Ali Məhkəmədə dələduzluqda təqsirləndirilən N.Məmmədovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib, Bakı Apellyasiya Məhkəməsinin qərarı dəyişdirilib, “Konstitusiya və Suverenlik ili” münasibətilə amnistiya elan edilməsi haqqında Milli Məclisinin 19 dekabr 2025-ci il tarixli qərarının 3.1-ci bəndinə əsasən N.Məmmədovun təqsirli bilindiyi Cinayət Məcəlləsinin 178.2.1, 178.2.2 və 178.2.4-cü maddələri ilə təyin edilən 3 il 6 müddətinə azadlıqdan məhrumetmə cəzası 6 ay azaldılıb.

İttihama görə, N.Məmmədov etibardan sui-istifadə etmə və aldatma yolu ilə özgənin əmlakını təkrarən, xeyli miqdarda ziyan vurmaqla ələ keçirib. O, vahid cinayətkar niyyət əsasında müxtəlif şəxsləri aldadıb.

Belə ki, N.Məmmədov ilk olaraq 07 oktyabr 2023-cü il tarixdə Bakı şəhəri, Xətai rayonu, metronun “Əhmədli” stansiyası yaxınlığında zərərçəkmiş S.S.-i (adı, soyadı şərtidir) avtomobil alaraq taksi fəaliyyəti ilə məşğul olub gəlir əldə edəcəyi adı ilə aldadıb. Bu bəhanə ilə 2023-cü ilin dekabr ayının son on günündə və həmin ayın 25, 27 və 29-u tarixlərində müxtəlif məbləğlərdə – ümumilikdə 11 200 manat pul vəsaitini hissə-hissə alaraq ələ keçirib. Verilən vədlər yerinə yetirilməyib və zərərçəkmiş şəxsə xeyli miqdarda maddi ziyan vurulub.

Bundan başqa, N.Məmmədov 2024-cü ildə digər bir şəxsi də aldadıb. O, Bakı şəhəri, Suraxanı rayonu, Hövsan qəsəbəsində vizual olaraq “Apple” şirkətinin istehsalı olan “iPhone 15 Pro Max” modelinə bənzər, lakin real dəyəri 170 manat olan mobil telefonu 1950 manata sataraq zərərçəkmiş X.X.-ni (adı, soyadı şərtidir) aldadıb və ona maddi ziyan vurub.

Araşdırmalarla müəyyən edilib ki, təqsirləndirilən şəxs avtomobil alqı-satqısı adı altında da çoxsaylı dələduzluq əməlləri törədib. Belə ki, o, 04 mart 2024-cü il tarixdə zərərçəkmiş K.K.-yə (adı, soyadı şərtidir) məxsus dəyəri 15 500 manat olan “Mercedes” markalı avtomobili satmaq adı ilə bir həftə ərzində pulunu ödəyəcəyinə dair yalan vəd verərək “Park Bulvar” ticarət mərkəzinin qarşısında “mobil notariat” tətbiqi vasitəsilə etibarnamə alıb və avtomobili ələ keçirərək sonradan başqa şəxsə satıb. Bu yolla zərərçəkmiş şəxsə 15 500 manat məbləğində ziyan vurulub.

İstintaqla həmçinin müəyyən olunub ki, N.Məmmədov əvvəlcədən razılaşdığı atası ilə birlikdə qrup halında da cinayət törədib. Belə ki, o, zərərçəkmiş H.H.-yə (adı, soyadı şərtidir) “Lexus RX 300” markalı avtomobil satacağı vədi ilə 25 və 26 mart 2024-cü il tarixlərində müxtəlif məbləğlərdə ümumilikdə 7 000 manat pul alıb. Bu zaman zərərçəkmiş şəxsin etimadını qazanmaq üçün atası tərəfindən notariat qaydasında etibarnamə verilib. Lakin sonradan vəd yerinə yetirilməyib və vəsait mənimsənilib.

Digər epizod üzrə N.Məmmədov 07 avqust 2024-cü il tarixdə Bakı şəhəri, Nizami rayonu ərazisində yerləşən notariat kontorunda zərərçəkmiş M.M.-ə (adı, soyadı şərtidir) məxsus “Chevrolet Aveo” markalı avtomobili 8 000 manata alacağına dair yalan vəd verərək etibarnamə alıb və avtomobili ələ keçirib.

Bundan əlavə, o, 12 avqust 2024-cü il tarixdə zərərçəkmiş L.L.-ə (adı, soyadı şərtidir) məxsus “Kia Rio” markalı, dəyəri 18 000 manat olan avtomobili almaq adı ilə aldadaraq etibarnamə alıb və nəqliyyat vasitəsini aşağı qiymətə sataraq əldə etdiyi pulu mənimsəyib.

Son olaraq, N.Məmmədov 20 avqust 2024-cü il tarixdə zərərçəkmiş B.B.-yə (adı, soyadı şərtidir) məxsus “Chevrolet Cruz” markalı avtomobili satmaq adı ilə aldatma yolu ilə digər şəxsin adına etibarnamə rəsmiləşdirərək nəqliyyat vasitəsini ələ keçirib və nəticədə zərərçəkmiş şəxsə 12 000 manat məbləğində maddi ziyan vurub.

Toplanmış sübutlarla müəyyən edilib ki, N.Məmmədov bütün hallarda eyni cinayətkar sxemdən istifadə edərək vətəndaşların etibarını qazanıb, yalan vədlər verməklə onların pul və əmlaklarını ələ keçirib və nəticədə zərərçəkmiş şəxslərə xeyli miqdarda maddi ziyan vurub.

Sabunçu Rayon Məhkəməsinin hökmü ilə o, 3 il 6 ay müddətinə azadlıqdan məhrum edilib. Bakı Apellyasiya Məhkəməsinin qərarı ilə apellyasiya şikayəti təmin olunmayıb.