Dostum, filosof Taleh Şahsuvarlı yazır: “Valideynlərin böyük hissəsi məktəbi əsas öyrənmə məkanı kimi deyil, imtahana qədər formal mərhələ kimi görür. Ali məktəblərə qəbul üçün hazırlıq məktəbdən kənarda gedir.Mənim qənaətim budur ki, bu qara bazarın əsas institusional istehsalçısı Dövlət İmtahan Mərkəzidir. DİM Azərbaycanda məktəbin nüfuzunu zəiflədən və şagirdləri qara təhsil bazarına daşıyan əsas katalizatordur”.

Həqiqətənmi belədir? Əslində ibtidai sinif şagirdi də bilir ki, Azərbaycan təhsilində “Qara bazar”ın yaradıcısı “Yaşıl bazar”ın yanında yerləşən nazirlikdə oturan Emin Əmrullayevdir. Repetitorluğun geniş şəbəkələşməsinin baiskarı odur və bu hərakatı var gücü ilə genişlənməsinə şərait yaradır. Bu yaxınlarda keçirdiyi mətbuat konfransında o, repetitorluğu açıq-aşkar dəstəklədi. Dövlət İmtahan Mərkəzinin bu işdə marağının olmamasını hamı bilir. DİM bu xidmətdən istifadə edənlərin və etməyənlərin biliklərini qiymətləndirir. Repetitorluq valideyinlərin büdcəsini dağıdır, insanları yoxsulluğa sürükləyir. Əmrullayev isə yoxsul və varlıların övladlarının təhsil göstəricilərini müqayisə edir. Orta məktəblər bilik və tərbiyə etmək funksiyasını itirdiyinə görə valideyinlər uşaqlarının geyimindən, qidalanmasından, istirahətindən kəsib Əmrullayevin “qara bazara” yönəldirlər.

Orta məktəblərdə sinif otaqlarını repetitorluq üçün icarəyə Məleykə Abbaszadə verir? Bəlkə belədir, biz bilmirik?

“Qara bazar”ın mərkəzi isə Təhsil institutudur. Milyonlarla manatlıq tenderlər və qrant layihələri dostluq, tanışlılq, qohumluq əlaqələri olanlara peşkəş edilir. Bazar olsun!

Bəs bazar adamlarını təhsil sistemində yüksək vəzifələrə kim gətirib?

E. Əmrullayev Məktəbəqədər və Ümumtəhsil üzrə Dövlət Agentliyində ümumtəhsil şöbəsinin müdiri vəzifəsinə (sonra Agentliyin rəhbərinin müavini oldu) "Azərşəkər" MMC də satış meneceri işləmiş Arslan Hacıyevi, Ümumtəhsil siyasəti şöbəsinə isə Bakı Beynəlxalq Dəniz Ticarət Limanının əməkdaşı olmuş Çapay Məmmədovu təyin edib.

Bu harasıdır…

Emin Əmrullayev Elm və təhsil nazirliyində təhsilin iqtisadiyyatı şöbəsinə müdir vəzifəsinə təyin etdiyi İlqar Bayramlı Ağsu rayonunda "Azgranata" MMC-də Maliyyə departamentinin direktoru vəzifəsində işləyib. İndi Dövlət Peşə Agentliyinin rəhbəridir.

Təhsil institutuna direktor müavini təyin olunan Kənan Kərimli "Astaraçay" MMC-də şöbə müdiri vəzifəsində işləyib.

Təhsil İnstitunda Qiymətləndirmə, Təhlil və Monitorinq Mərkəzinə direktor təyin olunan İbrahim Baxışlı "Azgranata" MMC-də Proqnozlaşdırma və təhlil şöbəsinin müdiri vəzifəsindən təhsil sisteminə adlayıb.

Bunların sayəsində 15 yaşlı Azərbaycan məktəbliləri PISA 2025: Elm üzrə sıralamada 67-ci yerdə, Riyaziyyat üzrə sıralamada 70-ci yerdə, Oxuyub - anlama üzrə sıralamda 69-cu yerdə qərarlaşıb.