Elm və Təhsil Nazirliyinin tabeliyindəki elmi müəssisələrin fəaliyyəti optimallaşdırılır.
Bununla bağlı Baş nazir Əli Əsədov Qərar imzalayıb. Sənədə əsasən, müəssisələrin fəaliyyətinin optimallaşdırılması və səmərəliliyinin artırılması məqsədilə qərara alınıb ki, Elm və Təhsil Nazirliyinin tabeliyində publik hüquqi şəxslər yaradılır.
Həmin institutlardan biri kimi İdarəetmə Sistemləri İnstitutu və Riyaziyyat və Mexanika İnstitutunun əsasında Riyaziyyat İnstitutu yaradılacaq. Elm və Təhsil Nazirliyi yaradılan publik hüquqi şəxslərin nizamnamələrini iki ay müddətində təsdiq etməlidir.
Publik hüquqi şəxslərin dövlət qeydiyyatına alınması üçün onların nizamnamələri təsdiq edildikdən sonra 3 (üç) gün müddətində “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanunu ilə müəyyən edilmiş qaydada tədbirlər görməli və Qərardan irəli gələn digər məsələləri həll etməlidir.
Qeyd edək İdarəetmə Sistemləri İnstitutunun baş direktoru texnika elmləri doktoru, professor Əli Abbasovdur. Əli Abbasovun ixtisası avtomatika və telemexanikadır. Riyaziyyat və Mexanika İnstitutunun isə baş direktoru fizika-riyaziyyat elmləri doktoru, professor Misir Mərdanovdur.
Yeni yaradılacaq Riyaziyyat İnstitutuna kimin rəhbərlik edəcəyinə gəldikdə isə təxminlərə görə, bu vəzifəyə Riyaziyyat və Mexanika İnstitutunun baş direktoru Misir Mərdanov təyin ediləcək.
Məsələ ilə bağlı sabiq təhsil naziri, professor Misir Mərdanov “Cebheinfo.az”-a açıqlamasında hələ bu barədə məlumatı olmadığını bildirib.
