“Hazırda Rusiya hərbçiləri ilə prezident Putinin münasibətləri gərgindir. Azərbaycan, Türkiyə və digər ölkələrin Ukraynadakı obyektləri də bu gərginlik səbəbindən vurula və bununla Putinə qarşı münasibətləri daha da gərginləşdirmək xətti seçilə bilər. Digər tərəfdən, nəzərə almaq lazımdır ki, rus hərbçilər arasında ukrayna əsillilər də çoxdur. Rusiya generaltetinin on beş faizdən çoxu ukraynaəsillidir. Yəni bizim Ukraynadakı səfirliyimiz və ya müəssisələrimiz bu səbəbdən də vurula, Rusiyanın həm Azərbaycanla, həm də digər ölkələrlə münasibətlərini daha da gərginləşdirməyə çalışa bilərlər”.

Bunu “Reytinq” qəzetinə açıqlamasında Vəhdət Partiyası sədrinin müşaviri, professor Cümşüd Nuriyev son günlər Rusiya ordusunun Ukraynadakı Azərbaycan səfirliyini, Türkiyəyə məxsus müəssisələri, Avropa qurumlarının Kiyevdəki obyektlərinə atəş açılmasının səbəblərini şərh edərkən deyib.

Professor əlavə edib ki, indi Rusiya rəhbərliyi köhnə məsələləri açıb-tökmək və bundan dvident əldə etmək xətti götürür.

Cümşüd Nuriyevin fikrincə, xüsusilə, Azərbaycan lideri İlham Əliyevin “Əl-Ərəbiyyə” telekanalına verdiyi müsahibədən sonra Rusiyada yenidən aqressivləşmə müşahidə olunmağa başlayıb.

“Prezident İlham Əliyev Azərbaycanın Müstəqillik Haqqında Bəyannaməsində olan məsələləri qeyd edib. Həmin sənəddə bildirilir ki, Azərbaycan Rusiya tərəfindən işğal edilib. Bizim mövcud qanunlarımızda bu faktlatr açıq yazılıb. O zaman bu sənədi yazarkən bəzi cümlələri mətndən çıxarmağa çalışırdılar. Amma biz imkan vermədik. Hacıbaba Əzimov sənədin əsas müəllifi idi və bu məsələlərdə iradə göstərdi, imkan vermədi ki, bu cümləni mətndən çıxarsınlar. Qısası, prezidentin bu çıxışı tam faktlara əsaslanır”,- deyə professor əlavə edib.

Nuriyev deyib ki, son 300 ildə Azərbaycanın başına hansı bəlalar gəlibsə, onun altından Rusiya çıxıb:

“Rusiyanın dövlət kimi tarixi 400-500, millət kimi tarixi isə 600 ildir. Vaxtında Rusiyada dövlətini quranlar alman əsilli şəxslər olub. Hesab edirəm ki, insanlar kimi bəzən dövlətlər də natamamlıq kompleksindən çıxa bilmirlər. Bu baxımdan Rusiyanın aqressivləşməsi doğru deyil”.

Müsahibimiz sonda əlavə edib ki, Azərbaycan lideri Rusiyada Azərbaycana qarşı çıxış edən hər kəsi yerində oturtmağı bacarır.

“Rusiyanın siyasi elitası ağlasığmaz çıxışlar edir. Odur ki, Ukraynadakı bizim müəssisələrimizin vurulmasında qeyri-adi, təəccübləndirici bir məqam görmürəm. Onlardan nə desən çıxar. Ancaq Azərbaycan oturuşmuş dövlətdir, onun ağıllı və güclü lideri var və prosesi yüksək səviyyədə idarə edə bilir. Üstəlik, bizə əlavə münaqişə lazım deyil və bizi təxribata çəkə bilməzlər”,- deyə Nuriyev yekunlaşdırıb.

"DİA-AZ"-dan ZƏRURİ QEYD: DAHA NƏ DEYƏK BU MƏNTİQƏ, BU TƏFƏKKÜRƏ, BU DÜŞÜNCƏYƏ? Rusiyanın əl-üzünü yumağı qəsd edən hörmətli Cümşüd müəllimi anlayırıq: çətin situasiyadır.... qatili müdafiə etmək üçün məntiqi əsas tapmaq lazımdır. Amma bu da ağ oldu axı... Hər halda Ukraynada Azərbaycana aid hədəflərin Rusiya tərəfindən vurulmasını Rusiya ordusundakı ukraynaəsilli generallarla əlaqələndirmək... BUNA KİMSƏ İNANMAZ... Hətta Putinin özü belə...