42 milyonluq mənimsəmədə ittiham olunan Zahid Niftəliyevin ("Şlyapa Zahid") cinayət işi üzrə növbəti məhkəmə prosesi keçirilib.

Lent.az xəbər verir ki, Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə zərərçəkənin vəkili vəsatət verərək mülki iddianın artırılmasını xahiş edib.

Dövlət ittihamçısı vəsatəti məhkəmənin mülahizəsinə buraxıb.

Məhkəmə vəsatəti təmin etməyib.

Digər müdafiəçi tərəf şahidlərin çağırılması ilə bağlı vəsatətlərin təmin olunmadığını deyib və həmin şəxslərin məhkəmə iclasına çağırılmasını xahiş edib.

Vəsatət təmin olunmayıb.

Prosesdə fasilə elan edilib. Fasilədən sonra təqsirləndirilən şəxsin müdafiə tərəfi iştirak etmədiyi üçün proses təxirə salınıb.

Növbəti proses iyulun 30-na təxirə salınıb.

Dövlət ittihamçısı təqsirləndirilən şəxsin 15 il müddətinə azadlıqdan məhrum edilməsini və cəzasını ümümi rejimli cəzaçəkmə müəssəsində çəkməsini təklif edib.

Qeyd edək ki, Zahid Niftəliyev rüşvət almaqda ittiham olunaraq bir müddət əvvəl həbs olunub. Ona Tərtər Hərbi Məhkəməsinin hökmü ilə şərti cəza verilib. Daha sonra o, Dövlət Təhlükəsizliyi Xidməti (DTX) İstintaq baş idarəsi tərəfindən həbs edilib.

İstintaq dövründə Gəncə Apellyasiya Məhkəməsi prokurorluğun Tərtər Hərbi Məhkəməsinin hökmü ilə bağlı protestini təmin edib. Z.Niftəliyev vəzifə saxtakarlığı və külli miqdarda rüşvət almaqda təqsirli bilinərək 8 il 6 ay müddətinə azadlıqdan məhrum edilib.

Bundan başqa, Z. Niftəliyev hazırda məhkəmədə araşdırılan cinayət işi üzrə öz adına formal şirkət açaraq “ATABank”dan götürülmüş 42 milyon manat kredit vəsaiti üzrə çıxarılmış məhkəmə qətnaməsini qərəzli olaraq icra etməməkdə ittiham olunur.

İttihama əsasən, Zahid Niftəliyev məqsədyönlü şəkildə həmin məbləğdə kredit almaq məqsədilə “Şahin-CO” adlı şirkət yaradıb, şirkət təsərrüfat və maliyyə vəziyyəti barədə “Ata Bank” ASC-yə saxta məlumatlar təqdim etməklə 2016-cı ildə 12 ay müddətinə 42 milyon 470 min 885 manat manat kredit alaraq xüsusilə külli miqdarda ziyan vurub. O, götürülmüş kreditin ləğv prosesində olan “Ata Bank” ASC-yə ödənilməsi ilə bağlı məhkəmə qətnamələrini qərəzli olaraq icra etməyib.