2013-2022-ci illərdə Şamaxı Şəhər İncəsənət Təhsili Mərkəzinin direktor müavini olmuş Lalə Novruzova külli miqdarda mənimsəmə ittihamı ilə 3 il 6 ay azadlıqdan məhrum edilsə də, o, özünü təqsirli bilmir. Apellyasiya şikayətində də göstərib ki, törətmədiyi əmələ görə onu cəzalandırıb, əsl günahkarları məsuliyyətdən kənarda saxlayıblar. Prokurorluq da onun haqqında hökmdən narazı qalıb. Prokurorluq onun cəzasının ağırlaşdırılmasını istəyib.

Bizimyol.info xəbər verir ki, 64 yaşlı Lalə Novruzovanın işinə baxan Sumqayıt Apellyasiya Məhkəməsi onun haqqında hökmü dəyişib. Müddət 3 il 6 aydan 5 ilə qaldırılsa da, cəzası şərti hesab edilərək azadlığa buraxılıb.

Lalə Novruzova Şamaxı Şəhər İncəsənət Təhsili Mərkəzində heç vaxt işə gəlməyən şəxslərin adlarını işçi kimi rəsmiləşdirib, onların maaşını hər ay kartdan çıxarıb mənimsəmənəkdə ittiham olunur. İttihama əsasən, bu yolla o, 46 min manatdan çox pulu mənimsəyib, 17 min manatdan çox vəsaiti israf edib.

Lalə Novruzova və vəkili apellyasiya şikayətində bildirib ki, birinci instansiya məhkəməsində - Sumqayıt Ağır Cinayətlər Məhkəməsində bu cinayət işi obyektiv və ədalətli araşdırılmayıb: “Mərkəzin Məleykə adlı təsərufat müdiri var, direktoru var. Onların əməllərinə qiymət verilməyib. Lalənin bu işləri görmək səlahiyyəti və imkanı olmayıb. Təsərufat müdiri Məleykənin adı niyəsə çəkilmir, amma Lalənin adı çəkilir. Halbuki, o, tədris məsələləri üzrə direktor müavinidir. Mənə qarşı ittiham qərəz və şəxsi mülahizələrə əsaslanır. Maddi məsul şəxs olan direktoru məsuliyyətdən kənarda saxlamaq üçün bütün addımlar atıldı”.

Lalə Novruzovanın ittiham olunduğu Cinayət Məcəlləsinin 179.3.2 (külli miqdarda mənimsəmə) maddəsində cəza 5 ildən başlasa da, məhkəmə ona münasibətdə Cinayət Məcəlləsinin 62-ci maddəsini tətbiq edərək, cəzanın minimum həddindən daha aşağı həddə cəza təyin edib – 3 il 6 ay. Prokuror bundan şikayət edib – 62-ci maddənin hökmdən xaric olunmasını, Cinayət Məcəlləsinin 179.3.2-ci maddəsinin sanksiyası həddində cəza təyin olunmasını istəyib.

Qeyd edək ki, Sumqayıt Ağır Cinayətlər Məhkəməsində dövlət ittihamçısı Lalə Novruzovaya 6 il azadlıqdan məhrumetmə cəzası verilməsini istəmişdi.

Apellyasiya məhkəməsi hökmü dəyişərək, 62-ci maddəni xaric edib, müddəti də 5 ilə qaldırıb. Lakin ona münasibətdə Cinayət Məcəlləsinin 70-ci (şərti məhkumetmə) maddəsini tətbiq edib.

Onu da qeyd edək ki, birinci instansiya məhkəməsi Lalə Novruzovaya qarşı Mədəniyyət Nazirliyinin 32 min 215 manatlıq mülki iddiasını təmin etmişdi. Bu vəsait zərərçəkmiş qismində tanınan nazirliyə ödənilməli idi. Lakin apellyasiya məhkəməsi bu hissədə də hökmü dəyişib. Zərərçəkmiş qismində tanınan nazirliyin mülki iddiası təmin olunmayıb.