“Biz indi beynəlxalq səhnədə daha fəalıq. Bizim digər ölkələr arasında vasitəçilik səylərinə gəldikdə, bunlar tam aydındır".
Bu fikirləri Prezident İlham Əliyev III Şuşa Qlobal Media Forumunun iştirakçıları ilə görüşündə səsləndirib.
Dövlətimizin başçısı əlavə edib ki, biz beynəlxalq ictimaiyyətin fəal üzvüyük və fərqli beynəlxalq iştirakçılarla güclü münasibətlərimiz var: "Düşünürük ki, onlar daha mühüm, daha əhəmiyyətli rol oynaya bilərlər. Ən azı daha geniş regional məsələlərdə rol oynaya bilərlər".
Milli Məclisin deputatı, Ana Vətən partiyasının sədr müavini Günay Ağamalı “Sherg.az”a bildirib ki, beynəlxalq münasibətlər sistemində əsaslı dəyişikliklərin baş verdiyi bu dövrdə qlobal güc balanslarının dəyişməsinin, regional münaqişələrin artmasının və iqlim böhranı kimi çoxşəxəli proseslərin şahidi oluruq:
“Bu çətin və bir o qədər mürəkkəb geosiyasi şəraitdə Azərbaycan uğurlu diplomatik fəaliyyəti və risklər fonunda öz mövqeyini gücləndirən nadir ölkələrdəndir. Artıq ölkəmiz beynəlxalq arenada etibarlı tərəfdaş, sülh təşəbbüskarı və regional sabitliyin təminatçısı kimi tanınır. Burada əsas faktor Azərbaycanın İkinci Qarabağ Müharibəsindən sonra regionda formalaşdırdığı yeni geosiyasi konfiqurasiyadır. Biz qalib dövlər olaraq həm ərazi bütövlüyümüzü bərpa etdik, həm də regionda uzunmüddətli sülh və əməkdaşlıq perspektivlərini gündəmə gətirdik. Bütün bunlar diplomatiyamızın kəmiyyət və keyfiyyət göstəriciləri baxımından yeni müstəviyə keçdiyinin göstəricisidir. Cənab Prezident İlham Əliyevin
III Şuşa Qlobal Media Forumunun açılışı zamanı səsləndirdiyi fikirlər onu deməyə əsas verir ki, Azərbaycanın xarici siyasət strategiyası təkcə Cənubi Qafqazla yekunlaşmır. Rəsmi Bakı öz təsir dairəsini sürətlə genişləndirir. Bura Avropa məkanında qurulan siyasi-iqtisadi əlaqələr, Türkiyə-Pakistan və Azərbaycan üçbucağında formalaşan təhlükəsizlik çətiri, Çinlə yüksələn diplomatik münasibətlər, ABŞ-lə artan dialoq və Yaxın Şərqdəki proseslərdə iştirak daxildir. Nümunə olaraq bir neçə gün əvvəl Suriya keçid hökumətinin Prezidenti Əhməd əş-Şaaranın ölkəmizə rəsmi səfərə gəlməsi və diplomatik təmaslarını göstərmək olar. Azərbaycan Suriyanın yenidən qurulmasında və enerji təhlükəsizliyini təmin etməsində öz töhfəsini verməyə hazırdır”.
Deputatın sözlərinə görə, Yaxın Şərq kimi gərgin və geosiyasi maraqların toqquşduğu bir regionda sabitləşdirici rolunu üstlənmək kiçik bir diplomatik proses deyil:
“Bu uğurlu beynəlxalq fəaliyyətin və cənab Prezident İlham Əliyevin simasında Azərbaycana duyulan inamın göstəricidir.
Ulu Öndər Heydər Əliyevin təməlini qoyduğu balanslaşdırılmış və çoxşaxəli xarici siyasət strategiyası bundan sonra daha böyük uğurlar qazanmağamıza vəsilə olacaq və Azərbaycan yeni qlobal nizamda böyük güclər arasında öz layiqli yerini qazanacaqdır”.
