Bu gün şəhər sakinləri tıxaclardan qurtulmaq, gündəlik yolu daha rahat və sürətli getmək üçün elektrikli velosipedlərə (velo) üstünlük verirlər. Bu nəqliyyat vasitəsi həm vaxt həm “cib” qənaəti, həm də alternativ imkan kimi təqdim olunur. Lakin velonun son istifadə qiymətlərinə nəzər saldıqda “cibə qənaət” ifadəsi reallıqdan uzaq qalır.

Müşahidələrə görə, velo ilə 1 km məsafənin qiyməti təxminən 2 manat 50 qəpik - 2 manat 80 qəpik ətrafında dəyişir ki, bu da bəzi hallarda “Bolt” taksi xidmətinin qiymətləri ilə o istiqamət üzrə birəbir eynidir.

O zaman belə bir sual yaranır... Qısa şəhər məsafələrində hansı daha sərfəlidir?

Məsələ ilə bağlı nəqliyyat eksperti Adil Nəbiyev Bizim.Media-ya açıqlamasında bildirib ki, hansı variantın daha sərfəli olması məhz qiymətlə deyil, istifadəçinin prioritetlərindən (qənaət, sürət, rahatlıq) və şəraitindən birbaşa asılıdır:

“Məsafə qısadırsa, tıxac riski yüksəkdirsə və hava şəraiti münasibdirsə, velosiped həm vaxt baxımından daha çevik, həm də əlavə faydalar, məsələn fiziki aktivlik və parklanma problemi olmaması baxımından üstün ola bilər. Xüsusilə şəhər daxilində 2–3 km kimi qısa məsafələrdə velo çox vaxt taksidən daha sürətli nəticə verir.

Əlbəttə ki, taksi komfort, təhlükəsizlik və rahatlıq baxımından üstündür. Çünki sərnişin yorulmur, hava şəraitindən asılı olmur. Xüsusilə gecə saatlarında, uzun məsafələrdə və ya yük olduqda taksi daha məqsədəuyğun seçimə çevrilir.

Eyni zamanda bir neçə nəfər birlikdə hərəkət etdikdə taksi xərci bölündüyü üçün faktiki olaraq daha ucuz başa gələ bilər”.

Ekspert əlavə edib ki, iqtisadi baxımdan fərdi istifadə üçün qiymətlər yaxın olsa da, gündəlik və müntəzəm qısa məsafələrdə velosiped daha sərfəli və rasional seçim sayılır:

“Lakin komfort, vaxtın sabitliyi və risklərin minimuma endirilməsi prioritetdirsə, taksi daha məqsədəuyğundur. 1 km üçün 2 manat 80 qəpik real bazar şərtləri ilə müqayisədə kifayət qədər yüksək görünür. Bu, xüsusilə qısa məsafələrdə istifadəni iqtisadi baxımdan səmərəsiz edə bilər.

Belə tariflər adətən xidmətin rahatlığı, əlçatanlıq və alternativlərin məhdudluğu ilə əsaslandırılsa da, uzunmüddətli perspektivdə istifadəçi məmnuniyyətini azalda və tələbi aşağı sala bilər, buna görə daha balanslı yanaşma kimi dinamik qiymət tənzimlənməsi, pik saatlar və qeyri-pik saatlar üzrə fərqli tariflər, abunə və ya paket sistemləri, eləcə də dövlət və ya bələdiyyə səviyyəsində mikro-mobil nəqliyyatın təşviqi ilə qiymətlərin optimallaşdırılması mümkündür.

Yəni həm xidmət təminatçısı zərər etməz, həm də istifadəçi üçün daha əlçatan və cəlbedici model formalaşar”- deyə, ekspert əlavə edib.