Ermənistan hakimiyyətinin kilsəyə və ali ruhani təbəqəyə qarşı yönəlmiş hücumları ölkədə milli parçalanmanı dərinləşdirir, erməni kimliyinin əsaslarını sarsıdır və mənəvi böhranı daha da artırır.

Globalinfo.az xəbər verir ki, bu fikirlər Ermənistan Milli Assambleyasındakı “Ermənistan” fraksiyasının yaydığı bəyanatda yer alıb.

“Erməni Apostol Kilsəsi xalqımızın həyatında müstəsna rol oynamış və bu, Konstitusiyada da təsbit olunmuşdur”, – deyə bəyanatda vurğulanır.

Sənəddə Paşinyanın kilsə, onun patriarxı və ruhani rəhbərliyinə qarşı ritorikası erməni xalqının ləyaqətini alçaldan, milli birliyi və dəyərlər sistemini sarsıdan davranış kimi qiymətləndirilib.

Fraksiya nümayəndələri qeyd ediblər ki, mövcud çətin və taleyüklü günlərdə milli qüvvələrin birliyi və qətiyyəti hər zamankindən daha çox vacibdir.

Xatırladaq ki, bir neçə gün öncə Nikol Paşinyan və kilsə arasında gərginlik yaşanmışdı. Ardınca erməni Baş nazirin sosial mediada təhqiramiz paylaşımının da məhz ermənilərin katolikosu II Qareginə ünvanlandığı iddia edilmişdi.