Hörmüz boğazı kimi əsas tranzit marşrutunun qeyri-müəyyənliyi beynəlxalq aviasiya sektorunu ciddi təhdid altına alıb. Belə ki, Beynəlxalq Enerji Agentliyinin məlumatına görə, Avropada cəmi 6 həftəlik aviayanacaq qalıb. Hörmüz boğazı açılmasa uçuşlar ləğv ediləcək. Qlobal enerji təchizat zəncirində yaranan hər bir böhran yeni risklərlə yanaşı, strateji fürsətlər də doğurur.

Avropada aviayanacaq ehtiyatlarının kritik səviyyəyə enməsi enerji resursları ilə seçilən Azərbaycan üçün regional və qlobal baxımından mühüm fürsət kimi dəyərləndirilə bilərmi?

Millət vəkili Vüqar Bayramov Bizim.Media-ya bildirdi ki, Azərbaycan Avropa enerji bazarında mühüm tərəfdaş kimi çıxış edir. Xüsusilə İtaliya ilə bu sahədə uzunmüddətli və etibarlı əməkdaşlıq mövcuddur.

Bu əməkdaşlıq çərçivəsində Azərbaycan nefti Avropaya əsasən Bakı-Tbilisi-Ceyhan neft kəməri vasitəsilə nəql olunur ki, bu da Avropanın enerji təchizatında vacib rol oynayır:

“Qlobal enerji bazarında sabitlik Azərbaycanın iqtisadi maraqlarına daha uyğundur. Çünki qısa müddətli kəskin qiymət artımları adətən sonradan enişlə müşayiət olunur və bu, uzunmüddətli planlaşdırma baxımından risk yaradır. Buna görə də Azərbaycan daha çox sabit enerji bazarının tərəfdarıdır”.

Deputat vurğulayıb ki, Azərbaycan Avropaya neft ixracını mövcud müqavilə və öhdəliklər çərçivəsində davam etdirir və bu istiqamətdə etibarlı tərəfdaş kimi mövqeyini qoruyur. Eyni zamanda, xam neftlə yanaşı digər yanacaq məhsullarının da ixracı potensialı mövcuddur.

Bu istiqamətdə istehsalın artırılması gələcəkdə ixrac həcmlərinin genişlənməsinə şərait yarada bilər. Lakin bütün hallarda Azərbaycan öz mövcud müqavilə öhdəliklərinə sadiq qalaraq xam neft ixracını əvvəlcədən müəyyən edilmiş həcmdə davam etdirməyi planlaşdırır.