Ukrayna ötən gecə Rusiya ərazisinə, həmçinin Krıma dron zərbələrini davam etdirib.
Musavat.com xəbər verir ki, qubernator Mixail Razvozjayev özünün "Max" kanalında Sevastopol şəhərinin enerji infrastrukturuna hücum səbəbindən elektriksiz qaldığına dair məlumat yayıb:
"Sevastopolun xaricindəki enerji infrastrukturuna düşmən hücumu nəticəsində şəhərimiz müvəqqəti olaraq elektriksiz qalıb. Obyektlər xüsusi rejimə keçirilib və ictimai obyektlər ehtiyat enerji sistemlərinə keçib. Mütəxəssislər hazırda evlərə elektrik enerjisini bərpa etmək üçün əllərindən gələni edirlər".
Qubernator yerli sakinlərə telefon batareyalarını qorumağa və onlardan yalnız təcili rabitə üçün istifadə etməyə, həmçinin elektrik enerjisi bərpa edildikdən sonra evlərindəki elektrik sistemlərini həddindən artıq yükləməməyə çağırıb.
O, həmçinin elektrik kəsilməsi səbəbindən bu səhər trolleybusların işləməyəcəyini açıqlayıb.
Bundan əlavə, Ukrayna Yaroslav Neft Emalı Zavoduna zərbə endirib, zavodda güclü yanğın başlayıb.
Kaluqa qubernatoru Vladislav Şapşa da sənaye müəssisələrinin birində dron hücumu nəticəsində yanğın başladığına dair məlumat yayıb.
Sankt-Peterburqa Ukraynanın 40-dan çox dronla hücum etdiyi bildirilir.
