üçün təklifi və təklifin təminatını təqdim etmiş, tələb olunduğu halda müvafiq lisenziyaya və ya icazəyə malik olan təchizatçıların sayı üçdən az olduqda, tender proseduru həyata keçirilmir və müsabiqə ləğv edilir.

Amma "DİA-AZ"ın əldə etdiyi məlumatda qeyd olunur ki, əslində sözügedən tender məhz MR rəhbərliyi ilə Naxçıvan mədəniyyət nazirliyi arasında anlaşma olmaması səbəbindən baş tutmayıb. Mənbə iddia edir ki, konkret olaraq Fuad Nəcəfli tenderin icrasını durdurub: "Yəqin ki, bu məsələ Bakıda oturanların da diqqətini cəlb edəcək... Fuad Nəcəfli işin icrası üçün özünə yaxın şirkətin qalib elan olunmasına çalışır. Amma nazirlik hələlik buna müqavimət göstərir, amma hara qədər..."