Siyasi Menecment İnstitutunun direktoru, həbsdə olan politoloq Azər Qasımlının məhkəməsi davam edir.

Bizimyol.info xəbər verir ki, iyulun 30-da Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən məhkəmə prosesində iş üzrə zərərçəkmiş qismində tanınan Qurbanəli Yusifov ifadə verib. Lakin o, ifadə verməmişdən əvvəl nümayəndəsi Vüqar Şamilov məhkəmədən vaxt istəyib. Vəkil bildirib ki, nümayəndəsi olduğu Qurbanəli Yusifovla bir gün əvvəl müqavilə bağlayıb, iş materiallarıilə tanış ola bilməyib: “Məndə heç ittiham aktı da yoxdur. Bu səbəbdən xahiş edirəm, məhkəmə təxirə salınsın”.

Müdafiə tərəfi etiraz edərək bildirib ki, prosesin təxirə salınması süründürməçilik olacaq. Vəkil Rövşanə Rəhimova bildirib ki, zərərçəkmiş iyulun 17-dən vəkili olması barədə məhkəməni məlumatlandırmışdı: “Onların o vaxtdan müqavilə bağlamaq imkanı vardı. İndiyə saxlamaq məhkəməni uzatmaq məqsədi daşıyır”.

Hakimlər vəsatəti təmin etməyib. Qərara alınıb ki, zərərçəkmiş dindirilsin, ona suallar növbəti məhkəməyə saxlansın.

Zərərçəkmiş Qurbanəli Yusifov ifadəsində bildirib ki, Azər Qasımlı ilə düşmənçiliyi yoxdur, əksinə, dostluq münasibətləri olub, dəfələrlə onun evinə qonaq gedib. Onlar Real partiyasında tanış olublar. Azər Qasımlı partiyadan gedəndən sonra da münasibətləri davam edib.

Zərərçəkmiş bildirib ki, Azər Qasımlıdan pul almayıb, ona borclu olması barədə qarşı tərəfin söylədikləri doğru deyil: “Bizim iş birliyimiz olub. Kriptovalyuta işi ilə məşğul olmuşam. Bununla bağlı mənim çıxışlarım da vardı. Azər Qasımlı da bu işə pul yatırmaq istəyirdi. Ona dedim ki, qazancla yanaşı, risk də ola bilər”.

Zərərçəkmişin sözlərinə görə, Azər Qasımlı 20 min dollar yatırım edib. Sonradan ziyan olub və bunun əvəzində ondan bitkoin tələb etməyə başlayıb, daha sonra təzyiq altında 45 min dollar borclu olmağı barədə sənəd imzaladıb. Onun sözlərinə görə, tez-tez zəng edib, narahat eləyib. Bu səbəbdən ölkəni tərk eləmək məcburiyyətində qalıb: “Türkiyəyə gedəndən sonra da rahat buraxmadı. Ailə üzvlərimlə, övladımı qaçırmaqla hədələdi”.

Azər Qasımlının məhkəməsi sentyabrın 10-da davam edəcək. Növbəti prosesdə zərərçəkmiş müdafiə tərəfinin və öz nümayəndəsinin suallarını cavablandıracaq.

Qeyd edək ki, Azər Qasımlı 2024-cü il dekabrın 8-də saxlanılıb. Ona qarşı Cinayət Məcəlləsinin 182-ci (hədə-qorxu ilə tələbetmə) maddəsi ilə ittiham irəli sürülüb. Azər Qasımlı bildirir ki, Qurbanəli Yusifovu hədələməyib, qarşı tərəf özü ona borclu olduğunu dəfələrlə etiraf edib. Bununla bağlı Mingəçevir Şəhər Məhkəməsində mülki qaydada onun xeyrinə çıxarılmış məhkəmə qərarı da var.