Türk xalqları üçün artıq ortaq əlifba qəbul edilib. Bu, türk dünyasında dil və mədəni birliyin möhkəmlənməsi istiqamətində atılmış mühüm addımlardan biri hesab olunur. Lakin ekspertlərin fikrincə, ortaq əlifbanın qəbul olunması hələ prosesin sonu deyil – indi əsas məsələ türk xalqları üçün ortaq ünsiyyət dilinin müəyyənləşdirilməsidir.

Mövzu ilə bağlı Redaktor.az-a fikirlərini bildirən filologiya üzrə fəlsəfə doktoru Elşad Abışov bildirdi ki, Türk xalqları üçün ortaq ortaq ünsiyyət dilinin qəbul edilməsi məsələsi aktual bir məsələdir:

"Süni dil yoxdur və prinsip etibarilə belə bir dili süni şəkildə formalaşdırmaq da mümkün deyil. Yaxşı olardı ki, türk dillərindən biri və burada say çoxluğu da nəzərə alınmaqla türk xalqlarının hamısı üçün ortaq ünsiyyət dili kimi qəbul olunsun. Məsələn, buna Osmanlı türkcəsini misal gətirmək olar. Bildiyiniz kimi, say baxımından Osmanlı türkləri türk xalqları arasında ən çoxsaylı toplumdur. Təkcə Türkiyənin özündə 85 milyondan çox, ümumilikdə isə dünyada 100 milyondan artıq Osmanlı türkü yaşayır. Bununla yanaşı, dünyada təxminən 60 milyon Azərbaycan türkü mövcuddur. Biz şərti olaraq “Azərbaycan türkü”, “Osmanlı türkü” deyirik, amma əslində bu dillər eyni kökdəndir. Onların morfoloji quruluşu eyni, ünsiyyət dili isə bir-birinə son dərəcə yaxındır. Beləliklə, Osmanlı türklərinin dili ortaq dil kimi qəbul oluna bilər və digər türkdilli xalqlar da müxtəlif beynəlxalq toplantılarda, tədbirlərdə, o cümlədən türk dövlətləri arasında keçirilən görüşlərdə bu dildən ünsiyyət vasitəsi kimi istifadə etməlidirlər".