“Bank of Baku” iki il öncə dəm qazından boğularaq dünyasını dəyişən 44 günlük Vətən Müharibəsi qazisi Səbuhi Məmmədovun ailəsini kredit borcuna görə məhkəməyə verib.

Ailəsinin verdiyi məlumata görə, onun banka 3 100 manat borcu olub. S.Məmmədovun vəfatından 1 ay sonra isə bank ailəni borca görə narahat etməyə başlayıb. Bu ilin sentyabrın 1-də Şirvan Şəhər Məhkəməsində məsələyə baxılıb və digər məhkəmə sentyabrın 22-nə təyin olunub.

S.Məmmədovun xalası oğlu Tural İbadlı Bizim.Media-ya açıqlamasında bildirib ki, bank borcun silinməsi ilə bağlı heç bir addım atmayıb:

“Sentyabrın 1-də hazırlıq məhkəməsi keçirilib və növbəti məhkəmə sentyabrın 22-nə təyin edilib. Həmin tarixdə məsələ ilə bağlı rəsmi qərar veriləcək. İlk məhkəmədə hakim bank nümayəndələrinə bildirdi ki, bu, həssas məsələdir və növbəti məhkəməyə qədər həll edilməlidir. Məhkəmədə bank işçiləri bildirib ki, bizim baş ofisə yaxınlaşılmalıdır və orada müzakirə edilməlidir. Amma bankdan borcdan imtina edilməsi ilə bağlı rəsmi qaydada heç bir məlumat verilməyib.

Qeyri-rəsmi formada kimlərsə borcu bağlamaq istəyiblər, amma bankdan bir addım gəlməyib. Əslində Səbuhi kifayət qədər yüksək əməkhaqqı alırdı. Biz ölümündən sonra kreditinin olduğunu öyrənmişik. O, bacısı ilə Bakıda yaşayırdı, heç bacısının da kredit məsələsindən xəbəri olmayıb. Nə kreditin, nə də pulu nəyə xərclədiyi ilə bağlı sənədlər var. Sadəcə o, müharibədən sonra böyrək xəstəliyindən əziyyət çəkirdi, ürək çatışmazlığı var idi. Düşünürük ki, krediti bu xəstəliyinin müalicəsinə xərcləyib. Məhkəmədə də bu mövzu müzakirə edildi”.

Mərhum qazinin anası Sevinc Məmmədova da saytımıza açıqlamasında deyib ki, oğlu 3 100 manat dəyərində kredit götürüb, lakin o, bundan xəbərsiz olub:

“Oğlum 23.05.2023-cü il tarixində kredit götürüb və 1 həftə sonra isə dünyasını dəyişib. Bundan 1 ay sonra kreditlə bağlı məlumatlandırılmışam. Borcun 3 100 manat olduğu bildirilir, indiyədək ödəniş etməmişik. Məni məhkəmədən sonra baş ofisə çağırdılar, bildirdilər ki, sual-cavab olmalıdır, lakin mən səhhətimlə bağlı gedə bilmədim. Amma bilmədim ki, nəyə görə çağırılıram”.

Ana baş ofisə getdiyi vaxtda bank işçisi tərəfindən utancverici cavab alıb:

“Mən bu barədə danışmağa xəcalət çəkirəm. Bakıda müalicə aldığım dönəmdə bankın baş ofisinə getdim. Orada orta yaşlı kişi vəkil laqeyidcəsinə dedi ki, siz o borcu ödəyin, ya yaxınlarınız ödəsin. Yoxsa o dünyada oğlunuzu narahat edəcəklər, oğlunuz rahat yata bilməyəcək. Ödəyin ki, o dünyada onu inkir-minkir narahat etməsin”.

Məsələ ilə bağlı “Bank of Baku” ilə əlaqə yaratdıq. Bankdan Bizim.Media-ya bildirilib ki, məsələ haqqında məlumat verilə bilməz:

“Bu qanunvericilikdə müştəri sirri olduğu üçün heç bir məlumat verə bilmərik”.

Mövzunu diqqətdə saxlayacağıq…