“Azərpoçt” MMC tərəfindən elan olunan bir neçə tender müsabiqəsi baş tutmayıb.

"DİA-AZ" xəbər verir ki, qurum yük avtomobillərinin və poçt məntəqəsinin alınması ilə bağlı 3 tender elan etmişdi, lakin onların hamısı ləğv edilib.

Birinci tender kompakt van tipli qapalı furqon yük avtomobillərinin alınmasına aid idi. Ümumi ehtimal olunan dəyəri 181 071 manat olan bu tender çərçivəsində 3 ədəd avtomobilin satın alınması nəzərdə tutulmuşdu. Tenderin dərc tarixi 30 iyul 2025-ci il saat 16:20 göstərilmiş, təkliflərin qəbulu və zərflərin açılışı isə 21 avqust 2025-ci il saat 11:00-a təyin olunmuşdu.

İkinci tender də analoji olaraq yük avtomobillərinin, bu dəfə van tipli qapalı furqonların alınması üçün elan edilmişdi. Bu dəfə də 3 ədəd yük avtomobilinin alınması planlaşdırılırdı. Tenderin ehtimal olunan dəyəri 248 685 manat təşkil edirdi. Müsabiqə 30 iyul 2025-ci il saat 12:44-də dərc olunmuşdu, təkliflərin qəbulu və açılış prosesi isə yenə 21 avqust 2025-ci il saat 11:00-a təyin edilmişdi.

Üçüncü tender isə konteyner tipli poçt məntəqəsinin satın alınması ilə bağlı idi. Bu tenderin ehtimal olunan dəyəri 176 517 manat olub. Müsabiqə 29 iyul 2025-ci il saat 16:03-də dərc edilmişdi, təkliflərin son qəbulu və açılışı tarixi də eyni qaydada 21 avqust 2025-ci il saat 11:00-a təsdiq olunmuşdu.

Hər üç tenderin ləğv edilmə səbəbi eyni olub: satınalmada iştirak etmək üçün təklif və təminat təqdim etmiş, tələb olunan lisenziyaya və ya icazəyə malik təchizatçıların sayı üçdən az olduğuna görə, “Dövlət satınalmaları haqqında” Qanunun 36.1.1-ci maddəsinə uyğun olaraq müsabiqələrin keçirilməsi mümkün sayılmayıb. Nəticədə, “Azərpoçt” MMC-nin elan etdiyi bütün bu 606 273 manatlıq tenderlər baş tutmayıb.