“Quru sərhədlərin bağlı olması ilə əlaqədar uzun müddətdir, siyasətçilər və digərləri tərəfindən müxtəlif fikirlər səsləndirilir. Ancaq bu gün İran və İsrail arasındakı vəziyyət bir daha sübut edir ki, dövlət başçısının sərhədlərin bağlı olması istiqamətində gördüyü tədbirlər, verdiyi qərarlar, həqiqətən, vacibdir və bu gün də o vaciblik özünü göstərir”.

Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.

O bildirib ki, müxtəlif mənbələrdən xoşagəlməz məlumatlar sızır: “Guya Azərbaycan ərazisindən İran ərazisinə casusluq, kəşfiyyat məqsədilə kimlərsə göndərilib. Bunlar əsası olmayan, şər-böhtan fikirlərdir. Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri çox hörmətli Hikmət Hacıyev də təkzib etdi, bildirdi ki, yayılan məlumatlar həqiqətə uyğun deyil. Hazırda sərhədlərimizin bağlı qalması təhlükəsizliyimiz üçün çox vacibdir. Və bu vaciblik artıq təsdiqini tapmaqdadır. Həm İsrail, həm də İran tərəfi qarşılıqlı olaraq uzaqmənzilli silahlardan, təyyarələrdən, raketlərdən, pilotsuz uçuş aparatlarından, dronlardan istifadə edirlər. Nə olacağını bilmək olmaz. Hansı təhlükə gözlənilə, İranın nüvə obyektlərinə olan zərbələrdən hansı təhlükələr gələ bilər? Yaxud təhlükə hiss edib, sərhədlərimizi pozmaq fikrində olanlar nələr edə bilərlər? Hesab edirəm, sərhədlərimiz daha da etibarlı qorunmalıdır, öz təhlükəsizliyimiz üçün müvafiq tədbirlər görməliyik, görürük də. Yüksək səviyyədə bu məsələlər həllini tapır. Sərhədlərin bağlı saxlanılması bu gün həm dövlətçiliyimizin, həm də əhalimizin təhlükəsizliyi üçündür”.