Ermənistan qadınları aktiv şəkildə ordu və kəşfiyyata cəlb edir. Bu kontekstdə ölkənin Təhlükəsizlik Şurasının katibi Armen Qriqoryanın son çıxışı diqqət çəkib. O, qadın batalyonunun yaradıldığını, bunun üçün xüsusi şərait və inkişaf etmiş infrastrukturun qurulduğunu bildirib. Qonşu ölkədə bu istiqamətdə atılan addımlar fonunda Azərbaycanda da zaman-zaman qadınların xidmətə cəlb olunması məsələsi gündəmə gəlir.

Globalinfo.az-a danışan hərbi ekspert Səxavət Məmməd deyib ki, iki ölkə arasında sülh müqaviləsi imzalanmadığı müddətdə tərəflər arasında vəziyyət yenidən gərginləşə bilər:

“Bu baxımdan ehtiyatlı olmalı və mümkün riskləri diqqətdə saxlamalıyıq. Ermənistanda qadınların orduya cəlb olunması yeni hal deyil. Orada bəzi qurumlar, hətta uşaqlara hərbi hazırlıq təlimləri keçirlər. Müharibə dövründə də Ermənistan qadınlardan, xüsusilə snayper kimi aktiv istifadə edib və bununla bağlı ənənələri mövcuddur.

Azərbaycanda isə qadınların hərbi xidmətə cəlb edilməsi daha çox kargüzarlıq və texniki sahələrlə məhdudlaşır. Əvvəllər qadınların ordudan tamamilə uzaqlaşdırıldığı dövrlər də olub. Hesab edirəm ki, ölkəmizdə qadınların döyüşçü kimi orduya çağırılması nə zəruri, nə də məqsədəuyğundur. Hazırkı şəraitdə buna ehtiyac yoxdur”.

Ekspert qeyd edib ki, Ermənistanın qadınları orduya cəlb etməsinin əsas səbəbi demoqrafik vəziyyət və əhali sayının az olmasıdır:

“Uzun sərhəd xəttini qorumaq üçün əlavə canlı qüvvəyə ehtiyac duyulur. Ona görə də Ermənistanın qərarını öz kontekstində normal qiymətləndirmək olar. Azərbaycanda isə analoji ehtiyac mövcud deyil. Avropa ölkələrinin son təcrübəsi də peşəkar ordu modelinə keçidin ciddi problemlər yaratdığını göstərdi. Rusiya-Ukrayna müharibəsi fonunda bir çox dövlətlər peşəkar ordunun məhdud imkanlarına görə yenidən çağırış sisteminə qayıtmağı müzakirə edirlər. Buna görə də Azərbaycanda buna tam keçidin doğru istiqamət olmadığı qənaətindəyəm. Hazırda qadınların döyüşçü kimi hərbi xidmətə çağırılması həm aktual deyil, həm də məqsədəuyğun hesab edilmir”.