İyunun 7-də Ermənistanda keçirilmiş parlament seçkilərinin yekun nəticələri iyunun 14-də elan olunacaq.

Bu barədə Ermənistanın Mərkəzi Seçki Komissiyasının sədri Vaaqn Ovakimyan bildirib.Parlament seçkilərində bülletenlərin 100 %-nin emalının yekunlarına əsasən, baş nazir Nikol Paşinyanın "Vətəndaş Müqaviləsi" Partiyası seçicilərin 49,83 % səsini toplayıb.

İkinci yeri iş adamı Samvel Karapetyanla əlaqəli olan və 23,28 % səs toplayan "Güclü Ermənistan" Partiyası tutub. Keçmiş prezident Robert Köçəryanın rəhbərlik etdiyi "Ermənistan" bloku isə 9,93 % səs alıb.

Cənubi Qafqazda geosiyasi proseslərin sürətlə dəyişdiyi bir vaxtda Ermənistanda keçirilən parlament seçkilərinin nəticələri Azərbaycanla münasibətlərin gələcəyi ilə bağlı müzakirələri gündəmə gətirib.

Çünki tərəflər arasında bağlanacaq sülh müqaviləsi regionun gələcək siyasi mənzərəsinə təsir edəcək mühüm hadisələrdən biri hesab olunur. Bəs Nikol Paşinyanın siyasi mövqeyini qoruması tərəflər arasında sülh müqaviləsinin imzalanmasını sürətləndirəcək, yoxsa ləngidəcək?

Mövzu ilə bağlı politoloq Qabil Hüseynli “Cebheinfo.az”-a açıqlamasında bildirib ki, leç bir ləngimə olmayacaq. Onun sözlərinə görə, Paşinyanın qələbəsi sülh prosesinin sürətlənməsinə şərait yaradır:

“Paşinyanın parlament seçkilərində qələbə qazanması həm Ermənistan-Azərbaycan münasibətləri, həm də bütövlükdə region üçün çox böyük əhəmiyyət kəsb edir. Artıq bölgədə revanşist qüvvələrin və Rusiyanın “beşinci kolon”unun müxtəlif qarışıqlıqlar yaratması, etnik münaqişələrə sövq edilməsi və revanşist mövqelərdən çıxış etməsi ən azı bir neçə il müddətinə təxirə düşdü.

Ona görə də mən əminəm ki, Paşinyan Ermənistanı Avropa Birliyinə doğru aparacaq. Bəlkə də ən azından qarşıdakı beş il ərzində o, Ermənistanın Avropa İttifaqına namizəd edə biləcək”.

Politoloq vurğulayıb ki, Ermənistanın gələcəyi Azərbaycanla sülh müqaviləsindən keçir:

“Bundan sonra Ermənistan bu uğurlu başlanğıc üçün mütləq sülh müqaviləsinin imzalanması prosesini sürətləndirməlidir. Hazırda dünyada Ermənistanın imici Azərbaycanla bağlanacaq sülh müqaviləsi ilə ölçülür.

Ermənistan ilk növbədə ən böyük problemlərindən biri olan sülh müqaviləsini bağlayıb, bundan sonra “əlini, qolunu çırmalayıb” rus qoşunlarının ərazilərindən çıxarılması, Avropa ilə inteqrasiyanın dərinləşdirilməsi və Avropa İttifaqının müəyyən etdiyi yol xəritəsinin həyata keçirilməsi istiqamətində addımlar atmalıdır.

Bu seçkilər Ermənistan üçün çox şey vəd edir. Əgər ölkə qarşısında duran vəzifələri düzgün yerinə yetirə bilsə, gələcəkdə dünyanın daha firavan və inkişaf etmiş dövlətlərindən birinə çevrilmək imkanı qazana bilər”.