Xəbər verdiyimiz kimi, 20–21 may tarixlərində Macarıstanın paytaxtı Budapeştdə Türk Dövlətləri Təşkilatının (TDT) liderlərinin qeyri-rəsmi Zirvə Toplantısı keçiriləcək. Prezident İlham Əliyevin Macarıstanın Baş naziri Viktor Orbanın dəvəti ilə tədbirdə iştirakı gözlənilir.
Zirvə öncəsi beynəlxalq kontekstdə diqqətçəkən başqa bir məsələ isə Avropa İttifaqının (Aİ) Mərkəzi Asiya ölkələrinə ayıracağı 12 milyard dollarlıq paketdir. Bəzi analitiklər bu təşəbbüsü Aİ-nin bölgədə nüfuzunu artırmaq və TDT ölkələri arasında siyasi çəki balansını dəyişmək cəhdi kimi qiymətləndirirlər. Bu baxımdan, Budapeştdə keçiriləcək zirvənin zamanlaması və gündəliyi təkcə regional deyil, həm də geosiyasi baxımdan mühüm əhəmiyyət daşıyır.
Globalinfo.az-a danışan politoloq Sultan Zahidov bildirib ki, Budapeştdə əvvəlcədən planlaşdırılmış görüşdə mühüm regional və qlobal məsələlər müzakirə olunacaq:
“Azərbaycan Türk Dövlətləri Təşkilatının (TDT) üzvüdür və təşkilatda mühüm rola malikdir. Prezident İlham Əliyevin sözügedən tədbirdə iştirakı gözlənilən idi. Səfər çərçivəsində TDT çərçivəsində əlaqələrin dərinləşdirilməsi, nəqliyyat, enerji, investisiyalar və digər aktual məsələlər müzakirə olunacaq”.
Sultan Zahidov
Politoloq həmçinin Avropa İttifaqı (Aİ) ilə əlaqələrə də toxunub:
“Bir neçə gün öncə Türkiyə Prezidenti Rəcəb Tayyib Ərdoğan və Prezident İlham Əliyevin Avropa İttifaqının siyasi platformasında keçirdiyi görüşlər bu qurumla münasibətlərin normallaşdığını göstərir.
Bu, göstərir ki, həm Türkiyə, həm də Azərbaycanın Aİ ilə münasibətləri normal məcraya dönür. Siyasi münasibətlər artıq bərpa olunub. Aİ-nin Mərkəzi Asiya istiqamətində açılımı isə gözlənilən idi. Rusiya-Ukrayna müharibəsi fonunda Avropa İttifaqı alternativ enerji və nəqliyyat marşrutlarına ehtiyac duyur, əlavə resurslar əldə etmək istəyir”.
Sultan Zahidov əlavə edib ki, BMT Təhlükəsizlik Şurasının 550 və 541 saylı qətnamələrinin gündəmə gətirilməsi məsələsi siyasi kontekstdə qiymətləndirilə bilər:
“Bu qətnamələrin vurğulanması bəzi dairələr tərəfindən siyasiləşdirmə kimi qiymətləndirilə bilər. Burada daha çox Türkiyə və Yunanıstan arasında olan tarixi və siyasi ziddiyyətlərin təsiri hiss olunur”.
