Şirvan Apellyasiya Məhkəməsində seksual xarakterli hərəkətlərə məcbur etmədə təqsirləndirilən Arif Vəliyev və Samir Bəşirovun (hər ikinisin ad, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb.

Pravda.az-ın əldə etdiyi məlumata görə, sonuncu keçirilən prosesdə qərar elan olunub.

Qərara əsasən, apellyasiya protesti qismən təmin edilib, İmişli Rayon Məhkəməsinin hökmü dəyişdirilib, onlara 1 il müddətinə azadlıqdan məhrumetmə cəzası təyin olunub. Təqsirləndirilən şəxslər məhkəmə iclas zalından dərhal həbs ediliblər.

İttihama görə, hadisə 6 may 2024-cü il tarixdə, saat 02 radələrində İmişli rayonu ərazisində qeydə alıbıb.

Belə ki, Arif Vəliyev həmkəndlisi və tanışı Samir Bəşirovla birgə həmkəndliləri M.M. (adı, soyadı şərtidir) ilə evli olan zərərçəkmiş S.S.-in (adı, soyadı şərtidir) yaşadığı evinin həyətində digər şəxslə görüşəcəyi barədə məlumat əldə ediblər. Hər ikisi hasardan keçib qadının həyətinə daxil olub, orada S.S.-in digər şəxslə olan münasibəti barədə ərinə məlumat verəcəklərini bildiriblər. Sonra zərərçəkmiş şəxsi özlərindən asılı vəziyyətə salıb, qadın isə yalvararaq ərinə məlumat verməmələrini xahiş edib. Daha sonra Ariflə Samir S.S.-in mövcud vəziyyətindən istifadə edərək onlar ilə cinsi əlaqədə olacağı halda ərinə məlumat verməyəcəklərini bildiriblər. Qadın da onlarla cinsi əlaqəyə girməyə məcbur olub.

Hadisədən sonra Arif Vəliyev və Samir Bəşirov saxlanılaraq cinayət məsuliyyətinə cəlb ediliblər.

İmişli Rayon Məhkəməsinin hökmü ilə onların hər biri qazancının 15 faizi dövlət nəfinə tutulmaqla 5 ay 14 gün müddətə islah işləri cəzasına məhkum edilmişdi. Hökmdən narazı qalan dövlət ittihamçısı apellyasiya protesti vermişdi.