. 

"Nazir müəllimlərdən "alma", "şaftalı" kimi belə səhvlər tapmayıbsa, deməli, irəliləyiş var. Müəllim imtahandan heç vaxt çəkinməməlidir. İstər sertifikasiya imtahanı olsun, istər MiQ imtahanı, istərsə də digər imtahanlar. Bu, çox maraqlı mövzudur. Bizim müəllimlərin ən böyük qüsuru ondan ibarətdir ki, onların böyük hissəsi mütaliə etmir. Yəni müəllim konkret olaraq standartlara uyğun olan və təsdiq olunmuş proqramlarda yazılmış dərsliklərlə kifayətlənməməlidir. Geniş mütaliə vacibdir ki, şagirdlərinə də məlumat versinlər".

Bu fikirləri Redaktor.az-a açıqlamasında təhsil eksperti Etibar Əliyev sertifikasiyaya imtahanında müəllimlərin uğursuz nəticə əldə etməsindən danışarkən bildirdi.

"Bu sertifikasiya imtahanları artıq neçə ildir ki, tətbiq olunur. Elə indi də nəticələr ümumi olaraq ürəkaçan deyil. Mən imtahan sualları nə qədər çətindir, asandır deyə bilmərəm, amma əslində onlar buna bir növ hazırlaşmalı idilər. Əgər müəllim imtahana hazırlaşmır və ya hazırlaşa bilmirsə, aşağı nəticə göstərirsə, deməli, o, tədris prosesinə də bu cür məsuliyyətsiz yanaşır. Verdiyi biliklər də o zaman səthi xarakter daşıyır. Səthi xarakter daşıması, şübhəsiz, DİM-in keçirdiyi imtahanlarda özünü açıq şəkildə göstərir. Bunlar bir-biri ilə çox məntiqi şəkildə bağlı olan məsələlərdir. Yəni orta məktəb şagirdləri 40–60%-ə qədər dərsi, mövzunu mənimsəyə bilmirlər. Bu, tədris zəifliyi ilə bağlıdır".

Ekspert qeyd etdi ki, öyrətmək hər zaman öyrənməkdən çətin olub.

"Ona görə də bu sertifikasiya imtahanları da göstərir ki, müəllimlər hazırlaşmırlar. Oxuduqlarını, keçdiklərini gəlib test vasitəsilə şagirdlərə mənimsəmə adıyla dərslər keçirlərsə, bu, yetərli deyil, yetərli ola da bilməz. Buna görə də düşünürəm ki, aşağı bal yığan müəllimlər məktəbdə qalmamalıdır. Mənim düşüncəmə görə məktəbdə qala bilməzlər. Bir neçə ildir ki, sertifikasiya imtahanı keçirilir. Bu aşağı nəticə də onu göstərir ki, bunlar hazırlaşa bilmirlər. Keçdikləri fənni bilmirlər. Bu, ondan irəli gəlir ki, köhnə dərs deyən müəllimlər mütaliə etmirlər, bilik dairələrini genişləndirmirlər. Yeni pedaqoji fəaliyyətə cəlb olunanlar isə hələ oxuduqları ali məktəblərdəki keyfiyyətsiz təhsillə kifayətlənirlər. Yəni müəllim hər gün öz üzərində işləməlidir. Hər gün bilik axtarışında olmalıdır. Bu, təhsil qanununda var. Təhsil alanların və təhsil verənlərin öz funksiyası var. Bu mənada mən düşünürəm ki, bu imtahanın özü bir göstəricidir. Əgər testlər çətinləşdirilsəydi, lap çox müəllim kəsilmiş və ya aşağı nəticə əldə etmiş olardı. Ona görə də bunun özü çox ciddi siqnaldır. Bu, bir həyəcan təbilidir ki, müəllim imtahan verə bilmir. Müəllim imtahan verə bilmirsə, şübhəsiz ki, onların hazırladığı şagirdlər də zəif olacaq", - deyə Etibar Əliyev vurğuladı.