3 iyul 2015-ci il tarixdə Qafqaz Xəbər Agentliyində (qafqaznews.az ) “Gəncə ilə bağlı məlumat ötürənlər cəzalandırılacaq” başlıqlı məqalə dərc olunub. Məqalə Kənan adlı Gəncə sakininin məqalə ilə bağlı redaksiyaya telefon zəngindən bəhs edir. Kənanın dediyinə görə, ganjanews.az saytına rəhbərlik edir və Gəncədə media məsələlərinə baxır. Kənan konkret olaraq 2 iyul tarixdə Qafqaz Xəbər Agentliyində (qafqaznews.az ) dərc olunmuş “Gəncədə 500 min manatlıq yığım başladı” başlıqlı məqalə ilə bağlı öz narazılığını bildirib. Xatırlatma üçün bildirək ki, həmin məqalədə qeyd olunur ki, Avropa Oyunları bitən kimi Elmar Vəliyev məmurları və iş adamlarını toplayaraq tapşırıq verib ki, Gəncədəki yataqxana binalarına üzlük döşəmək və Gəncədə çay qırağında bulvar salmaq üçün mənə təcili 500 min manat pul lazımdır.DSC-3827 Beləliklə icra başçısının pul yığımı mexanizmi işə salınıb. Şəhərdəki müəssisələrdən və məktəblərdən təcili pul yığımı baslayıb. Bütün sahibkarları, iş adamlarını bir-bir çağırıb pul tələb edirlər. Şəhərin memarı Azad Əliyev başçının tapşırığı ilə obyekt sahiblərini çağırtdırıb hər birindən pul tələb edir, əks təqdirdə obyekti sökdürməklə hədələyir. Məqalə böyük maraq doğurduğu üçün digər saytlar tərəfindən də dərc olunub. Məqalə dərc olunandan sonra redaksiyaya zəng edən Kənan bildirib ki, mən Gəncədə media məsələlərinə baxıram: “ Sizin imkanınız varsa, bir Gəncəyə gəlin. Görəcəksiniz ki, hər şey əksinə yazılıb”. Kənan bildirib ki, başa düşmürəm, məgər cənab başçının 500 min manata ehtiyacı var?. Və söhbətin davamında Kənan təkidlə mənbənin kim olduğunu soruşaraq onun cəzalandırılacağını bildirib. Məqələni dərc edən digər saytlarla bağlı isə Kənan bildirib ki, “onlardan xəbəri çıxartdırmaq asandır, istədiyim vaxt çıxartdıra bilirəm…bizim böyük bir qrupumuz var, istəyirsiz deyim ,sizin saytdan da çıxartsınlar”. Kənan sonda bildirib ki, mənə saytdan xəbər çıxartdırmaq lazım deyil… neynirəm, mənə lazımdır ki, əsas mənbəni tapım görüm kimdir: “ Bu informasiyanı sizə kim ötürübdür? Məni əsas maraqlandıran odur”. Biz məsələ ilə bağlı Gəncə ŞİH başçısının 1-ci müavini Naqif Həmzəyevin fikirlərini öyrəndik: “ Bizdə Kənan adlı işçi yoxdur. O, ganjanews.az saytının rəhbəridir. O, icra hakimiyyətinin deyil, sakinlərin adından sizə zəng edib”. İcra başçısının digər müavini Rafiq Şəfiyev isə bildirdi ki, Kənan icra hakimiyyətində mətbuat xidmətinin əməkdaşıdır. Mətbuat Şurasının sədri Əflatun Amaşov isə qafqaznews.org-a bildirib ki, mövcud qanunvericiliyə görə, Gəncə ŞİH mətbuat xidmətinin sizdən mənbə tələb etməsi qanunsuzdur: “ Sayt ancaq məhkəmə qərarından sonra mənbəni açıqlaya bilər”. Məsələ ilə bağlı “Yeni Nəsil” jurnalistlər birliyinin sədri Arif Əliyev Qafqaz Xəbər Agentliyinə bildirib ki, redaksiyadan mənbə tələb etmək qanunsuzluqdur: “ Sizə zəng edən şəxs Gəncədə medianı idarə erdiyini deyir. Onu bildirim ki, əvvəllər media ilə İnformasiya nazirliyi məşğul olurdu ki, o da ləğv olunub. Görünür həmin şəxs elementar şeyləri bilmir”. Yuxarıda qeyd etdiyimiz kimi icra başçısı müavinlərinin dedikləri bir-birini tam inkar edir. Ona görə də həqiqəti öyrənmək qərarına gəldik. Bunun üçün internetdə xırda araşdırma apardıq. Məlum oldu ki, 3 марта 2014-cü il tarixdə ganjanews.az saytının baş redaktoru Kənan Məmmədov “Yeni Azərbaycan” partiyasının Gəncə şəhərindəki qərargahında tədbirdə iştirak edib. (moderator.az). Ganjanews.az saytının məlumatına görə isə Kənan Məmmədov 24 may 2014-cü ildə Gəncə ŞİH-nin nümayəndəsi kimi “Gənc islahatçılar” ictimai birliyinin tədbirində iştirak edib.
