"Vətən müharibəsindəki qələbəmizdən sonra bölgədə tamamilə yeni reallıqlar formalaşıb və bu reallıqlar fonunda Azərbaycanın siyasi və diplomatik nüfuzu əhəmiyyətli dərəcədə artıb".

Bu fikirləri Milli Məclisin deputatı Vüqar İskəndərov Redaktor.az-a açıqlamasında bildirdi. O, qeyd etdi ki, Azərbaycan bu reallıqlar fonunda Ermənistanla sülh müqaviləsinin imzalanması üçün konkret şərtlər irəli sürüb:

“Vətən müharibəsindəki qələbəmizdən sonra təbii ki, Azərbaycan bölgədə yeni reallıq yaradıb və ölkəmizin, eləcə də ölkə prezidentimiz cənab İlham Əliyevin nüfuzu qlobal səviyyədə qat-qat artıb. Təbii olaraq, yeni reallıqlar fonunda Azərbaycan Ermənistana sülh müqaviləsinin imzalanması üçün müəyyən şərtlər irəli sürüb. Qarşılıqlı şəkildə bu məsələ uzun müddət danışıqların predmetinə çevrilib və artıq 17 müddəanın razılaşdırılması məsələsi həll olunub. Hazırda isə iki əsas məsələ ilə bağlı Azərbaycan Ermənistanın qarşısında konkret şərtlər qoyub”.

Millət vəkilinin sözlərinə görə, bu məsələlərdən birincisi Ermənistan Konstitusiyasındakı Azərbaycana qarşı ərazi iddiası ilə bağlı maddənin çıxarılmasıdır.

“Həmin maddə hələ də Azərbaycana qarşı ərazi iddiasını əks etdirir. İkincisi isə ATƏT-in Minsk qrupunun tam ləğv olunması məsələsidir. Onsuz da bu qurum faktiki olaraq fəaliyyət göstərmir və onun saxlanması üçün heç bir əsas qalmayıb. Ölkə başçımız da dəfələrlə Minsk qrupuna münasibətini açıq şəkildə ifadə edib. Bu, artıq Ermənistanın qarşısında qoyulmuş konkret tələblərdir. Əgər Ermənistan doğrudan da dövlətlərarası sülh müqaviləsinin imzalanmasını istəyirsə, rasional və praqmatik qərarlar qəbul etməlidir. Əks halda, Ermənistanın baş naziri və komandası nə qədər sülhdən danışsa da, real addımlar atılmadığı üçün sülh müqaviləsinin imzalanması hələ də baş tutmur. Bu səbəbdən həmin məsələlər müqavilənin bağlanmasına maneə olaraq qalır və Ermənistan bu iki əsas məsələni mütləq şəkildə həll etməlidir”, - deyə o vurğuladı.

Vüqar İskəndərov əlavə etdi ki, sülh prosesinin qarşısında dayanan digər əsas məsələ Zəngəzur dəhlizidir:

“Ermənistan bu məsələdə də apardığı siyasətlə ölkəsini çıxılmaz vəziyyətə salıb. Bu məsələ də mütləq öz həllini tapmalıdır. Dəhliz açılmalı və Azərbaycanın əsas hissəsi ilə Naxçıvan arasında quru yolla maneəsiz keçid təmin olunmalıdır. Bu da Ermənistanın qarşısında duran vacib məsələlərdən biridir və onun da həlli zəruridir”.