Çinə səfəri zamanı Hindistanın Baş naziri Narendra Modi ilə Rusiya Prezidenti Vladimir Putinin Aurus limuzininə əyləşib.

Onlar birgə səfər ediblər. Bu səfər Rusiya lideri Vladimir Putinin qərarı olub.

“Cebheinfo.az” xəbər verir ki, bu barədə Rusiya prezidentinin köməkçisi Yuri Uşakov "Moskva. Kreml. Putin" verilişinin müəllifi və aparıcısı Pavel Zarubinə müsahibəsində deyib.
Uşakov deyib:

“Bu, bizim Prezidentimizin qərarı və onun dostu Hindistanın Baş nazirinin razılığı ilə olub”.

Onun sözlərinə görə, bu, Vladimir Putinin bir növ dostluq jesti idi.

"Çıxışda görüşdülər və razılaşdılar ki, eyni maşında gedəcəklər. Bu, məncə, bizim tərəfimizdən bir jestdir", - Uşakov qeyd edib.

Bu arada Rusiyanın xarici işlər naziri Sergey Lavrov Pavel Zarubinə müsahibəsində bildirib ki, Rusiya, Hindistan və Çinin maraqları eyni deyil, lakin ölkələr arasında tərəfdaşlığa meyil göz qabağındadır.

Xatırladaq ki, Şanxay Əməkdaşlıq Təşkilatının (ŞƏT) Çində keçirilən sammitində Hindistam Azərbaycanın təşkilata üzvlüyünün bloklayıb. Bununla bağlı yeni məqamlar ortaya çıxıb.

Diplomatik mənbələrdən əldə edilən məlumata görə, Azərbaycanın ŞƏT-ə üzvlüyünün bloklanması təkcə Hindistanın təşəbbüsü ilə olmayıb, Rusiya da bu prosesdə yaxından iştirak edib.

Bildirilib ki, bu prosesdə əsas rolu isə Rusiya Xarici İşlər Nazirliyi oynayıb. Mənbənin sözlərinə görə, Azərbaycanın ŞƏT-ə üzvlüyünün bloklanması məsələsi Rusiya və Hindistan arasında siyasi məsləhətləşmələrdə müzakirə olunub, müvafiq razılığa gəlinib. Sadəcə, Rusiya prosesdə Hindistanı qabağa verib, özü arxa planda dayanıb.

Mənbə onu da deyir ki, Rusiyanın bu hərəkəti həm də Çinə qarşı hörmətsizlik kimi qəbul olunmalıdır.

“Çünki Çin Şanxay ruhuna uyğun olaraq təşkilatın genişləndirilməsi üçün addımlar atır. Azərbaycanın ŞƏT-ə üzvlüyünə Pekin də ciddi dəstək verib. Lakin Çində keçirilən Sammitdə Rusiya və Hindistan Azərbaycanın təşkilata üzvlüyünü bloklamaqla, həm də Çinə qarşı hörmətsizlik nümayiş etdirib” - məlumatda deyilir.

Hindistan isə bu yaxınlarda Çində keçirilən sammit zamanı Azərbaycanın Şanxay Əməkdaşlıq Təşkilatına (ŞƏT) üzvlüyünü əngəlləməklə bağlı ittihamlarını rədd edib. “News18” yazıb ki, Yeni Dehli üzvlüklə bağlı qərarın vaxt məhdudiyyəti səbəbindən verilə bilmədiyini iddia edib. Hindistan Xarici İşlər Nazirliyinin sözçüsü Randhir Cavaysal bildirib ki, Ermənistan və Azərbaycan ŞƏT-ə üzv olmaq üçün müraciət ediblər.

"Vaxt məhdudiyyəti səbəbindən üzv dövlətlər bu məsələ ilə bağlı qərar qəbul edə bilməyiblər. Məsələ hələ də nəzərdən keçirilir", - o deyib.