Ermənistanın Baş naziri Nikol Paşinyanın Qurban bayramı münasibətilə Azərbaycan xalqına ünvanladığı təbrik mesajı ictimaiyyətin və ekspert dairələrinin diqqətini çəkib. Bəzi müşahidəçilər Paşinyanın bu addımını sülh prosesi və Zəngəzur dəhlizi istiqamətində etimadın möhkəmlənməsi üçün diplomatik siqnal kimi görsələr də, digərləri simvolik jest hesab edirlər.

Ermənistanda və Azərbaycanda birmənalı qarşılanmayan bu jest İrəvan–Bakı münasibətlərində yeni bir mərhələnin başlanğıcı kimi qiymətləndiriləcəkmi?

Globalinfo.az-a danışan deputat Elçin Mirzəbəyli bildirib ki, Paşinyanın Qurban bayramı ilə bağlı təbrikini Zəngəzur dəhlizi ilə əlaqələndirilmək düzgün deyil:

“Ermənistanın guya sülh tərəfdarı olduğunun nümayişinə xidmət edən bu təbrikin alt və ya üst qatında, yanında-yörəsində heç bir mesaj-filan yoxdur. Dünyadakı bütün problemlər bir təbrik mesajı ilə həll olunsaydı, o zaman müharibə və münaqişələrə heç bir ehtiyac qalmazdı, BMT Nizamnaməsini də təbrik mətnləri əvəz edərdi.

Ola bilsin ki, hazırda hakimiyyəti üçün, daxildən ciddi problemlərin yarandığını, kilsə-baş nazir qarşıdurmasının, hazırda kənardan daha ciddi şəkildə körükləndiyini, nüfuz müvəkkilləri şəbəkəsinin Eçmiədzin vasitəsilə hərəkətə gətirildiyini çox yaxşı başa düşən Nikol Paşinyan Azərbaycana yönəlik Qurban bayramı mesajı ilə həm də tərs köşədən hərəkət etmək, kilsəni və tarix boyu şərin beşiyi rolunu oynayan bu təsisatla “ittifaqda” olan müharibə canilərini qıcıqlandırmaq, ona qarşı hazırlanan planın tez bir zamanda üzə çıxması üçün hadisələri tezləşdirmək qərarına gəlib.

Elçin Mirzəbəyli

Bu baxımdan, biz 2026-cı ilin seçkilərinədək Ermənistanda proseslərin süni şəkildə intensivləşdirildiyinin, hətta kilsə və “beşinci kolon”nun hadisələrin inkişaf dinamikası və təhrikçi addımların təsiri altında da yer aldıqları çevriliş səhnələşdirilməsinin də şahidi ola bilərik. İndi Ermənistanın ümumi siyasi mənzərəsi ondan ibarətdir ki, Nikol Paşinyan seçkilərədək kilsənin bütün təxir imkanlarını sıradan çıxarmaq, neytrallaşdırmaq, kilsənin rəqiblərinə dəstək vermək imkanlarını sıradan çıxarmaq istəyir”.