Xəbər verdiyimiz kimi, Rusiya Mərkəzi Bankı beynəlxalq ödənişlər üzərində nəzarəti genişləndirərək banklara xarici şirkət və şəxslərin valyuta əməliyyatları ilə yanaşı, qiymətli metallar, veksellər və rəqəmsal maliyyə aktivləri vasitəsilə həyata keçirilən ödənişləri də izləməyi məcburi etməyi planlaşdırır.
Mövcud qaydalar əsasən, Rusiya rezidentlərinin əməliyyatları ilə məhdudlaşırdı. Lakin bazar iştirakçılarının getdikcə daha çox alternativ ödəniş mexanizmlərinə yönəlməsi səbəbilə yeni tənzimləməyə ehtiyac duyulduğu bildirilir.
Məlumatlara görə, bu tənzimləmə çərçivəsində banklar xarici müştərilərin valyuta əməliyyatlarını qeydiyyata almaq üçün yeni təsnifat sistemi yaratmalı olacaqlar.
Xüsusilə veksellər, qiymətli metallar və rəqəmsal aktivlərlə bağlı əməliyyatlar şəffaf olmayan ödənişlərdə istifadə olunma potensialına görə ayrıca kodlaşdırılacaq.
Rəsmilər bu addımın bazar iştirakçıları üçün əlavə məhdudiyyət yaratmadığını, xarici tərəflərin əlavə sənəd təqdim etməsinə ehtiyac olmadığını və bütün məlumatların banklar tərəfindən avtomatik şəkildə qeydə alınacağını vurğulayıblar.
Mütəxəssislər hesab edirlər ki, bu tənzimləmənin əsas məqsədi ölkənin bank sistemindəki valyuta hərəkətləri barədə daha əhatəli məlumat əldə etmək və mövcud nəzarət sistemindəki boşluqları aradan qaldırmaqdır.
Bəs bu dəyişikliyin Azərbaycana hansı təsirləri ola bilər?
Mövzu ilə bağlı “Cebheinfo.az”-a açıqlama verən iqtisadçı-ekspert Eyyub Kərimli bildirib ki, bu dəyişikliyin Azərbaycana müəyyən təirləri ola bilər:
“Rusiya nə qədər çox sanksiyalar tətbiq edirsə, bir o qədər də onun iqtisadiyyatında çətinliklər artır, məhdudiyyətlər çoxalır. Bu, sözsüz ki, Rusiya iqtisadiyyatına mənfi təsir göstərir. Pul köçürmələrinə qoyulan məhdudiyyətlər də bu gün Rusiyada həm sahibkarlıq istiqamətində, həm də xarici iqtisadi ticarət əlaqələri sahəsində mənfi təsirlər yaradır.
Belə ki, Rusiya banklarının sistemdən ayrılması, bankların müəyyən qismini iflic vəziyyətinə çatdırıb. Bu isə Rusiya partnyorlarına da mənfi təsir göstərir. Hazırda Rusiya ilə Azərbaycan arasında ticarət əməkdaşlığı mövcuddur və Rusiyanın köklü sistemindəki problemlər həm Azərbaycan sahibkarlarının, həm də Rusiyada yaşayan azərbaycanlıların bu istiqamətdə fəaliyyətinə mənfi təsir göstərir”.
Ekspert qeyd edib ki, bu dəyişiklik Rusiyada yaşayan azərbaycanlılara elə də böyük çətinlik yaratmayacaq:
“Məhz Rusiyanın Azərbaycanda müəyyən bankları mövcuddur. Digər tərəfdən isə müxtəlif - “Zolotaya Korona” və digər pulköçürmə xidmətləri vasitəsilə maliyyə əməliyyatlarını həyata keçirmək mümkündür. Bu dəyişikliyin müəyyən təsirləri ola bilər.
Rusiya hansısa tərəfdaş ölkəsi ilə pulköçürmə sistemi yarada bilər. Hesab edirəm ki, bu dəyişikliklər həm Rusiya–Azərbaycan, həm də digər tərəfdaş ölkələr arasındakı dövriyyəyə mənfi təsir göstərəcək və eyni zamanda Rusiyanın ixrac imkanlarını da xeyli məhdudlaşdıracaq”.
Əkrəm Həsənov bildirib ki, bu addımın məqsədi ölkədən pulun çıxarılmasının qarşısını almaqdır:
“Ümumiyyətlə, 2022-ci ildən bəri bu çətinliklər daim mövcuddur. Amma Rusiya gün keçdikcə bu qaydaları daha da sərtləşdirir ki, ölkədən pulun çıxarılmasının qarşısını alsın. Bu dəyişiklik həm Azərbaycan vətəndaşları, həm də şirkətlər üçün Rusiya ilə əlaqələr baxımından problemlərin artmasına səbəb olacaq”.
