"Son günlər gərginliyin artmasında ikinci cəhddə nəticə göstərə bilməyən müəllimlər fəallıq göstərirlər. Ümumilikdə, özünə güvənməyən, repetitorluq edən müəllimlərin toruna düşən, ayrıca kurs rəhbərlərinin təsirinə düşən müəllimlər var ki, onlar artıq özlərini bu məsələdə aldadılmış sayırlar".

Təhsil eksperti Məzahir Məmmədli bu fikirləri Redaktor.az-a sertifikasiya imtahanlarından sonra kütləvi olaraq narazılıq bildirən müəllimlərdən danışarkən bildirdi.

"Çünki sertifikasiya elan olunandan dərhal sonra kursbazlar müəllimlərə hazırlıqlarda 1 aya yüksək nəticə verəcəkləri ilə bağlı yalan vədlər verdilər. Nəticədə özünə güvənməyən müəllimlər onların toruna düşdülər. Bugünkü acınacaqlı vəziyyətin bir nömrəli səbəbkarları məhz o kurs müəllimləri və ya kütləvi olaraq müəllimləri hazırlıqlara cəlb edənlərdir. Hazırlıq keçən müəllimlər heç də digər müəllimlərdən çox savadlı deyillər. Sadəcə onlar ötən illərdəki suallar ətrafında hazırlaşdırmaqla bildirmişdilər ki, yüksək nəticə göstərə bilərsiniz. Həmin müəllimlər sertifikasiyada uğursuzluqla qarşılaşdılar. Başa düşdülər ki, onlara keçən ilin şablon sualları keçilib. Bütün hallarda həmin müəllimlərin cəmiyyətdə geniş müzakirəsini arzulamıram. Yaxşı olar ki, həmin müəllimlər ən qısa zamanda özlərinə öhdəlik qoysunlar. Müəllimlik peşəsi onlara önəmlidirsə, gedib hazırlaşıb MİQ-də yüksək nəticə göstərib, özlərini yenidən müəllim kimi odlu-alovlu sübut edə bilsinlər", - deyə təhsil eksperti bildirdi.