Ağdaş Rayon İcra Hakimiyyətinin başçısı Orxan Hüseynzadəyə işində yol verdiyi ciddi nöqsanlara görə Prezident tərəfindən şiddətli töhmət elan edilməsi sözügedən qurumla bağlı islahatları yenidən gündəmə gətirib. Bildirilir ki, İcra Hakimiyyəti anlayışı SSRİ-dən qalıb və heç bir funksionallığı yoxdur.

Globalinfo.az-a danışan siyasi şərhçi Heydər Oğuz deyib ki, məlum Sərəncama Orxan Hüseynzadənin cavabı əslində icra institutunun nə qədər absurd bir sistem olduğunu göstərdi:

“Prezident həmin Sərəncamında icra başçısının fəaliyyətində yol verdiyi ciddi nöqsanlardan danışır və onu şiddətli töhmətlə cəzalandırır. Adətən belə durumlarda adam başını aşağı salıb istefa ərizəsi yazar və uzun illər ictimaiyyət qarşısına çıxmaz. İcra başçısı isə Sərəncamın mürəkkəbi qurumamış ictimaiyyət qarşısına çıxıb “iş olan yerdə nöqsanların da ola biləcəyindən danışır”.

Başçının bu açıqlaması əslində İcra hakimiyyətləri strukturunun müasir ictimai tələblərlə ayaqlaşmadığını göstərir. Səbəbi bu strukturun sovet hakimiyyəti illərindən yadigar qalması, ictimai rəylə hesablaşmaq ehtiyacı duymamasıdır. Məlumdur ki, icra başçılarını adətən iri məmurlar seçib Prezidentə təklif edirlər. Bu səbəbdən də bəzi başçılar hakimiyyətlərinin mənbəyinin həmin iri məmurlar olduğunu düşünür və yalnız onların xətrini xoş etməyə çalışırlar. Yerli camaat, vətəndaşların taleyüklü mənafeləri isə onlar üçün qətiyyən maraqlı olmur”.

Siyasi şərhçi bildirib ki, ciddi islahatlar üçün bu struktur ləğv edilməlidir. H.Oğuzun fikrincə, bələdiyyə institutunun daha çox önə çıxması yaranmış neqativ vəziyyəti xeyli dərəcədə aradan qaldırar:

“Yerlərdə hakimiyyətin sakinlər tərəfindən seçilməsi həm idarəçilikdə məsuliyyət hissi yaradar, bəzi rayon rəhbərləri indiki kimi özbaşınalıq etməz, yenidən seçilmək uğrunda müxalifləri ilə rəqabət aparar, nəticədə daha yaxşı idarə olunan ölkədə sosial narazılığın da qarşısı alınar. Həm də bu yolla biz ölkəmizi xarici təzyiq və təsirlərdən də qoruya bilərik”.