Gözəllik salonlarında təqdim edilən xidmətlər insanların xarici görünüşünü dəyişməklə yanaşı, onların sağlamlığına da təsir göstərir.
Buna görə də bu məkanlarda gigiyena qaydalarına ciddi riayət olunması xüsusi əhəmiyyət kəsb edir. Bəzən alətlərin steril saxlanmaması və gigiyena qaydalarına əməl olunmaması müxtəlif xəstəliklərin, o cümlədən hepatit və dəri infeksiyalarının yaranma riskini artırır. Buna görə də bu sahədə gigiyenik normalara riayət olunması və nəzarətin gücləndirilməsi vacib amillərdəndir.
Belə halların qarşısını almaq üçün gözəllik salonlarında hansı tədbirlər görülməlidir?
Mövzu ilə bağlı “Cümhuriyət” - ə açıqlama verən kosmetoloq Sahilə Əbdurəhmanova bildirib ki, xəstəliklərə yoluxmamaq üçün müştərilərin də diqqətli olması vacibdir:
“Gözəllik salonlarında gigiyenik qaydalara əməl olunmadıqda, xəstəliyə yoluxmaq ehtimalı artır və bu, əsasən həm müştərinin, həm də ustanın məsuliyyətinə bağlıdır. Hər hansı qurumun bütün günü salonlarda nəzarət aparması mümkün deyil. Buna görə də müştəri diqqətli olmalı, istifadə olunan vasitələrin hansı formada tətbiq edildiyini izləməlidir.
Məsələn, qaş üçün iynə və ya ülgüc mütləq müştərinin yanında açılmalı, dırnaq prosedurlarında isə alətlər qablaşdırmadan çıxarılmalıdır. Belə proseslərdə məsuliyyət həm müştəri, həm də ustanın üzərinə bərabər şəkildə düşür. Əks halda gigiyenik qaydaların pozulmasının qarşısını almaq mümkün olmur”.
Onun sözlərinə görə, müştəri prosedur zamanı diqqətsizlik görürsə, haqqını tələb etməyi bacarmalıdır:
“Əgər müştəri diqqətsiz davranır, usta isə tozlu və dezinfeksiya olunmamış alətlə xidmət göstərirsə, bu vəziyyətdə heç bir nəzarət qurumu müdaxilə edə bilməz. Müştəri ustanın işinə məsuliyyətsiz yanaşdığını görərsə, gigiyenik qaydalara əməl edilməsini tələb etməli və qaydalara riayət olunmayan yerlərə müraciət etməməlidir.
Kosmetologiyada iynələr birdəfəlik qablaşdırmada təqdim olunur, bütün prosedurlar steril şəraitdə, əlcək və maskadan istifadə etməklə aparılır. Lakin salonlarda vəziyyət bir qədər fərqlidir”.
Kosmetoloq qeyd edib ki, müştərilər yalnız güvəndikləri yerlərə müraciət etməlidirlər:
“Hətta sadə saç boyası zamanı belə, əgər müştərinin başında yara varsa və istifadə olunan fırça dezinfeksiya olunmayıbsa, bakteriyalar digər müştərilərə keçə bilər. Bu səbəbdən belə halların qarşısını almaq həm müştərinin diqqəti, həm də ustanın məsuliyyəti ilə mümkündür.
Səhiyyə qurumlarının bu məsələyə tam nəzarət etməsi çətin olduğundan, yalnız vaxtaşırı reydlər aparılır və qayda pozuntuları aşkarlandıqda cərimələr tətbiq edilir. Buna görə də müştərilərə tövsiyə olunur ki, yalnız güvəndikləri, gigiyenik normalara ciddi riayət edən ustalara müraciət etsinlər və ucuz qiymət, endirim naminə şübhəli məkanlara üz tutmasınlar”.
