Azərbaycanda geniş istifadə olunan yüksəkdozalı C vitamini preparatlarından biri olan “Pascorbin” 7.5 g/50 ml ilə bağlı yaxın aylarda mühüm dəyişiklik gözlənilir.

“Pascorbin”in ölkədə qeydiyyat müddəti 21.05.2026-cı ildə başa çatdığı üçün yeni qeydiyyat (yenilənmə) prosesi aparılır və hazırda bu proses davam edir. Bu səbəbdən yaxın dövrdə preparatın yeni partiyasının idxalı müvəqqəti mümkün olmayacaq.

Mütəxəssislərin bildirdiyinə görə, mövcud ehtiyatların tədricən azalması fonunda bu preparatın 2026-cı ilin iyun ayından etibarən apteklərdə satışda tapılmayacağı gözlənilir. Preparatın yenidən satışa çıxarılmasının isə təxminən 2026-cı ilin oktyabr ayına təsadüf edəcəyi proqnozlaşdırılır.

“Pascorbin” 7.5 g/50ml hansı hallarda istifadə olunur?

Mütəxəssislərin sözlərinə görə, yüksəkdozalı C vitamini preparatları aşağıdakı hallarda yalnız həkim nəzarəti ilə tətbiq olunur:

- Onkoloji xəstələrdə (kimyaterapiya alan və almayan pasiyentlərdə) dəstək məqsədilə;

- İmmunitet zəifliyi olan şəxslərdə;

- İnfeksion və virus xəstəliklərində, dəstəkləyici müalicə kimi;

- Vərəm (tuberkulyoz) xəstələrində, əsas müalicə protokolu ilə yanaşı dəstəkləyici məqsədlə;

- Bərpa və reabilitasiya dövründə.

COVID-19 dövrü ilə bağlı qeyd

COVID-19 pandemiyası dövründə yüksəkdozalı C vitamini preparatları bir çox ölkələrdə və klinik praktikada dəstəkləyici müalicə yanaşmaları çərçivəsində istifadə olunub.

Bir çox pasiyentlər bu preparatı həmin dövrdən etibarən daha yaxşı tanıyıb və onu immunitet dəstəyi ilə əlaqələndirib. Bu da preparata olan marağın və istifadə sahəsinin genişlənməsinə səbəb olub.

Bəs yaxın aylarda bu dərmanın yoxluğunu necə sığortalamaq olar?

Məsələ ilə bağlı fikirlərini Bizim.Media ilə bölüşən tibb üzrə fəlsəfə doktoru Abbas Bağırov deyir ki, “Pascorbin”in yaxın aylarda apteklərdə olmaması xüsusilə onu müntəzəm istifadə edən xəstələr üçün çətinlik yarada bilər:

“Amma xəstələr bilməlidirlər ki, burada əsas məsələ konkret marka deyil, C vitamininin hansı formada və hansı məqsədlə qəbul edilməsidir. “Pascorbin” yüksək dozalı inyeksion C vitamini preparatıdır və əsasən ağızdan qəbulun yetərli olmadığı hallarda istifadə olunur. “Paskorbin”i özbaşına dayandırıb və ya dəyişdirib yüksək dozaya keçməsi məsləhət deyil. Xəstələr həkim məsləhəti ilə alternativ C vitamini preparatlarına keçə bilərlər.

Əgər damar daxili terapiya məqsədilə istifadə edilirdisə, eyni təsiri tablet və efervesan preparatlardan gözləmək düzgün deyil. Xüsusilə - onkoloji xəstələr, ağır infeksiyalardan sonra bərpa dövründə olanlar, bağırsaq sorulma problemi olanlar, şəkərli diabetli xəstələr, uzunmüddətli parenteral qidalanma alanların diqqətli olması vacibdir. Çünki inyeksion C vitamini qana daha sürətli və yüksək konsentrasiyada keçir”.

Yüksək dozalı C vitamini hər kəs üçün təhlükəsiz hesab olunmur.

Müsahibimiz bildirib ki, böyrək daşı meyli, böyrək çatışmazlığı və bəzi qan xəstəlikləri olan şəxslər bu preparatlardan ehtiyatla istifadə etməlidir:

“Hazırda bəzi aptek platformalarında preparatın qalıqları görünür, lakin təchizatın məhdudlaşdığı müşahidə olunur.

Xüsusilə damar daxili istifadə olunan yüksək dozalı preparatların dəyişdirilməsi yalnız həkim nəzarəti ilə aparılmalıdır. Yüksək dozalı C vitamini hər xəstə üçün uyğun deyil və nəzarətsiz istifadə böyrək problemlərinə səbəb ola bilər”.