Rusiya baş nazirinin müavini Aleksey Overçuk Zəngəzur dəhlizindən danışıb. Kreml rəsmisi bildirib ki, Moskva İrəvanla Ermənistanın cənubundakı "Tramp marşrutu" layihəsi (TRIPP) məsələsini müzakirə edib. Overçuka görə, Moskva hesab edir ki, marşrut Rusiya ilə Ermənistanın bağlantısına imkan yaradacaq: "Əlbəttə, İrəvana səfərim zamanı və Həştərxanda azərbaycanlı həmkarlarımızla görüşlər zamanı bu məsələni də müzakirə etdik. Bunun necə olacağı ilə bağlı anlayışımız var. Belə bir yolun tikintisi Avrasiyanın ümumi nəqliyyat çərçivəsinin formalaşmasına kömək edəcək". Overçuk vurğulayıb ki, Moskvanın hesablamalarına görə, dəhliz çox güman ölkələrimiz arasında yüklərin daşınması üçün əsas yol olacaq. Qeyd edək ki, Rusiya ABŞ-yə məxsus şirkətin dəhlizə nəzarət etməsindən və Rusiyanın prosesdən kənarda saxlanmasından dolayı narazılığını və narahatlığını ifadə etmişdi. Lakin Overçukun açıqlaması Kremlin mövqeyinin nisbətən yumşalması kimi xarakterizə olunur.

"Rusiya ümumiyyətlə yürütdüyü xarici siyasətdə heç zaman səmimi olmayıb. Rəsmilər ara-sıra Türkiyə və Azərbaycana qarşı müəyyən xoşməramlı açıqlamalarla çıxış etsələr də, reallıq, yəni Rusiyanın regional siyasəti hələ dəyişməyib. Azərbaycanın mülki təyyarəsini məqsədli şəkildə vuran Rusiya tərəfi hələ də Azərbaycandan üzr istəməyib, təzminat ödəməyib. Bu halda Overçukun Zəngəzur dəhlizi ilə bağlı açıqlaması ancaq məcburiyyətdən doğur. Rusiya hər nə qədər ABŞ-nin dəhlizə nəzarət etməsini qəbul etməsə də, mövcud regional reallıqla ayaqlaşmaq məcburiyyətində olduğunun fərqindədir".

"Rusiya artıq Zəngəzur dəhlizində rolunun olmadığını qəbul edir. Overçukun açıqlamaları həmçinin Rusiyaya qarşı yaranmış gərginliyi azaltmaq məqsədi güdür. Azərbaycanın və Türkiyənin yürütdüyü siyasətin nəticəsində regionda fərqli mühit yaranıb. Sülh və sabitlik şəraitində yeni əlaqələrin qurulması üçün imkanlar var. Rusiya da bu imkanlardan yararlanmaq niyyətindədir".