Ölkənin ən böyük biznes tədbirlərindən biri olan Milli Marketinq Forumu (MMF) bu il "Neoklassika" konsepti ilə 10-cu illiyini qeyd edib. Forum 9-10-11 may tarixlərində, ilk dəfə keçirildiyi məkan olan 28 Mall "CinemaPlus"da təşkil edilib. Forum çərçivəsində müzakirə olunan mövzular, marketinq sahəsinin hazırkı çağırışları və gələcək inkişaf istiqamətləri baxımından aktual olmaqla yanaşı, iştirakçılara praktik bilik və ilham verəcək dəyərli çıxışlar edilib.

Tədbirin rəsmi media tərəfdaşı Bizimyol.info xəbər verir ki, forumun ikinci günündə keçirilən "Milli Keyslər" panelində “Code Academy”nin təsisçisi Ülvi Aslanov spikerlər sırasında yer alıb.

“Təhsili əyləncəli modelə çevirmək lazımdır. Çünki təhsil, oxumaq, öyrənmək insanlara çətin yol kimi görünür. Biz kimnənsə yarışmaq, rəqib olmaq üçün bu biznesə girməmişik. Biz təhsili iş modeli olaraq qurmuşuq”,-deyə Ülvi Aslanov, bildirib.

Spiker kürsüsündə yer alan “Senser” şirkətinin təsisçisi Sübhan Hüseynov da yer alıb. Onun sözlərinə görə, onlar biznesə “Binə bazarı”ndan başlayıblar.

“İşə başlayan zaman onu qismən analiz etmək lazımdır. Daha sonra işə həmin işə sevginizin, marağınızın olub-olmamısa baxılmalıdır. Çünki hər bir işdə sevgi önəmli faktordur”,-deyə Sübhan Hüseynov vurğulayıb.

Tədbirdə spiker kimi çıxış edən “Qanun nəşriyyatı”ın direktoru Şahbaz Xuduoğlu qeyd edib ki, ədalət olan yerdə güclü biznes qurmaq mümkündür.

“Mənə görə kitab alan adamın əli öpülməlidir. Onlar da bizim qəhrəmanlarımızdır. Qanun nəşriyyatı Azərbaycanda kitab oxunmayan bir zamanda gündə bir kitab buraxır. İnsan özü kimi olduqda biznesdə də uğur qazana bilir. 90-cı illərdə Karnegini oxuduqda anlaya bilmirdim. Biz öyrəşmişdik ki, bir sistemə daxil olursan və axın səni aparır. Amma belə deyilmiş. Axını sən özün dəyişirsən”,-deyə Şahbaz Xuduoğlu bildirib.

bizimyol.info