Mədəniyyət Nazirliyi tərəfindən 2025/2026-cı tədris ili üzrə incəsənət məktəblərinə şagird qəbulu aparılıb.
Qəbul imtahanlarının nəticələri ilə razılaşmayan bir qrup valideyn tərəfindən redaksiyamıza müraciət daxil olub.
Müraciətdə deyilir:
“Musiqi məktəblərinə 80, 90, 100 (maksimal bal 100-dür) balla qəbul olan uşaqların çoxunu ödənişliyə salıblar. 6 ayın ödənişini qabaqcadan istəyirlər və sənəd yerləşdirilməsi üçün də çox az vaxt verilir. Nəticələr şənbə günü axşama doğru elan olundu, son gün olaraq 10 sentyabr təyin edilib. Nazirliyə, idarəyə və bir çox yerlərə şikayət etsək də, müraciətimizə baxılmır. Ödənişlər ötən ilkinə nisbətən musiqi məktəblərində 2 dəfə artıb”.
Məsələ ilə bağlı Mədəniyyət Naziliyindən “Cebheinfo.az”-a bildirib ki, cari ildə təhsilalanların qəbulu ilk dəfə olaraq tam müsabiqə formatında və mərkəzləşdirilmiş qaydada həyata keçirilib:
“Qəbul prosesi bir neçə mərhələdən ibarət olub: müraciət, imtahan, ixtisas və məktəb seçimi, yerləşdirmə. İlkin mərhələdə valideynlər “MyCulture” vahid şəxsi kabineti üzərindən elektron qaydada imtahanda iştirak üçün müraciət ediblər. Sonrakı mərhələdə mərkəzləşdirilmiş qaydada keçirilən əyani imtahan təşkil olunub, burada iştirakçılar seçdikləri istiqamət üzrə bilik və bacarıqlarını nümayiş etdiriblər.
İmtahan nəticəsində 50 və daha yuxarı bal toplamış namizədlər növbəti mərhələyə – ixtisas və məktəb seçiminə buraxılıb. Bu mərhələdə hər bir namizədə 3 ixtisas, hər ixtisas üzrə isə 2 məktəb seçmək imkanı yaradılıb”.
Bildirlib ki, keçid balları isə tamamilə müsabiqə prinsipi əsasında formalaşıb:
“Yəni dövlət sifarişi üzrə ayrılmış yerlərə daha çox müraciət olduqda, ən yüksək nəticə göstərmiş namizədlər seçilmişdir. Məsələn, hər hansı ixtisas və məktəb üzrə 5 dövlət sifarişli yer mövcuddursa və ora 50 nəfər müraciət edibsə, ən yüksək bal toplayan ilk 5 nəfər qəbul edilib, həmin ixtisas üzrə keçid balı isə sonuncu qəbul olunan iştirakçının nəticəsinə əsasən müəyyənləşdirilib.
Bu səbəbdən, hətta 90 və daha çox bal toplamış namizədlər belə bəzən seçdikləri ixtisas və məktəb üzrə yerlərin məhdudluğu və daha yüksək nəticə göstərmiş namizədlərin mövcudluğu səbəbindən kənarda qala biliblər. Bu, müsabiqə qaydalarının və ədalətli yerləşdirmə mexanizminin təbii nəticəsidir”.
