. 

Yekaterinburqda azərbaycanlılara qarşı Rusiya hüquq-mühafizə orqanları tərəfindən törədilən vəhşilik, iki nəfərin ölümü və bir neçə nəfərin yaralanması ilə nəticələnən zorakılıq hərəkətləri Azərbaycan ictimaiyyətində Rusiyaya qarşı etirazlara səbəb olub. Eyni zamanda Azərbaycan hakimiyyəti də məsələ ilə bağlı sərt yanaşma ortaya qoyaraq hadisənin günahkarlarının cəzalandırılmasını tələb edib, diplomatik münasibətlərdə soyuqluq yaranıb.

Ortaya çıxan mühüm suallardan biri də budur ki, belə bir həssas məqamda Rusiya tərəfindən azərbaycanlı miqrantlara qarşı münasibətin sərtləşdirilməsinin və belə bir hadisənin törədilməsinin məqsədi nədir?

Mövzu ilə bağlı Sitat.info-ya danışan ADP sədri Sərdar Cəlaloğlu bildirdi ki, bu ciddi bir terror və cinayətdir: "Əslində bu hadisə gözlənilən idi. Məsələnin həm hüquqi, həm də siyasi tərəfi var. Hüquqi tərəfi ondan ibarətdir ki, Yekaterinburqda həbs edilən, öldürülən adamlar hətta günahkar olsa belə, polisin, məhkəmənin hökmü olmadan onları öz bildiyi kimi cəzalandırmaq ixtiyarı yoxdur. Bu çox ciddi bir terrordur, cinayətdir. Həm Rusiyanın öz qanunlarının, həm də beynəlxalq hüquq normalarının pozulmasıdır. Siyasi tərəf ondan ibarətdir ki, son vaxtlar Azərbaycanla Rusiya arasında Kremlin imperial iddialarına görə vəziyyət ağırlaşıb".

S.Cəlaloğlu onu da vurğulayıb ki, Rusiya ardıcıl olaraq Ermənistandakı radikal qüvvələri Azərbaycana qarşı yönəldir: "Qarabağ məsələsini aktuallaşdırmağa cəhd edir. Bunun da bir çox səbəbləri var. Azərbaycanın müstəqil siyasət yürütməsi, Pakistan və Türkiyə ilə münasibətlərini yeni bir müstəviyə qaldırması, Ukraynanı dəstəkləməsi - bütün bunlar hamısı təbii ki, Rusiya tərəfindən göz ardı edə bilməzdi. Rusiya da bu məsələni normal siyasi bir yolla həll etmək əvəzinə özünəməxsus üsul və vəsitələrlə həll edir. Bizim təyyərəmiz də ruslar tərəfindən buna görə vurulub. Azərbaycanlıların öldürülməsi, açıq-aşkar ağır cinayət törədilməsi də ı Azərbaycan iqtidarına bir mesajdır. İqtidarın suverenlik və müstəqillik istiqamətində apardığı siyasətə Rusiyanın dözümsüzlüyünün bir əlamətidir".

Partiya sədri qeyd edib ki, Azərbaycan hökuməti bu cinayətin mütləq günahkarların cəzalandırılması ilə bağlı lazım olan addımları atmalıdır: "Hətta lazım gələrsə beynəlxalq məhkəməyə belə müraciət etmək lazımdır. Mənə elə gəlir ki, Rusiya təyyarə məsələsində olduğu kimi, bu məsələdə də ciddi bir addım atmayacaq. Zaxarovanın da bəyənatından göründü, çox laqeydcəsinə bir mövqe nümayiş etdirdi. Guya heç bir şey olmayıb, guya bu hansısa bir istintaq hərəkətidir. Amma biz açıq şəkildə görürük ki, bu bir cinayətdir. Təbii ki, bundan sonra bu cür addımlar Rusiya-Azərbaycan münasibətlərini nəinki strateji müttəfiqlik, hətta dostluq səviyyəsindən belə aşağıya salacaq. Rusiyanın Azərbaycanı sıxışdırmaq üçün bu cür cığal yanaşmalardan istifadə etməsi, demək olar ki, onun yeganə seçiminə çevrilib. Azərbaycan ictimaiyyətinin bu ölkənin müstəqilliyindən, suverenliyindən bir addım da olsun geri çəkilmək fikri yoxdur. Hakimiyyət də eynilə bu istiqamətdə addım atır".

S. Cəlaloğlunun fikrincə, hazırda ən real təhlükələrdən biri daxilimizdə olan ruspərəst qüvvələrdir: "Əsas məsələ onların neytrallaşmasıdır, çünki Azərbaycan daxilində müəyyən təxribatlar törədə bilərlər: "Adicə İrandakı hadisələr göstərdi ki, orada nə qədər insan İsraillə əməkdaşlıq edib. Ona görə də, aşkar şəkildə hamının tanıdığı ruspərəst qüvvələr ən azı vəzifələrdən uzaqlaşdırılmalıdır. Cəmiyyətdə isə hakimiyyətin apardığı müstəqillik və suverenlik siyasəti doğru-düzgün təbliğ edilməlidir".