Rusiya ilə Azərbaycan arasında münasibətlərin gərginləşdiyi bir vaxtda Moskva daha bir təxribatçı addıma imza atıb. Bu dəfə hədəfdə Qarabağdan könüllü şəkildə köçmüş ermənilərdir. "BBC Azərbaycanca"nın yayımladığı videosüjetdə görünür ki, Rusiya Ermənistanda yerləşən və öz istəyi ilə Qarabağdan çıxmış erməni qaçqınlara yardım göndərib.
İki ildən çox müddət ərzində susan və bu mövzuda heç bir addım atmayan Moskva indi "Rusiya səninlədir" devizi altında 140 ton yardım paketi ilə bu insanları yenidən gündəmə gətirib. Ekspertlərin fikrincə, bu kontekstdə Rusiyanın "yardımı" daha çox geosiyasi manipulyasiya vasitəsidir və Qarabağ məsələsi üzərindən revanşist planlara xidmət edir.
Politoloq Məhəmməd Əsədullazadə Sherg.az-a deyib ki, Moskva "Qarabağ məsələsi"ni gündəmdə saxlayır və bunu Azərbaycana qarşı təzyiq etmək üçün istifadə edir. Ekspert bildirib ki, Ermənistan hökuməti Qarabağdan köçən ermənilərə vətəndaşlıq və iş verir:
"Artıq Ermənistan hakimiyyəti Qarabağ erməniləri ifadəsindən imtina edir. Amma Rusiya bu siyasətindən imtina etmək istəmir. Bununla Ermənistanın daxili siyasətinə qarışır. Rusiya bununla Qarabağ ermənilərinin geri qayıtması üçün yeni bir kampaniya başladacaq. Həmçinin, Qarabağdan köçən ermənilərin yenidən qondarma "hakimiyyətini "qurmağı planlaşdırır. Ermənistan hökuməti Rusiyanın bu oyunlarına imkan verərsə, Qarabağdan köçən ermənilər ilk növbədə Nikol Paşinyana qarşı olacaqlar. Rusiya Ermənistan daxilində yeni separatçı ocağı yaradıb, Azərbaycanı təhdid etməyi planlaşdırır. Bununla iki ölkə arasında sülh prosesini pozmağı düşünür".
Siyasi şərhçi diqqətə çatdırıb ki, Azərbaycan Ermənistan hökumətinə Rusiyanın Qarabağdan köçən ermənilər üzərindən siyasi oyun qurmasına imkan verməməsini tələb etməlidir:
"Artıq Rusiya Qarabağı tərk etmiş ermənilərin şəxsi məlumatlarını toplamağa başlayıb. "Rossotrudniçestvo"nun Ermənistandakı nümayəndəliyi Qarabağı könüllü tərk edən vətəndaşların şəxsi məlumatlarını toplayır. Erməni hökumətindəki mənbələrin məlumatına görə, insanlardan pasport, doğum şəhadətnaməsi və digər sənədlərin surətlərini təqdim etmələri tələb olunur. Azərbaycan və Ermənistan arasında sülh müqaviləsi bağlandıqdan sonra da Rusiya "Qarabağ mövzusu"ndan imtina etməyəcək".
