Bakıda bir nəfərin ölümü, digərinin ağır xəsarət alması ilə nəticələnən səs-küylü yol qəzasına görə məhkum edilən "Arzum" ləqəbli tiktoker İlduzə Hacıyevanın apellyasiya şikayəti verməsi işi yenidən ictimai müzakirələrin mərkəzinə gətirib. Bir tərəfdə gənc ailənin faciəsi, digər tərəfdə isə 4 azyaşlı övlad anası olan sosial media fenomeninin cəzanın ağır olduğunu bildirən müdafiə tərəfi dayanır. İndi isə əsas sual budur: qəzanın bütün səbəbləri və nəticələrə təsir edən bütün amillər birinci instansiyada tam araşdırılıbmı?

Hadisə necə baş verib?

Qəza 2025-ci ilin iyun ayında Xəzər rayonunun Mərdəkan qəsəbəsində gecə saatlarında baş verib.

İstintaqın qənaətinə görə, "Changan" markalı avtomobili idarə edən İlduzə Hacıyeva sola dönmə manevri edərkən arxadan gələn "Mercedes" markalı avtomobilə yol verməyib. Nəticədə "Mercedes" idarəetmədən çıxaraq yol kənarındakı maneəyə çırpılıb və bir neçə dəfə aşıb.
Hadisə nəticəsində avtomobilin sürücüsü, 29 yaşlı Amal Məlikov həyatını itirib, həyat yoldaşı Sənubər Muradova isə ağır xəsarətlər alıb.

İstintaq həmçinin İlduzə Hacıyevanın hadisə yerini tərk etdiyini müəyyən edib. Ona Cinayət Məcəlləsinin 263.2 və 264-cü maddələri ilə ittiham irəli sürülüb.

Birinci instansiya nə qərar verdi?

Xəzər Rayon Məhkəməsi İlduzə Hacıyevanı təqsirli bilərək ona 5 il 2 ay azadlıqdan məhrumetmə cəzası təyin edib. Dövlət ittihamçısı isə 5 il 9 ay həbs cəzası istəmişdi. İndi müdafiə tərəfi hökmün qanuni və ədalətli olmadığını bildirərək apellyasiya şikayəti verib.

Müdafiə tərəfi nəyə istinad edir?

Vəkillər hesab edirlər ki, qəzanın hüquqi qiymətləndirilməsi zamanı yalnız yol vermə qaydasının pozulması deyil, hadisəyə təsir göstərə biləcək bütün texniki amillər də ayrıca araşdırılmalıdır.

Onların fikrincə, qarşı tərəfin avtomobili hansı sürətlə idarə etməsi, toqquşmanın məhz hansı dinamikada baş verməsi və həmin sürətin qəzanın qaçılmazlığına, eləcə də nəticələrin ağırlığına təsiri ekspertiza səviyyəsində yenidən qiymətləndirilməlidir. Müdafiə tərəfi hesab edir ki, yol-nəqliyyat hadisələrinin araşdırılmasında yalnız ilkin yol hərəkəti qaydasının pozulması deyil, eyni zamanda hər iki nəqliyyat vasitəsinin hərəkət trayektoriyası, əyləc izi, zərbənin gücü, toqquşma anındakı sürət və sürücülərin təhlükənin qarşısını almaq imkanları da kompleks şəkildə təhlil olunmalıdır. Onların qənaətincə, əgər qarşı tərəfin hərəkət sürəti icazə verilən həddi əhəmiyyətli dərəcədə aşmış olarsa, bu, təkcə qəzanın qarşısının alınması imkanlarına deyil, həm də toqquşmanın dağıdıcı təsirinə, avtomobilin bir neçə dəfə aşmasına və nəticədə ölüm və ağır xəsarətlərin baş verməsinə təsir göstərən amillərdən biri kimi qiymətləndirilə bilər. Məhz bu səbəbdən müdafiə tərəfi hesab edir ki, hadisənin bütün texniki parametrləri apellyasiya instansiyasında müasir ekspertiza metodları ilə yenidən araşdırılmalıdır.
Müdafiə tərəfi məhz bu arqumentlərlə apellyasiya instansiyasına müraciət edib.

Amal Məlikov barədə müzakirələr

Qəza zamanı həyatını itirən Amal Məlikov avtomobil həvəskarları arasında tanınırdı. Sosial şəbəkələrdə yüksək sürətlə avtomobil idarə etdiyi videolar paylaşdığı məlumdur. Mətbuatda yer alan məlumatlara görə, o, əvvəllər də yol hərəkəti qaydalarının pozulmasına görə inzibati məsuliyyətə cəlb olunub, həmçinin keçmişdə Bakıda Pakistan vətəndaşına qarşı xuliqanlıq ittihamı ilə məhkum olunması barədə konkret faktlar yayılıb. Son günlər sosial şəbəkələrdə onun ailəsinin müxtəlif dairələrlə əlaqələri barədə də müxtəlif iddialar irəli sürülür. Lakin bu məlumatların heç biri rəsmi qurumlar tərəfindən təsdiqlənməyib və onlar cinayət işinin materiallarında hüquqi qiymət verilmiş faktlar kimi yer almır. Bununla yanaşı, hüquqşünaslar qeyd edirlər ki, yol-nəqliyyat hadisələrində nəqliyyat vasitəsinin sürəti yalnız qəzanın baş vermə səbəblərinin deyil, həm də toqquşmanın nəticələrinin ağırlığının müəyyən edilməsində mühüm ekspertiza meyarlarından biridir. Məhz buna görə müdafiə tərəfi hesab edir ki, bu məsələ apellyasiya instansiyasında daha ətraflı araşdırılmalıdır.

İctimai müzakirələr davam edir

Qəza baş verən gündən sosial mediada iki fərqli yanaşma formalaşıb. Bir qrup hesab edir ki, sola dönən sürücünün yol vermə öhdəliyini pozması faciəyə səbəb olub və insan ölümü ilə nəticələnən belə hadisələrdə cəza qaçılmazdır.
Digər qrup isə bildirir ki, yol-nəqliyyat hadisələrində son nəticəyə təsir edən amillər təkcə bir hərəkətlə məhdudlaşmır. Onların fikrincə, avtomobillərin sürəti, toqquşmanın mexanizmi, təhlükənin qarşısının alınmasının mümkün olub-olmaması kimi məsələlər də ekspertiza tərəfindən hərtərəfli qiymətləndirilməlidir.

Apellyasiya nəyi müəyyən edəcək?

Cinayət Məcəlləsinin 263.2-ci maddəsi ehtiyatsızlıqdan insan ölümü ilə nəticələnən yol-nəqliyyat hadisələrinə görə məsuliyyət müəyyən edir. Belə işlərdə məhkəmə yalnız yol hərəkəti qaydalarının pozulmasını deyil, həmin pozuntunun ölüm və ya xəsarətlə səbəb-nəticə əlaqəsini, ekspertiza rəylərini və digər sübutları qiymətləndirir.
Əgər apellyasiya instansiyası hesab etsə ki, sübutların qiymətləndirilməsində və ya hüququn tətbiqində çatışmazlıqlar olub, hökm dəyişdirilə və ya iş yenidən baxılması üçün geri qaytarıla bilər. Əks halda, birinci instansiyanın hökmü qüvvədə saxlanacaq.
Hazırda İlduzə Hacıyevanın apellyasiya şikayəti üzrə məhkəmə baxışı gözlənilir. Bu prosesdə həm müdafiə tərəfinin irəli sürdüyü arqumentlər, həm də qəzanın texniki mexanizmi ilə bağlı ekspertiza materialları bir daha hüquqi müstəvidə qiymətləndiriləcək. Bu baxımdan apellyasiya məhkəməsinin qərarı yalnız təyin edilmiş cəza baxımından deyil, həm də hadisənin bütün səbəblərinin hüquqi qiymətləndirilməsi baxımından diqqətlə izlənilir.

Musavat.com