“Rusiya prezidentinin köməkçisi Vladimir Medinskinin Qarabağla Donbas arasındakı müqayisəsi yersizdir”.

Teleqraf xəbər verir ki, bunu politoloq Elxan Şahinoğlu deyib.

Ekspert vurğulayıb ki, V.Medinskinin Qarabağla Donbas arasında apardığı uğursuz müqayisə yalnız onun beyninin məhsulu deyil:

“Qarabağı hələ də “mübahisəli ərazi” kimi təqdim edən ölkə (Rusiya) Azərbaycanın strateji tərəfdaşı olmadığı kimi, ona heç bir halda Xankəndidə konsulluq xidməti açmağa “yaşıl işıq” yandırıla bilməz. Rusiya Xarici İşlər Nazirliyinin sözçüsü Mariya Zaxarova prezidentin köməkçisi Vladimir Medinskinin sözlərini kontekstdən çıxarmamağa və onlara tamamilə fərqli bir məna verməməyə çağırıb.

Biz heç nəyi kontekstindən çıxarmırıq və faktları təhrif etmirik. Prezidentin köməkçisi “Russia Today” kanalına müsahibəsində bunu deyib: “Əgər Rusiya-Ukrayna cəbhə xətti boyu münaqişə dayandırılarsa və əsl sülh əldə olunmazsa, sadəcə hansısa atəşkəs sazişi bağlanılarsa, region Ermənistanla Azərbaycan arasındakı mübahisəli bölgəyə - nəhəng Qarabağa çevriləcək”.

Yəni Medinski demək istəyib ki, Rusiya ilə Ukrayna arasında atəşkəs olarsa, Kreml istəyinə nail ola bilməyəcək və Donbas Qarabağ kimi “mübahisəli ərazi”yə çevriləcək. Bu baş verməsin deyə, Kreml Ukraynada məsələni “köklü” həll etmək istəyir.

Birincisi, Azərbaycan Qarabağı işğaldan azad edib, Rusiya isə Donbası işğal edib. İkisi arasında ən böyük fərq budur.

İkincisi, keçmiş işğalçı dövlət olan Ermənistanın hakimiyyəti müharibədən sonra Qarabağı Azərbaycan ərazisi kimi tanıyıb, Ukrayna isə işğal altındakı ərazilərin Rusiyaya aid olduğunu qəbul etməyib.

Bir məqamı da nəzərə almalıyıq ki, Medinskinin Qarabağla Donbas arasında apardığı uğursuz müqayisə yalnız onun beyninin məhsulu deyil, köməkçisi olduğu şəxs (Vladimir Putin) də onun kimi düşünür, sadəcə Azərbaycan ordusunun qələbəsi Kreml sahibinə reallığı qəbul etməyə məcbur edib. Ancaq belə bir adamın bir gün reallığı dəyişdirmək istəyində olmadığından əmin ola bilmərik”.